Америка дөләт мәҗлиси далай ламаға алтун медали бериш һәрикити башланди

Америка дөләт мәҗлисиниң әзалири, тибәтниң диний вә сиясий даһийси далай ламани, америка дөләт мәҗлисиниң әң алий нишани болған, дөләт мәҗлиси алтун медали билән макапатлаш һәрикитини башливәтти.

Далай ламаға дөләт мәҗлиси алтун медали бериш һәрикитиниң тәшәббусчилири тәрипидин, дөләт мәҗлиси әзалириға мәзкур һәрикәтни қоллаш тоғрисида әвәтилгән бир хәттә, медалниң далай ламаниң тинчлиқ, кишилик һоқуқ вә диний чүшинишни қанат яйдуруш тоғрисида көрсәткән пәвқуладдә хизмәтлири үчүн берилидиғанлиқи билдүрүлгән. Америка дөләт мәҗлиси алтун медали, қәһриманларға, алий җасарәт көрсәткәнләргә һәмдә диний рәһбәрләргә берилидикән.

Һазирғичә, америка дөләт мәҗлиси рим папаси, папа 2‏- җан пол, тириса анан, нобил тинчлиқ мукапати алған әли вәзәл вә җәнубий африқиниң рәһбири нилсон мандила қатарлиқ атақлиқ кишиләрни дөләт мәҗлиси алтун медали билән мукапатлиған.

Далай ламани дөләт мәҗлиси алтун медали билән мукапатлаш һәрикитиниң тәшәббусчилириниң ейтишичә, далай ламаға дөләт мәҗлиси алтун медали бериш қанун лайиһисиниң қобул қилиниши, америка дөләт мәҗлисиниң тибәт мәсилисиниң тибәт мәдәнийитини қоғдиған вә тибәт хәлқиниң аптономийә тәләплиригә һөрмәт қилған асаста, сөһбәт йоли билән бир тәрәп қилинишини қоллайдиғанлиқи тоғрисидики күчлүк бир сигнали һесаблинидикән.

Далай ламаға дөләт мәҗлиси алтун медалиниң берилиши үчүн, америка дөләт мәҗлиси әзалириниң аз дегәндә йериминиң бу тоғридики қанун лайиһисини қобул қилиши керәк икән.

Хәвәрләргә қариғанда, америка дөләт мәҗлиси хәлқара мунасивәтләр комитетиниң нопузлуқ әзалиридин там лантос әпәнди, далай ламаға дөләт мәҗлиси алтун медални бериш һәрикитини қоллаватқан сиясәтчиләрниң бери икән. (Қанат)