Хитай тибәттә етник тазилаш елип барғанлиқини рәт қилди

• 
  2006-06-06

Хитай даирилири сәйшәнбә күни баянат елан қилип, тибәттә етник тазилаш елип барғанлиқини рәт қилди вә тибәт кишилик һоқуқ тәшкилатиниң испанийидә хитай даирилири тибәттә етник тазилаш елип барғанлиқи үстидин сот мәһкимисигә дава ачқанлиқини "пүтүнләй ойдурма " дәп әйиблиди.

Испанийиниң дөләтлик сот мәһкимиси дүшәнбә күни мәркизи мадриттики тибәтни һимайә қилиш җәмийитиниң " етник тазилаш"һәққидики әрзнамисини көрүп чиқишқа башлиди. Бу тәшкилат испанийә қануни бойичә инсанийәткә қарши туруш җинайити өткүзгән дилоларни башқа дөләтләрдә садир қилған болсиму, испанийә сот мәһкимисигә әрз қилиш мумкинчиликидин пайдилинип, хитайниң сабиқ дөләт рәиси җаң земин, сабиқ баш министир ли пең вә тибәттики 5 нәпәрһәрбий вә бихәтәрлик әмәлдари үстидин дава ачқан. Давагәр тәшкилат, хитай даирилири тибәтни бесивалған 1951- йилидин бери бир милйондин артуқ тибәтликниң өлтүрүлгәнликини вә из дерәксиз йоқалғанлиқини билдүрмәктә.

Давагәрләр , җаң земин қатарлиқ җавабкарларни дөләт террори, тән җазаси вә инсандарчилиққа қарши туруш җинайити садир қилиш билән әйиблигән. Сот мәһкимиси дилони көрүп чиқиш җәрянида гуваһчиларни сот мәһкимисидә гуваһлиқ беришкә чақириши мумкин. Лекин бу , хитай даирилирини ғәзәпләндүрмәктә. Бу һәқтики баянатида " биз мунасивәтлик тәрәпләрниң далай гуруһи вә уларниң һәқиқий маһийитини ениқ чүшинивелишини үмид қилимиз " дәп тәкитлигән лю җйәнчав, " шундақла биз уларниң бөлгүнчилик паалийитигә пурсәт вә мәйдан яритип берилмәсликини үмид қилимиз" дәйду. Давагәрләр тәрипидин "етник тазилаш" җинайити билән әйибләнгән бу кишиләрниң көпчилики һазир пинсийидә яшимақта. (Әркин)