Amérika hökümiti népaldiki tibet musapirlirini qobul qilmaqchi

Amérika hökümiti népalda turiwatqan bir qisim tibetlerni, musapirlarni orunlashturup pilani boyiche amérikigha qobul qilishni oylashmaqta.

Amérika tashqi ishlar ministirliqining charshenbe küni bildürüshiche, bu heriket, hökümetning qollishida élip bériliwatqan musapirlarni qayta orunlashturush pilanining bir qismi iken.

Bu pilan boyiche, népalda turiwatqan sani téxi éniq bolmighan tibet musapirliri amérikigha kélip yashiyalaydiken. Tibetler merkiziy uyushmisining bildürüshiche, barliq iltimas qilghuchilar amérikigha kirishke ruxset qilinishtin burun , choqum amérika dölet zémini bixeterlik ministirliqining testiqidin ötüshi kérek iken.

1989 - Yilidin buyan népal da'iriliri xitay bilen bolghan munasiwetni nezerde tutup, yéngidin kirgen tibetlerge qanunluq turush salahiyitini asasiy jehettin bermey keldi. Nöwette népalda 30 minggha yéqin tibet bar bolup, bularning arisida 10 minggha yéqini qara nopus iken. Bularning her qachan xitaygha qayturulush éhtimalliqi bar bolghachqa, xelq'ara jem'iyiti ularning teqdirige köngül bölmekte.

Buningdin bir qanche yillar ilgiri , népal hökümiti bu yerdiki shir'eli isimlik bir Uyghur musapirni xitaygha qayturup bergende, xitay da'iriliri uninggha ölüm jazasi bérip, étip tashlighan idi. (Peride)