Sam brawnbek ependi bilen katrina lentos xanimgha Uyghurlar namidin ton kiydürüldi

Muxbirimiz nur'iman
2022.07.01
Share on WhatsApp
Share on WhatsApp
Sam brawnbek ependi bilen katrina lentos xanimgha Uyghurlar namidin ton kiydürüldi “2022-Yilliq xelq'ara diniy erkinlik aliy kéngishi” ning yépilish murasimida d u q we uhrp rehberliri sam brownbek(Sam Brownback) ependi we katrina lentos swit (Katrina Lantos Swett) xanimgha ton kiydürgen körünüsh. 2022-Yili 30-iyun, washin'gton.
Photo: RFA

28-Iyun küni amérika paytexti washin'gtonda bashlan'ghan “2022-Yilliq xelq'ara diniy erkinlik aliy kéngishi” 30-iyun küni axirlashti. Dunyaning her qaysi jayliridin kelgen diniy rehberler, diniy teshkilatlarning wekilliri we siyasi pa'aliyetchiler ishtirak qilghan mezkur aliy kéngeshte Uyghur mesilisi bashtin-axiri muhim mesililer qatarida otturigha qoyuldi.

Mezkur aliy kéngesh sabiq amérika xelq'ara diniy erkinlik bash elchisi sam brownbek ependi we tom lentos kishilik hoquq we adalet fondining re'isi doktor katrina lentos swit (Katrina Lantos Swett) xanim bashchiliqida uyushturulghan. 30-Iyun küni ötküzülgen yépilish murasimida dunya Uyghur qurultiyi we Uyghur kishilik hoquq qurulushi rehberliri bu ikki muhim shexske Uyghurlarning hörmiti we teshekkürini bildürüsh üchün ton kiydürgen, shundaqla Uyghur doppisi teqdim qilghan.

Bu munasiwet bilen dunya Uyghur qurultiyining re'isi dolqun eysa ependi radiyomizning ziyaritini qobul qildi. U Uyghurlarning awazi boluwatqan kishilerge minnetdarliq bildürüshning ularning kelgüside Uyghurlar üchün téximu küchlük awaz chiqirishigha türtke bolidighanliqini bildürdi.

Melum bolushiche, sabiq amérika xelq'ara diniy erkinlik bash elchisi sam brownbek ependi, amérika tashqiy ishlar ministirliqi uyushturghan diniy erkinlik yighinlirida we xelq'araliq sehnilerde izchlil türde Uyghurlar mesilisi otturigha qoyup kelgen. 2020-Yili 13-iyul küni xitay tashqiy ishlar ministirliqining bayanatchisi xu'a chünying xitayning amérikaning 4 neper emeldarigha jaza tedbiri qoyidighanliqini élan qilghan idi. Bu emeldarlarning qatarida eyni waqittiki amérika tashqiy ishlar ministirliqining dini erkinlikke mes'ul alahide elchisi sam brownbek ependimu bar idi.

Uyghur kishilik hoquq qurulushining diréktori ömer qanat ependining radiyomizgha bildürüshiche, mezkur aliy kéngesh Uyghur mesilisige nisibeten nahayiti ünümlük bir yighilish bolghan. Aliy kéngeshke qatnashqan meyli diniy sahediki kishiler bolsun, meyli kishilik hoquq pa'aliyetchiliri bolsun, hemmisi özlirining nutuqlirida Uyghurlar üchün alahide orun bergen.

Ömer qanat ependi mezkur aliy kéngeshning yépilish murasimida ötküzülgen ton kéygüzüsh pa'aliyiti heqqide toxtilip, mundaq dédi: “Xitay jaza tedbiri qollan'ghan shexslerni biz mukapatlishimiz kérek, elwette!”

Melum bolushiche, “2022-Yilliq xelq'ara diniy erkinlik aliy kéngishi” ikkinchi qétimliq diniy erkinlik ali kéngishi bolup, birinji qétimliqi ötken yili 13-iyuldin 15-iyulghiche ötküzülgen. Mezkur aliy kingesh dunyaning herqaysi jayliridiki diniy erkinlikni qollaydighan diniy teshkilatlarni bir yerge jem qilishni meqset qilghan, shundaqla dunyadiki muhim we yuqiri derijilik diniy rehberler öz ara uchrishidighan xelq'araliq sehne bolup qalghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet