Kanada sherqiy türkistan jem'iyiti torontoda “Uyghur xeyri-saxawet sen'et kéchiliki” ötküzdi

8-Iyun küni kanada sherqiy türkistan jem'iyitining tirishchanliq körsitishi bilen kanadaning toronto shehiride “Kanada Uyghur xeyri-saxawet sen'et kéchiliki” ötküzüldi.

Mezkur kéchilikke kanadadiki Uyghur jama'iti, kanadaning siyasiy sahesidiki nopuzluq erbablar we chet'ellik méhmanlar bolup, jem'iy 600 ge yéqin adem qatnashqan. 

Biz bu kéchilikning tepsilatidin toluq xewerdar bolush meqsitide kéchilikni uyushturghan kanada sherqiy türkistan jem'iyitining re'isi tuyghun abduweli ependi bilen téléfon ziyariti élip barduq. Uning radiyomizgha bildürüshiche, kéchilikte orunlan'ghan nomurlar Uyghur tili we in'gliz tilida tonushturulup, chet'ellik tamashibinlargha Uyghur tarixi we medeniyitidin xewerdar bolidighan bir shara'itni yaritip bergen iken.

Ziyaret dawamida tuyghun abduweli ependi mezkur kéchilikke kanada yehudiylar komitétining bashliqi, xelq'araliq “Bir erkin dunya” teshkilatining bashliqi qatarliq kanadadiki bir qisim chet'ellik muhim erbablarning qatnashqanliqi we muhim söz qilghanliqini éytip ötti. 

Tuyghun abduweli ependi sözide kéchilikke teklip qilin'ghan Uyghur sen'etkarlar heqqidimu qisqiche chüshenche berdi. Uning qeyt qilishiche, kéchilikke en'giliyedin rehime mexmut, eziz eysa qatarliq pa'aliyetchiler qedim teshrip qilghan we serxil nomurlarni orundighan. Halbuki, qazaqistandin saniye isma'il wiza alalmighanliqtin mezkur kéchilikke kélelmigen. 

Bu qétimliq “Kanada Uyghur xeyri-saxawet sen'et kéchiliki” ke teklip bilen qatnashqan en'gliyediki Uyghur pa'aliyetchi rehime mexmut mezkur kéchilik heqqidiki tesiratlirini bayan qilip ötti. U kéchilikke kanadaning herqaysi sheherliridin nurghun Uyghurlarning kélip qatnashqanliqini, buningdin kanadadiki Uyghur jama'itining ömlük we ittipaqliq rohini körgenlikini bayan qildi. 

Rehime mexmut xanim yene Uyghur milliti duch kéliwatqan nöwettiki éghir krizisni xelq'aragha noqul nutuq sözlep anglatqandin bashqa yene naxsha-ussul we muzika qatarliq sen'et shekli bilen anglatsa tesirining téximu keng bolidighanliqini otturigha qoydi. 

Bu qétimliq kéchilikte en'gliyediki Uyghur ziyaliysi eziz eysaning “Jawabsiz qalghan téléfon” namliq hékayisige asasen ishlen'gen mikro filim qoyulghan bolup, kéchilikke qatnashqan chet'ellikler mezkur filimge yuqiri baha bergen. 

Axirida tuyghun abduweli ependi bu qétimliq kéchilikning qandaq zörüriyet astida ötküzülgenliki heqqide melumat berdi. Uning déyishiche, nöwette xitay hökümiti Uyghur medeniyitini tüp yiltizidin yoqitishqa urunuwatqan mezgilde bu xildiki kéchilikler tashqi dunyagha Uyghur medeniyitining intayin ilghar bir medeniyet ikenlikini tonutalaydiken shundaqla bu arqiliq Uyghur medeniyitini muhajirettiki Uyghurlar arisida saqlap qélish meqsitigimu yetkili bolidiken.