Ikki chong yighin wekillirining aliy zibuzinnet sétiwélish küchi bazarni heyran qaldurghan

Ikki chong yighinda achqan zibuzinnet bazardiki ghelite qimmet bahaliq mallar ikki chong yighin ehlining éhtiyajini qanduralmighan.
Muxbirimiz weli
2012.03.15
ikki-yighin-qurultay-beyjing-305.jpg Düshenbe küni béyjingda bashlan'ghan xelq qurultiyi. 2011-Yili 5-mart.
AFP

Sén'gaporda chiqidighan “Birleshme seher géziti” ning bayan qilishiche, xitay xelq qurultéyi we siyasiy kéngeshning 5 ming 2 yüz 64 neper wekili we ezasi, gerche béyjingda échilghan chong yighinda, kommunist partiye merkizi komitétining tügimes doklat, yolyoruq we heshemetlik ziyapetliridin zérikken bolsimu, emma eng chong kapitalistlar xitay kommunist partiyisining bu ikki chong yighinda achqan zibuzinnet baziridin zérikmigen. Hetta bu bazardiki ghelite qimmet bahaliq mallar ikki chong yighin ehlining éhtiyajini qanduralmighan.

Xewerde bayan qilinishiche, “Xéngda guruhi” ning bash paychéki, xitayning siyasiy kéngesh ezasi shü jaying ikki chong yighinda, jang zémin yétishtürgen meshhur naxshichi, xelq qurultiyining wekili song zuying, xitay merkizi komitétigha eng yarighan meshhur téléwiziye riyasetchisi yang len, xitayning sabiq bash ministiri li péngning qizi,xitay éléktr quwwiti shirkitining bash paychiki lin shawlin qatarliqlarni “Modél” liqqa yalliwalghan. Bu wekil modéllar kommunist partiyining ikki chong yighinida eng chong kapitalistlarning mélini satqan.

Xitaydiki zibuzinnet sodigerlirining tor géziti “Chong derya ” da bayan qilinishiche, ikki chong yighinning modél wekilliri bélige baghlighan 36 yérige merwayit köz qoyulghan pi'aget markiliq bir kemer ning bahasi 280 ming yüen. Buningdin bashqa, ikki chong yighindiki zibuzinnet körgezmiside yene rolikis, omiga markiliq qolsa'etliri, guchi markiliq üzük-béleyzükler, puchi markiliq médali'on, di'or markiliq qara köz eynek, xérms markiliq bel tasmisi, wénéta markiliq matériyal somkisi, shanel markiliq ötük, armani markiliq pelto, jakobs markiliq somka, hetta férragamo markiliq kéyimlermu bar idi, bularning herbirining bahasi bir nechche onming yüendin töwen emes idi. Qisqisi bu ikki chong yighinda körgezme qilin'ghan bir dane siya qelemning bahasimu 8 ming yüendin 10 ming yüen'giche. Gerche bu yerdiki mal bahasi hetta parizhning zinnet buyum körgezmisidiki mallarning bahasidinmu köp éship ketken bolsimu, emma bu mallarning héchqaysi wekil xéridarlarning éhtiyajini qanduralmighan.

Bir munche tor gézitliri, tehlil élan qilip, xitayda her yili 3‏- ayda zibuzinnet buyumlirining bahasi ghelite ösüp kétishi, her yili 3‏- ayda échilidighan ikki chong yighin'gha kélidighan baylar bilen bilen munasiwetlik dep körsetti. Bu gézitlerge xelq biwasite yézip ewetken qisqa obzorlarda shiddetlik ghezep ipadilendi.

Xitayning “Dölet maliyisi” heptilik géziti bügün ikki chong yighinning zibuzinnet baziri heqqide tartilghan resimlerni intérnétta élan qilghan we bu heqte mulahize qilghan uchur wasitilirini, söz-chöchek tarqatti dep tenqidlidi we ikki chong yighin jeryanida wekil we ezalarning zamaniwi kiyin'genliki xitayda iqtisad uchqandek téz tereqqiy qiliwatqanliqining belgisi dep chüshendürdi.

Buninggha qarita bügün yene bir munche tor gézitliride jiddiy munazire qozghaldi. Uningdiki bezi obzorlarda, xitay hökümiti bultur jakarlighan 128 milyon xelq téxiche namratliqtin qutulalmidi dégen sanliq melumat neqil élip ikki chong yighinning wekili dégen kishilerge ghezep ipadilen'gen. Yene bezi obzorlarda, her yili xitayning ikki chong yighinigha wekil dégen salahiyet bilen qatnishidighan kishilerning, héchqachan xelq saylap baqmighan kishiler ikenliki, ularning néme qilip béyip ketkenliki heqqidiki delil-ispatlar otturigha qoyulghan. Yene bezi obzorlarda, xelq qurultiyining “Wekilliri”, siyasiy kéngesh “Ezaliri” dégen kishilermu kommunist bandit guruhining bir qismi dep körsitilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.