Tibetlik oqughuchilar chingxeyde namayish ötküzdi
2004.10.11
Erkin asiya radi'oyimiz tibet bölimining yéqinda igiligen melumatlirigha qarighanda, 200 din artuq tibetlik oqughuchilar 21 - sintebirdin bashlap, chingxey ölkisining gulung oblastluq hökümet binasining aldida namayish ötküzgen. Ular xitay hökümet da'irilirining aliy mektep püttürgen oqughuchilarni ishqa orunlashturush wedisige emel qilmighanliqigha qarshiliq bildürgen.
Ismini ashkarilashni xalimaydighan bir kishining radi'oyimiz tibet bölimige namayish heqqide mundaq didi:
"Tibetlik yashlar chong- kichik her xil chidirlarni tikip, 21 - sintebir künidin bashlap gulung oblastliq hökümet binasining aldigha yétip qopup turiwatidu. Hökümet emeldarlari bu tibetlerdin namayish qilmasliqni sorap , ulargha layiq xizmet chiqsila, ularni ishqa orunlashturidighanliqi heqqide söz berdi. Biraq bu yashlar téxi tarqimidi.
Namayish hökümet emeldarlirini endishige saldi
Mezkür kishining yenimu ilgirligen halda ashkarilishiche, yerlik hökümet emeldarlarni namayishning xitayning öktebir dölet bayrimi ötkiche dawamlishishidin qattiq endishe qilip, oqughuchilarni namayishni toxtutushqa qayil qilish üchün köp qétim xizmet ishligen. Shundaqla ular yene bezide oqughuchilarni tamaq we chidir bilen teminligen.
Emma aliy mektep püttürgen bu yashlar qet'iylik bilen namayishni dawamlashturghan. Ular xitay hökümiti aliy mektep püttürgenlerge xizmet béridighanliqi heqqide wede bergenliki üchün, a'ilidikilirining zor bedel tölep, hetta öy -bisatliri we mallirini sétip,ularni aliy mekteplerde oqutqanliqini shikayet qilghan. Mezkür kishining bildürishiche, nurghun oqughuchilar oqush püttürüp kelgendin kiyin, xizmetke orunlishalmighan. Netijide bu a'ililer iqtisadiy jehettin intayin qiynalghan.
Namayish tinchliq bilen ötküzüldi
Gulung oblastidiki bir xitay emeldarimu, 9 - ayning 21 - künidin bashlap, bundaq bir namayishning yüz bergenlikini,namayishqa qatnashqan 200 dek oqughuchilarning köpinchisining tibetlikler ikenlikini étirap qildi.
- Ular gulung oblastining hökümet binasigha yéqin bir jayda yétip qopiwatidu. Ular tinich halda namayish ötküziwatidu. Hichqandaq sho'armu towlimidi. Ularning asasliqi hazir xizmetlerning bashqa rayundin kelgenlerge bérilip, yerliklerge hichqandaq étibar qilinmaywatqanliqidin shikayet qiliwatidu. Biraq hazir weziyet ilgirkige oxshimaydu. Nurghun hökümet tarmaqliri taqilip ketkechke, aliy mekteplerde oqughanlargha köp xizmet pursiti yoq.
Mezkür emeldarning yenimu ilgirligen halda bildürishiche, bu oqughuchilar heqiqeten hökümetning xizmetke orunlishish shtatigha ige iken. Biraq chingxey ölkisidiki bu emeldar namayishqa chiqqan bu oqughuchilarning mesilisini hel qilishning intayin tes ikenlikini bildürüp, buning sewebini yiterlik xizmet pursiti yoq dep tekitligen. (Arzu)
Munasiwetlik maqalilar
- Nipal hökümiti 27 tibetlik musapirni qolgha aldi
- Dalay lama: xitay yadro tashlanduqlirini tibetke töküwatidu
- Dalay lamaning wekilliri 3 - qétim béyjingni mexpiy ziyaret qildi
- Gérmaniyide xitaygha qarshi namayish ötküzüldi
- Türkiyide xitaygha qarshi namayish ötküzüldi
- Dalay lamaning wekilliri béyjingdin daramsalagha qaytti
- Analizchilar dalay lama wekillirining xitaydiki ziyaritidin ümid kütmekte
- Üch neper tibetlik musteqilliqni terghip qilish gumani bilen türmige tashlandi
- Dalay lama kostarikani ziyaret qildi
- Béyjing teyinligen benchen lama kommunistik partiyini medhiyilidi