Атуштики бир кәнттә төвән капаләт пули елип туруп намаз оқуған 10 киши «тәрбийәләш» кә елип кетилгән

Мухбиримиз шөһрәт һошур
2020-09-23
Share
namaz-urumchi-5-iyul-bir-yil.jpg «5-Июл үрүмчи вәқәси» гә бир йил болуватқан мәзгилләрдә мәсчит сиртида намаз өтәватқан кишиләр. 2010-Йили 2-июл, үрүмчи.
AFP

Алдинқи күнидики ениқлашлиримиз давамида атуштики бир кәнт сақчиси 65 яштин юқуриларниңла намаз оқуш яки оқумаслиқ әркинлики барлиқини ашкарилиған иди. Бүгүнки ениқлашлиримиз давамида йәнә бир кәнт сақчиси төвән капаләт пули еливатқанларниң йеши қанчә болушидин қәтийнәзәр, намаз оқушиға рухсәт йоқлуқини ашкарилиди. У йәнә өз тәвәликидин төвән капалити елип туруп намаз оқуған 10 кишиниң лагерға елип кетилгәнликини дәлиллиди.

Хитай даирилири һазирға қәдәр уйғур районида көп санда кишигә турмуш төвән капаләт пули бериватқанлиқи, бу арқилиқ уларни пуқралиқ һәқ-һоқуқлиридин бәһримән қиливатқанлиқини илгири сүргән иди. Алақидар хадимларниң баянлиридин, даириләрниң төвән капаләт пулини васитә қилип туруп, кишиләрни етиқадидин ваз кечишкә мәҗбурлаватқанлиқи ашкариланди. Атуштики бир кәнт сақчисиниң баян қилишичә, 65 яштин ашқанларниңла намаз оқушиға йол қойған даириләр «дөләттин пул еливатқанлар динға ишәнмәслики керәк» бәлгилимиси бойичә, йеқинқи 3 йилда төвән капаләт пули еливатқанларниң йеши қанчә болушидин қәтийнәзәр, уларни намаз оқуштин чәклигән. Әгәр намаз оқуғанлиқи байқилип қалса, төвән капаләт пули кесилипла қалмастин, бәлки йәнә «тәрбийәләш» кә елип кетилгән

Өзиниң бир пешқәдәм компартийә әзаси икәнлики вә төвән капаләт пули еливатқанлиқини баян қилған қәшқәр дөләтбағдики бир аһалә дөләттин пулла алған һәрқандақ кишиниң намаз оқушиға рухсәт йоқлуқини, шуңа намаз оқушни хиялиғиму кәлтүрмәйдиғанлиқини әскәртти. Униң дейишичә, қәшқәрдә бу түзүм йолға қоюлуватқили 3 йилчә болған икән.

Өз тәвәликидә қанчилик кишиниң төвән капаләт пули алидиғанлиқидин хәвәрсизликини ейтқан атуштики мәзкур кәнт сақчиси, өзи мәсул кәнттә төвән капаләт пули елип туруп намаз оқуғанлиқи үчүн «тәрбийиләш» кә әкетилгән 10 кишиниң исимлирини ашкарилиди.

Хотәнниң зава йезисидики бир кәнт кадири өз мәһәллисидики төвән капаләт пули елип туруп йошурунчә намаз оқуғанлардин мәмәтнури мәтсидиқ исимлик 68 яшлиқ бир кишиниң лагерға әкетилгәнликини баян қилди. Өз тәвәликидә намаз оқумаслиқни 90 пирсәнттин юқири нисбәттә омумлаштуруп болғанлиқини тилға алған йәнә бир кадир, аһалиләрни намаздин ваз кәчтүрүштә төвән турмуш капаләт пулини кесиш тәдбириниң муһим рол ойниғанлиқини әскәртти.

2016‏-Йилидики ениқлашлиримиз давамида төвән турмуш капаләт пули еливатқанларниң өйидә бикар турушқа болмайдиғанлиқи, чоқум коча сүпүрүш, һөкүмәт биналирини тазилаш қатарлиқ аталмиш «халисанә әмгәк» билән шуғуллиниши керәклики ашкариланған. Төвән капаләт пули пәқәт 200 йүән болған уйғур районида бу пулниң әң төвән еһтияҗниму қамдиялмайдиғанлиқини нәзәрдә тутқан қәшқәр аһалилири хитайниң төвән капаләт пулиға «темитқу» дәп исим қойған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.