Йәркәндики бир кәнт йәслисидә оқуватқан 30 балидин 25 нәпириниң тутқунлар пәрзәнти икәнлики ашкариланди

Мухбиримиз шөһрәт һошур
2021-08-13
Share
wetende-qalghan-balilar-meripet.jpg Юртиға қайтса лагерға елип кетилиштин қорқуп, түркийәдә туруп қалған мәрипәт ханим, юртида қалған 4 балисиниң рәсимини мухбирға көрсәткән көрүнүш. 2018-Йили 21-авғуст, истанбул.
AP

Муһаҗирәттики уйғуларниң юртида қелип қалған ғайиб пәрзәнтлири һәққидә елип барған ениқлашлиримиз давамида, йәркән чаһарбағ йезисидики бир кәнт йәслисидә оқуватқан 30 балидин 25нәпириниң аниси яки дадиси тутқунда икәнлики ашкариланди. Материялларда көрситилишичә, чаһарбағ йезиси 15 кәнттин тәркиб тапқан болуп, бир кәнттә 150 чә аилә нопуслуқ икән. Йәнә ениқлашлиримиз давамида алақидар хадимлардин бири ата-анисидин һәр иккиси тутуп кетилгән балиларниң параванлиқ мәркизидә айрим тәрбийәлиниватқанлиқини мәлум қилди.

Һөрмәтлик радийо аңлиғучилар, биз муһаҗирәттики уйғурларниң из-дерики болмайватқан пәрзәнтлири үстидин елип барған ениқлашлиримиз давамида, ата-аниси тутқун қилинип кәткән балиларниң айрим мәктәпләрдә оқуватқанлиқи, бу мәктәпләрниң сақчи вә аманлиқ хадимлириниң 24 саәт назаритида башқуруливатқанлиқи мәлум болди.

Кучаниң ишхала йезисида қурулған бир параванлиқ йәслисидә 40 нәпәрчә оқуғучи бар болуп, бу йәслиниң аманлиқ хадими кечә-күндүз нөвәтчиликтин башқа өзлириниң үзлүксиз һалда сиясий өгинишләргә қатнишидиғанлиқини баян қилди. Мәлум болушичә, балиларни ата-анилири билән иекранда көрүштүрүш вә уларни бәзләш, бу аманлиқ хадимлириниң муһим вәзипилиридин бири икән.

Мәлум болушичә, бу йәслиләрдә йәсли оқутқчилиридин башқа, сақчи вә муһапизәтчи хадимларму бар болуп, булар бир тәрәптин балиларниң мәктәп ичидин чиқип кәтмәсликигә мәсул болса, йәнә бир тәрәптин идийивий һалитигә мәсул икән. Йәркән чаһарбағдики бир кәнт йәслсидә мушундақ вәзипини өтәватқан бир аманлиқ хадимниң баян қилишичә, у өзи мәсул болған йәслидә 30 балидин 25 нәпириниң дадиси яки аниси тутқунда икән. Булар қиш күнлири ятақта ятқузулса, яз күнлири лагер сиртидики апси яки дадиси тәрипидин йәслигә әкилип әкитилидикән.

“бәйду” учур амбирида көрситилишичә, йәркәннниң чарһарбағ йезисида 15 миң нопус бар болуп, йезидики 15 кәнтиниң һәр биридә 1000 чә нопус, 150 чә аилә бар икән.

Мәзкур аманлиқ хадими тутқунларниң балилириниң рухсәт берилгән әһвал астида, екранда ата-аниси билән көрүштүрүлидиғанлиқини баян қилиш билән бирликтә, көрүшүш җәряни һәққидиму мәлумат бәрди.

Уларниң баянлиридин балиларниң ата-аниси билән көрүшкәндә көңлидики гәпни дейәлмәйдиғанлиқи, ата-аниларниңму уларға йүрәк сөзлирини баян қилалмайдиғанлиқи мәлум.

Түркийәдики хитай консулханиси алдида бир йилчә давамлашқан “аиләм қәйәрдә” намалиқ намайиш паалийитиниң актип қатнашқучлиридин бири омәр һәмдулла болуп, униң хитай һөкүмити үстидики шикайити милйонер икки акисиниң кесиветилгәнликила болмастин, бәлки йәнә вәтәндә 1вә 2 яшта қепқалған икки пәрзәнтниң из-дерикиниңму йоқлуқи иди. Биз бу бу икки балиниң әһвалини сүрүштә қилип байинғолин областлиқ әдлийә идарисиға телефон қилдуқ. Алақидар бир хадим ата-анисиниң һәр иккилисила тутуп кетилгән балиларниң хәлқ ишлири идариси башқуришидики параванлиқ мәктипидә оқуйдиғанлиқини ашкарилиди. Әмма мәзкур мәктәпләрдә қанчиликтин балиниң оқуватқанлиқи һәққидә мәлумат бәрмиди.

Һөрмәтлик радийо аңлиғучилар, юқурида йәркәндики бир кәнт йәслисидә оқуватқан 30 балидин нәпириниң дадиси яки аписи тутқунда икәнлики һәққидә аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт