Қәшқәр хәлқ ишлири идариси хадими: милләтләр ара той қилишқа аит учурлар дөләт мәхпийәтликигә ятиду

Мухбиримиз шөһрәт һошур
2020-08-07
Елхәт
Пикир
Share
Принт
Бир уйғур аял билән униң хитай ериниң той хетини тутуп турған көрүнүши.
Бир уйғур аял билән униң хитай ериниң той хетини тутуп турған көрүнүши.
AFP

Йеқинда иҗтимаий ахбаратларда милләтләр ара той қилиш чақириқ қилинған бир бир уйғурчә елан тарқалди. Бир һөкүмәт оргиниға аит икәнлики мәлум болған бу еланда 100 нәпәр келингә еһтияҗи барлиқи баян қилинған. Бир уйғур қизи билән бир хитай әркәкниң той мурасими көрситилгән бу елан, кәспий сәвийәдики бир диктор тәрипидин оқуп өтүлгән. Мухбиримизниң бу һәқтә елип барған ениқлашлири давамида қәшқәр шәһәрлик хәлқ ишлири идариси хадими 100 келин пиланиға аит учурларниң дөләт мәхпийәтлики ятидиғанлиқини баян қилиш арқилиқ, мәзкур еланниң қәшқәр тәвәликидә чиқирилғанлиқини дәлиллиди.

Милләтләр ара той қилишқа чақириқ қилинған вә 100 нәпәр келингә еһтияҗи барлиқи баян қилинған мәзкур елан мәхсус кәспий сәвийәдики бир диктор тәрипидин оқуп өтүлгән. Еланда бу учурни қолум-қошниларға йәткүзүш вә әтрапидикиләрни милләтләр ара той қилишқа риғбәтләндүрүш ашкара тәшәббус қилинған. Әмма еланниң һөкүмәтниң қайси оргини вә қайси бир ширкәткә тәвә икәнлики баян қилинмиған. Тордики инкасларда мәзкур еланда қалдурулған телефон номуриниң қәшқәргә аит икәнлики илгири сүрүлгән. Биз мәзкур еланни тарқатқан органни ениқлаш үчүн, қалдурулған телефон номуриға телефон қилдуқ. Бу телефон көпинчә һалларда мәшғуллуқи сәвәбидин елинмиғандин кейин қәшқәр вилайәтлик хәлқ ишлири идарисигә телефон қилдуқ. Биз мәзкур еланниң қайси орган яки ширкәткә аит икәнликини сориғинимизда, бу хадим, өзлириниң той қилғанларни тизимлашқа мәсул икәнлики, тәшвиқат ишлири билән алақиси йоқлуқини билдүрди. Биз униңдин, мәзкур елан чиққандин кейин, җәмийәттә қандақ тәсир пәйда қилғанлиқи, йәни қизиқиш қозғиған-қозғимиғанлиқини сориғинимизда, у, бу соалғиму удул җаваб бериштин өзини қачурди. У өзиниң кәспий ишларға мәсул икәнлики, той хети алғучиларни тизимлайдиғанлиқини билдүрүп, бу һәқтә ениқ җаваб беришкә салаһийәтлик әмәсликини билдүрди. Әмма у баштин ахир, 100 келин чақириқи һәққидә бир еланниң чиққанлиқини инкар қилмиди. Биз арқидин қәшқәр бойичә қанчилик кишиниң милләтләр ‘ара той қилғанлиқи һәққидики статистикилиқ мәлуматларни билмәкчи икәнликимизни баян қилғинимизда, у бу соалимизни өзи билән бир ишханида ишләватқан бөлүм мәсулиға йәткүзди. Бу хадим шу мәсулниң җаваби бойичә милләтләр ара той қилғанлар һәққидики санлиқ мәлуматларниң дөләт мәхпийәтликигә ятидиғанлиқини ашкара баян қилди.

Илгирики ениқлашлиримиз давамидиму, қәшқәрниң миша йезисида хизмәт қиливатқан бир хадим, өзлириниң уйғур яшлирини хитайлар билән той қилишқа риғбәтләндүрүватқанлиқини ашкарилиғаниди. Униң дейишичә, төвәнгә чүшкән кадирлар милләтләр иттипақлиқи тамиқи нами астида зияпәт сорунлири түзүп хитай вә уйғур яшлириниң, җүмлидин уйғур қизлири билән хитай әркәклириниң өзара учришиш вә тонушуш пурситини яритип бәргән. Әмма аңлиғучилиримиз йәткүзгән бир инкаста, бу түрдики хизмәтләрниң хотәндә қанлиқ бир вәқәгә сәһнә болғанлиқи мәлум қилинған; йәни сестра қизниң өзигә өйләнмәкчи болған хитай әркәкни сестра пичиқи билән өлтүргәнлики мәлум қилинған ; ениқлашлиримиз давамида бу қанлиқ вәқәниң болғанлиқи дәлилләнмигән болсиму, әмма қарақашниң дува йезисида бир тоқунуш йүз бәргәнлики тилға елинғаниди.

Милләтләр ара той қилишқа зорлаш уйғур районида көп қетимлап қанлиқ вәқәләрниң келип чиқишиға сәвәб болған; булардин қумулда йүз бәргән 1931-йилидики шопул вәқәси 1930‏-йилларда яртилиған шәрқи түркистан миллий азадлиқ инқилабида қозғатқуч вәқәләрдин бири болуп қалғанлиқи тарихчилар тәрипидин етирап қилинғаниди.

Пикирләр (0)
Share
Толуқ бәт