Хитай даирилири тибәт исяниға қатнашқан 42 кишини сотлиди

Хитай даирилири бу йил март ейидики тибәт исяниға қатнашқан 42 нәпәр тибәтлик өктичини җазалиған болуп, йәнә 100 нәччә нәпәр кишиниң сотлиниватқанлиқи, бәзилириниң өлүм җазасиға һөкүм қилиниш еһтималини чәткә қаққили болмайдиғанлиқи билдүрүлди.
Мухбиримиз әркин хәвири
2008.07.11

 Тибәт аптоном райониниң муавин рәиси палма трилий җүмә күни шинхуа агентлиқиға бәргән баянатида, 14‏ - марттики лхаса исянида ойниған роли сәвәбидин түрлүк җазаларға һөкүм қилған бу 42 нәпәр тибәтниң әң еғириға муддәтсиз қамақ җазаси берилгәнликини, һазирчә өлүм җазасиға һөкүм қилинғанлар болмисиму, лекин сотлиниватқан тутқунлар ичидики бәзи кишиләрниң өлүм җазасиға һөкүм қилиниш еһтимали барлиқини чәткә қақмиди.

У нөвәттә 117 нәпәркишиниң сотлиниватқанлиқи, уларға қандақ җаза берилиши хитай қанунлириға асасән бекитилидиғанлиқини илгири сүрди. Лекин кишилик һоқуқни көзитиш тәшкилати қатарлиқ хәлқара органлар җазаланған тибәтликләрниң адил сотланмиғанлиқини билдүрмәктә.

Кишилик һоқуқни көзитиш тәшкилатиниң асия ишлири мәсули речардсон, бу йил 4 ‏ - айда 30 нәпәр тибәтлик тутқун үстидин һөкүм елан қилинғанда даириләрниң сот тәртипини тәнқидлигән иди. У, бу кишиләрниң мәйли гунаһи болсун яки болмисун адил сотлиниши керәкликини, лекин уларниң йепиқ сот билән җазаланғанлиқини, дәлил пакитлар елан қилинмай, тутқунларниң өзи халиған адвокатларни тәклип қилишиға йол қоюлмиғанлиқи сотниң адалитигә гуман чүшүргәнликини билдүргән иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.