Күнмиңда тутулған 25 нәпәр зәһәр йөткигүчи аялниң һәммиси капаләткә қоюп берилди

• Мухбиримиз гүлчеһрәниң бу һәқтики мәлумати
• Download story audio

Күнмиң сақчи даирилири-7айниң 27си йүннәнниң маң шәһридин йолға чиқип, күнмиңға қонған шәрқ һава йоли mu 5735 қетимлиқ айропиланни тәкшүрүш җәрянида җәмий 30 адәмни тутуп қалған. Бу оттуз адәмниң ичидә бир хитайдин башқа һәммиси уйғурлар болуп 25 и , 21 яштин 32 яшқичә болған уйғур қиз ‏- аяллири һәмдә йәнә төт нәпәр балиму бар иди.

Зәһәр йөткүгүчиләр һәммиси ана вә болғуси анилар

Ахтуруш җәрянида 25 нәпәр аялниң һәммисидин зәһәрлик чекимлик байқалған. Кишини ечиндуридиғини, буларниң 19и еғир аяғ болғандин сирт , қалғанлириму балилиқ вә бала емитиватқан аяллар. Улар йөткәп маңған зәһәрниң омумий миқдари5800 грамға йетиду. Гәрчә бу зор көләмдики зәһәр йөткәш делоси һесаблансиму , әмма хитай қанунида йәнә, еғир аяғ вә бала имитиватқанларға вақитлиқ мәмурий җаза берилмәйдиғанлиқи үчүн бу 25 нәпәр уйғур зәһәрлик чекимлик җинайәтчилириниң делосини ениқлаш һәмдә уларға қандақ җаза көрүш мәсилиси кишиләрни қизиқтуруватқан мәсилә болуп кәлгән иди.

Бу уйғур аяллири вә балилар зәһәр әткәстчилириниң зәһәр йөткәш қорали

25 Нәпәр зәһәр йөткигүчи уйғур аял җинайәтчиләрһәққидә йәниму йеңи мәлуматлар елиш үчүн күнмиң шәһәрлик сақчи идарисидин әһвал игилидуқ. Исмини һәмдә авазини аңлитишни халимиған бир сақчи бизгә делониң ениқлиниш җәрянида наһайити чоң бөсүш болғанлиқи һәмдә асаслиқ җинайәтчиләрни қолға чүшкәнликини ейтти.

"Бу хитай сақчиниң ейтишичә қолға чүшкән зәһәр йөткәш җинайәтчилириниң ичидики нургүл һүсәнниң иқрар қилишичә , әркин исимлик бир уйғур уни ичкиридә пул тепиш асан дәп һава йоли арқилиқ алдап күнмиңға елип кәлгән. Андин пойизға олтуруп маң шәһиригә елип барғандин кейин , бир қетим зәһәр йөткәп бәрсә 10миң йүән пайда беридиғанлиқини ейтқан , -27июл күни әркин исимлик бу зәһәр әткәсчиси униңға айропилан биләт вә 200 гирам хироинни берип бәдинигә юшуруп меңишни өгәткән.

Бу сақчи бизгә йәнә мәзкур делода бу 25 нәпәр зәһәр йөткигүчи гәрчә наһайити көп миқдарда зәһәр йөткигән болсиму уларниң асасән мушуниңға охшаш алданған яки мәҗбурланған һалда зәһәр йөткигәнликини , әң чоң җинайәтчиниң уларниң арқисиға йошурунғанлиқини ейтти . Әмма мәзкур делониң тәрәққияти һәмдә бу җинайәтчи аялларниң қандақ бир тәрәп қилинғанлиқи һәққидә мәлумат беришни рәт қилди.

Қанун бойичә уларниң һәммиси кепилгә қоюп берилди

Биз йәнә күнмиң сақчилириға ярдәмлишип мәзкур делони паш қилишқа қатнашқан бир уйғур сақчидин учур алдуқ. Гәрчә бу уйғур сақчи делониң паш болуш нәтиҗиси һәққидә тохталмиған болсиму әмма зор көләмдә зәһәр йөткигән бу 25 нәпәр уйғур аялниң һәммисиниң капаләткә қоюп берилгәнликини ейтти.

Игилишимизгә қариғанда йеқинқи йиллардин бери алтун үч бурҗәк райони аталған берма билән хитай чегриси болған йүннән өлкисиниң рүйли қатарлиқ шәһәрлиридә уйғур елидин келип зәһәрлик әткәсчилики билән шуғуллиниватқан уйғурлар бир қәдәр көпийип қалған болуп,йүннәндә бәш миң әтрапида , рүйлиниң өзидила 3000 әтрапида уйғурлар бар икән. Улар хроин әткәсчилики билән шуғулланмақта . Һәтта өзи биләнла тохтап қалмай ака -ука , ача - сиңиллирини һәтта ата , ана, пәрзәнт ,хотунлириниму тартип кирмәктә икән.

Қанун бойичә 50 гирамдин артуқ хроин тошуса өлүм җазаси берилиду. Йүннәндә зәһәр тәкшүрүш‏- тутуш тәдбирлири бир қәдәр мукәммәл , зәһәр елип меңиш интайин мүшкүл . Әмма бу йәрдики уйғурлар җинайи ишлар қанунидин йочуқ тапқан. Җинайи ишлар қанунида "һамилдар аяллар, бир яшқа тошмиған балисини емитиватқан аяллар қанунға хилаплиқ қилса сиртқа кепилликкә беришкә болиду . Йәнә 14 яшқа тошмиғанлар җазаланмайду " дәп бәлгиләнгән . Шуңа рәзил хроин әткәсчилири қанунниң дәл мушу йочуқидин байдилинип пул тепиш ғәризидә һәтта еғир аяғ аяллар яки бала емитиватқан анилар вә балиларни өзлириниң хироин йөткәш қорали, җинайәт васитиси һәмдә қурбаниға айландурмақта. (Гүлчеһрә)