Türk xelqining Uyghurlarni qollishi künsayin kücheymekte

Ixtiyariy muxbirimiz erkin tarim
2019-12-23
Share

Uyghur mesilisining xelq'arada künsayin küchiyishige egiship türkiyening her qaysi wilayet, sheher, nahiyeliridimu xitaygha qarshi naraziliq pa'aliyetliri köpeymekte. Yéqindin buyan türkiye tarixida körülüp baqmighan shekilde nurghun kishi namayishlargha qatniship, Uyghurlargha ige chiqmaqta. Bu namayishlarda ular xitayni eyiblep, türkiye hökümitini Uyghurlargha ige chiqishqa chaqirmaqta.

Merkizi istanbuldiki insaniy yardem fondining chaqiriqi bilen birla waqitta istanbul, konya, kastamonu, qarabük, samsun, qahramanmarash, urfa we bursa qatarqliq köpligen sheherde namayish ötküzüldi.

22-Dékabir küni türkiye paytexti enqeredimu namayish ötküzüldi. Namayishqa ammiwi teshkilat mes'ulliri we enqerediki Uyghurlardin bolup köp sanda kishi ishtirak qildi. Namayishchilar xitaygha lenet oqup, sho'arlar towlidi. Türkiye hökümitini Uyghurlargha ige chiqishqa chaqirdi.

Türkiyening eng chong wilayetliridin biri bolghan konya wilayetidimu 21-22-dékabir künliri ikki chong pa'aliyet ötküzüldi. 21-Dékabir künidiki pa'aliyet toghrisidiki ziyaritimizni qobul qilghan sutuq bughraxan ilim we medeniyet weqpi konya shöbisining re'isi abdul'ehet udun ependi konya shehiridiki qilich'aslan meydanida ötküzülgen "Awazsiz nida" namliq namayishqa türklerdin sirt konyada turuwatqan 200 etrapida Uyghurningmu qatnashqanliqini, namayishqa jem'iy 5-6 ming kishining ishtirak qilghanliqini bayan qildi.

22-Dékabir yekshenbe küni oxshash yerde büyük birlik partiyesi, yeniden refah partiyesi we bezi ammiwi teshkilatlar namayish ötküzgen. Abdul'ehet udun ependi bu heqte melumat berdi.

21-22-Dékabir künliri türkiyening gherbiy-shimaligha jaylashqan qarabük wilayitining qarabük shehiridimu namayish ötküzülgen. Namayishqa qarabüktiki ammiwi teshkilat mes'ulliri, ezaliri, uniwérsitét oqughuchiliri we ammidin bolup köp sanda kishi ishtirak qilghan. Namayishta anatoliye yashlar jem'iyiti qarabük shöbisining re'isi aziz gündoghdu ependi metbu'at bayanatini oqup ötken bolup, bayanatta xitayning Uyghurlargha élip bériwatqan insan qélipidin chiqqan bésim siyasitini toxtitishqa chaqirghan. Mezkur namayishqa qatnashqan qarabük uniwérsitéti türk tili we edebiyati kespining magistir oqughuchisi wolqan erkin ependi namayish toghrisida melumat berdi.

Türkiyening sherqiy-jenubigha jaylashqan qahramanmarash shehiridimu xitaygha qarshi naraziliq pa'aliyiti ötküzülgen. 19-20-Dékabir künliri "Xitaygha lenet oqush" témisida ikki chong pa'aliyet ötküzülgen bolup, pa'aliyetke köp sanda kishi ishtirak qilghan. Mezkur sheherdiki sütchü'imam uniwérsitéti diniy ilimler kespining oqutquchisi doktor alimjan boghda ependi bu heqte melumat berdi.

Türkiyede eng köp Uyghur oqughuchilar oquwatqan sheherlerdin biri hésablinidighan bursa shehiridimu 20-dékabir küni bir kün ichide 3 pa'aliyet ötküzülgen. Yüsüp yüzlükler jem'iyiti bilen Uyghur oqughuchilar uyushmisi birlikte bursa téxnik uniwérsitétida doklat bérish yighini, yighin axirlashqandin kéyin ulugh meschitining aldida metbu'at bayanati bérish, shu küni axshimi yashlar merkizide doklat bérish yighini ötküzülgen. Bursa uludagh uniwérsitétidiki Uyghur oqughuchilarning wekili abdulqadir abdulkérim bu heqte qisqiche melumat berdi.

Xewerlerge asaslan'ghanda merkizi istanbulda turushluq insaniy yardem fondining chaqiriqigha awaz qoshup istanbulda ötküzülgen namayishqa 50 ming kishi ishtirak qilghan. Bu 2009-yili 7-ayda ürümchi qirghinchiliqigha naraziliq bildürüsh üchün istanbul chaghlayan meydanida ötküzülgen namayishtin kéyinki eng chong namayish hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet