Zeherlik "juwawa délosi" we xitay - yaponiye munasiwetliri


2008-02-04
Share

Yéqinda xitaydin yaponiyige éksport qilin'ghan juwawilarni yégen bir qisim yaponiyiliklerning zeherlinish weqesi kélip chiqti. Bu mesile yaponiye bilen xitay arisida hel qilishqa tégishlik mesililerning birige aylan'ghan bolup, juwawa mesilisi heqqide türlük inkaslar dawamlashmaqta.

Xitay juwawilarda zeherlik madda barliqini inkar qilghan

Yéqinda yaponiyide bir qisim yaponluqning xitayning tonglitilghan juwawilirini yep zeherlinish weqesi kélip chiqqandin kéyin, yaponiye metbu'atliri zeherlen'güchiler we özlirini bi'aram hés qilghuchilarning sanining üzlüksiz köpiyiwatqanliqini xewer qilishqan. Netijide, bu ikki dölet éksport - import da'iriliri arisida ixtilap kélip chiqip, yaponiye terep xitaydin kirgüzülgen mezkur juwawilarda zeherlik madda barliqini körsitishken hemde yaponiyige xitay yémeklirini import qilmasliq pikirliri keng ewji élishqa bashlighan idi. Biraq, xitay terep bolsa, mezkur juwawilarda zeherlik maddilarning barliqini inkar qilishqan.

2 - Ayning 3 - küni xitayning süpet tekshürüsh idarisining bir wekiller ömiki yaponiyige yétip kélip, yaponiye emgek we yémeklikke munasiwetlik erbabliri bilen körüshüp mezkur mesilide söhbetleshken. B b s agéntliqining xewiridin melum bolushiche, söhbettin kéyin yaponiye terepmu juwawilarni pishshiqlap ishlep, yaponiyige éksport qilghan tenyang shirkitige bérip, tekshürüshke pütüshken. Nöwette, bu mesile xitay we yaponiye jama'iti we metbu'atlirining birdek diqqitini jelp qilmaqta.

Xitayche " boshun" uchur torining teywen merkizi agéntliqidin neqil keltürüshiche, yaponiyide xitay juwawiliridin zeherlen'güchiler we özlirini bi'aram hés qilghuchilarning sanining 2100 ge yetken bolup, bu yaponiyide xitay yémeklirige bolghan bir meydan selbiy inkaslargha seweb bolushi mumkin.

Bu mesile xitay mallirining inawitini yene bir qétim tökidu

Hazir amérikida éksport - import shirkitide ishlewatqan, yaponiyide oqup, doktorluq unwanigha érishken bir erbab özining éksport - import mesilisi bilen shoghullan'ghanliqi üchün yaponiye bilen xitay arisida yüz bergen mezkur juwawa mesilisige yéqindin diqqet qilghanliqini bildürüp, bu weqening xitay malliri jümlidin yémeklirining süpet ölchimidin narazi boluwatqan hem uninggha guman bilen qarawatqan yaponluqlargha küchlük tesir körsitishi mumkinlikini tekitlidi.

Uning qarishiche, yaponiye bilen xitayning soda munasiwetliri qoyuq bolup, xitay yaponiyining eng muhim soda shériki, xitay yaponiyige yénik sana'et malliridin bashqa yene köktat, méwe - chéwe hem pishshiqlap ishlen'gen yémek ichmeklerni köplep éksport qilidu. Yémeklikning sap bolmasliqi mesilisi yaponlar téximu köngül bölidighan mesile bolup, bu xewerning tarqilishi bilen yaponlarda xitay yémeklirige ishenmeslik keypiyati küchiyip, xitayning yémek - ichmekliri mehsulatlirining abroyigha hemde sodisigha paydisiz weziyet shekillendüridu.

Yaponiye - xitay munasiwetliri nazuk mesile

Melumki, yéqinqi yillardin buyan yaponiye - xitay munasiwetliri jiddiyliship qalghan bolup, yaponiye xitay munasiwetlirige a'it xewerler yaponiye metbu'atlirining muhim témisidur. Xitayda ikkinchi jahan urushi tarixigha, bolupmu, nenjing qirghinchiliqigha munasiwetlik weqeler tüpeylidin yaponlargha qarshi keypiyat ewji alghan hemde naraziliq namayishliri bolghanda, yaponiyidimu oxshashla xitaygha qarshi turush keypiyatliri kücheygen idi. Yaponiye - xitay munasiwetliri emeliyette nazuk ehwalda bolup, bir qisim mutexessisler juwawa mesilisining ikki dölet munasiwetlirige, bolupmu soda munasiwetlirige qismen soghuqchiliq élip kélishi mumkinlikini perez qilsa, yene beziler buning unchiwala muhim amil bolalmaydighanliqini bildürüshmekte.

Biraq yaponiyide oqup kelgen mezkur doktorning qarishiche, bu mesile, ikki dölet diplomatik munasiwetlirige anche küchlük tesir körsitelmisimu, lékin yenila melum derijide rol oynaydu. "Yaponlar metbu'at uchurlirigha alahide étibar béridighan xelq" deydu mezkur doktor. Uning éytishiche, bu xewer tarqalghandin kéyin yaponlargha küchlük tesir körsitidu, bolupmu iqtisadiy kirimi töwen, xitay mehsulatlirining da'imliq xéridarliri hésablinidighan ottura we töwen qatlamgha téximu bekrek tesir körsitidu. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet