Xitay Uyghur élide 100 künlük zerbe bérish herikitini élip barmaqta


2005.09.19
Share on WhatsApp
Share on WhatsApp

Biz yéqinqi bir nechche aydin buyan xitay da'irilirining Uyghur aptonom rayoni qurulghanliqining 50 yilliqi munasiwiti bilen jem'iyet amanliqini tertipke sélish herikitini kücheytiwatqanliqi heqqide nurghun xewerlerni bérip kelgen iduq. Shundaqla téléfon ziyaritimizni qobul qilghan Uyghur élining aqsu, qeshqer we xoten qatarliq jayliridiki jama'et xewpsizlik idarilirimu bu xewerni étirap qilip, ularning heqiqeten yuqirining buyruqi boyiche, bu mezgilde bixeterlik xizmitini ching tutiwatqanliqini bildürgen idi. 100 Künlük zerbe bérish herikiti

Tengritagh xewer torining melumatigha qarighanda, Uyghur aptonom rayonluq jama'et xewpsizlik nazariti 16 - séntebir küni bu heqte mexsus axbarat élan qilish yighini oyushturup, ularning 7 - aydin bashlap, pütün Uyghur élide 100 künlük mexsus türde tertipke sélish herikitini élip bériwatqanliqini melum qildi.

Yighinda yene, bu 100 künlük heriketning asasliq wezipisi, her qandaq xildiki qanun'gha xilap jinayi heriketlerge qarita nöwettiki yuqiri bésim bilen qattiq zerbe bérish weziyitini saqlash hemde térrorluq we zorawanliq jinayetlirige zerbe bérishni téximu kücheytish ikenliki otturigha qoyulghan. Buningdin sirt yene, jem'iyetke tarqilip ketken qoral-yaraq we partlatquch boyumlarni barliq küch bilen kontrol qilish we musadire qilishmu bu herikettiki muhim wezipilerning biri bolghan.

J x idarisi, abdulla qadir toghrisida tunji qétim xewer berdi

Aptonom rayonluq j x nazariti mezkur axbarat élan qilish yighinida yene, xitayning Uyghur élidiki partkom sékritari wang léchü'en ötken ay ashkarilighan abdulla qurbanning délosini élan qildi. Bu, j x idarilirining mezkur délo heqqide tunji qétim xewer bérishi bolup hésablinidu.

Wang léchü'en ötken ay béyjingda ötküzülgen muxbirlarni kütüwélish yighinida, muxbirning bashqa bir tutqun qilish weqesi heqqide sorighan su'aligha jawaben bu déloni ashkarilap qoyghan idi. Wangning éytishiche, Uyghurlarning musteqilliqini yaqlaydighan abdulla qurban 8 - ayning 7 - küni aqsuda, saqchilar élip barghan tutqun qilish herikitide étip öltürülgen we uning bashqa egeshküchiliri saqchilar teripidin qolgha élin'ghan. J x idarisi bu heqtiki xewiride peqet abdulla qurbanning toqsu nahiyisining ich'ériq yézisida qolgha élin'ghanliqini melum qilip, uning hayat- mamati we uning sebdashlirining hazirqi ehwali toghrisida héchnéme démigen.

Toqsu nahiyisining ich'ériq yézisidiki saqchixana xadimi bu xewerni étirap qilghan bolsimu, lékin bu heqte tepsiliy melumatining yoqliqini éytti. Bu xadim sözide yene, aptonom rayondin kelgen buyruq boyiche, bixeterlik xizmitini toqsu nahiyisining her qaysi yézilirighiche qatlammu- qatlam élip bériwatqanliqini bildürdi.

Köp qisim jaylardiki délo pash qilish ünümi 100٪ boldi

Aptonom rayonluq jama'et xewpsizlik idarisi muxbirlarni kütüwélish yighinida yene, ular élip bériwatqan 100 künlük zerbe bérish herikitining netijisini sherhilep, 7 -aydin 8 - ayghiche bolghan mezgilde pütün Uyghur élide jinayi ishlar dilolirining roshen azayghanliqini hemde bu qisqighiche 2 ay ichide 7 mingdin oshuq déloni pash qilip, sanji, xoten, ürümchi we aqsuni hésabqa almighanda, pütün Uyghur élining bashqa rayonliridiki délo pash qilish ünümini 100٪ ke yetküzgenlikini xewer qildi.

Uyghur élide uzun yillardin buyan ching tutiliwatqan qattiq zerbe bérish herikiti, xitayning bashqa ölkiliridimu élip bérilamdu? bu heqte ziyaritimizni qobul qilghan dunya Uyghur qurultiyining bayanatchisi dilshat rishit "qattiq zerbe bérish herikiti" ning xitayning bashqa ölkiliridimu élip bérilidighanliqini, emma Uyghur élide bolsa, buning shekli özgirip, Uyghurlarni basturush herikitige aylinip qalghanliqini bildürdi.

Bu herikettin tibetmu xali qalmidi

Dilshat rishit sözide yene, xitayning Uyghur élidin bashqa, tibettimu bu xildiki qattiq zerbe bérish herikitini élip bériwatqanliqini hemde muqimliqni saqlash nami bilen élip bériwatqan bu basturush herikitining, eksiche Uyghur we tibet xelqining naraziliq heriketlirini téximu ulghaytidighanliqini bildürdi.

Shundaqla amérikidiki kishilik hoquq közitish teshkilatining shenbe küni élan qilghan bayanatida, xitay hökümitining 1 - séntebir tibet aptonom rayoni qurulghanliqining 40 yilliqi harpisida élip barghan bixeterlikni kücheytish herikitide tibet rahibi sonamni qolghan alghanliqi melum qilin'ghan hemde bu teshkilat xitay hökümitini sonamni derhal qoyup bérishke chaqirdi.(Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet