Xitay tibette étnik tazilash élip barghanliqini ret qildi

• 
  2006-06-06

Xitay da'iriliri seyshenbe küni bayanat élan qilip, tibette étnik tazilash élip barghanliqini ret qildi we tibet kishilik hoquq teshkilatining ispaniyide xitay da'iriliri tibette étnik tazilash élip barghanliqi üstidin sot mehkimisige dawa achqanliqini "pütünley oydurma " dep eyiblidi.

Ispaniyining döletlik sot mehkimisi düshenbe küni merkizi madrittiki tibetni himaye qilish jem'iyitining " étnik tazilash"heqqidiki erznamisini körüp chiqishqa bashlidi. Bu teshkilat ispaniye qanuni boyiche insaniyetke qarshi turush jinayiti ötküzgen dilolarni bashqa döletlerde sadir qilghan bolsimu, ispaniye sot mehkimisige erz qilish mumkinchilikidin paydilinip, xitayning sabiq dölet re'isi jang zémin, sabiq bash ministir li péng we tibettiki 5 neperherbiy we bixeterlik emeldari üstidin dawa achqan. Dawager teshkilat, xitay da'iriliri tibetni bésiwalghan 1951- yilidin béri bir milyondin artuq tibetlikning öltürülgenlikini we iz déreksiz yoqalghanliqini bildürmekte.

Dawagerler , jang zémin qatarliq jawabkarlarni dölet térrori, ten jazasi we insandarchiliqqa qarshi turush jinayiti sadir qilish bilen eyibligen. Sot mehkimisi diloni körüp chiqish jeryanida guwahchilarni sot mehkimiside guwahliq bérishke chaqirishi mumkin. Lékin bu , xitay da'irilirini ghezeplendürmekte. Bu heqtiki bayanatida " biz munasiwetlik tereplerning dalay guruhi we ularning heqiqiy mahiyitini éniq chüshiniwélishini ümid qilimiz " dep tekitligen lyu jyenchaw, " shundaqla biz ularning bölgünchilik pa'aliyitige purset we meydan yaritip bérilmeslikini ümid qilimiz" deydu. Dawagerler teripidin "étnik tazilash" jinayiti bilen eyiblen'gen bu kishilerning köpchiliki hazir pinsiyide yashimaqta. (Erkin)