Lagér qurbanliri yéqinliri ot apiti yüz bergen rayonlargha yardemge bardi

Ixtiyariy muxbirimiz azigh
2021-08-09
Share
Lagér qurbanliri yéqinliri ot apiti yüz bergen rayonlargha yardemge bardi
RFA/ Azigh

Lagér qurbanliri yéqinliri teripidin teshkillen'gen "Sherqi türkistan üchün anatoliye sepiri" pa'aliyiti 2-awghust küni bursa shehiride bashlan'ghanidi.
Lagér qurbanliri yéqinliri bursada élip bérilghan teshwiqat pa'aliyetliri tügigendin kiyin, türkiyediki ot apiti yüz bériwatqan rayonlargha yardem bérish meqsitide, bu rayonlargha pida'iy bolup bérishni qarar qilghan.
Bursadiki pa'aliyetlirini ayaghlashturghan lagér qurbanliri yéqinliri 7-awghust küni mula wilayitige yétip kélip, ot apitide öyliri xarab bolghan, maddiy we meniwi ziyan'gha uchrighan yerlik xelqni ziyaret qilghan.
Pa'aliyetchiler mula wilayiti köyje'iz nahiyesining pinar, sazak, bey'oba qatarliq yézilirigha bérip, yerlik xelqining arqa sep teminat xizmitige yardem bergen we yerlik xelqqe kéreklik jiddiy buyumlarni yetküzüp bergen.
"Sherqiy türkistan üchün anatoliye sepiri" pa'aliyitining teshkilligüchiliridin Uyghur kishilik hoquq pa'aliyetchisi jewlan shirmemet ependim mezkur pa'aliyetning jeryani heqqide tepsiliy melumat berdi.

IMG-20210807-WA0117.jpg
Ot apitige uchrighan yerlik türk xelqi we mezkur apetke qarshi turush üchün türkiyening herqaysi jayliridin kelgen pida'iylar Uyghur pa'aliyetchilirining yardemliri we pida'iyliq xizmetliridin qattiq tesirlen'gen. Pida'iyliq xizmiti jeryanida süretke ilin'ghan widiyolardin igilishimizche, yerlik xelq Uyghur pa'aliyetchilerge qattiq minnetdarliq körsetken we özlirining Uyghur dawasigha her waqit köngül bölidighanliqini ipadiligen.
Lagér qurbanliri yéqinliridin meghpiret emin xanim ziyaritimizni qobul qilip, pida'iyliq xizmiti jeryanida yerlik türk xelqi teripidin qizghin kütüwélin'ghanliqini, ot apitide ziyan'gha uchrighan xelqining Uyghur pa'aliyetchilerdin alahide xursen bolghanliqini, rayondiki bashqa pida'iylarning we ot öchürüsh xadimlirining Uyghur pa'aliyetchilerning xizmitidin intayin tesirlen'genlikini éytti.
Lagér qurbanliri yéqinliridin alimjan turdi ependim ziyaritimizni qobul qilip, yerlik xelqning özlirini qizghin kütüwalghanliqini, özlirining nöwette pida'iyliq xizmitini tügitip konyagha yétip kelgenlikini, "Sherqiy türkistan üchün anatoliye sepiri" pa'aliyitining ikkinchi békiti konyada Uyghur siyasiy dawasigha alaqidar teshwiqat pa'aliyitini dawamlashturidighanliqini éytti.
Türkiyening mula, antalya, marmaris qatarliq rayonlirida keng kölemlik ot apiti yüz bergen bolup, eng yéngi melumatlargha qarighanda, 12 kündin buyan dawamlishiwatqan 223 orman ot apitidin köpinchisi kontrol astigha élin'ghan. Biraq, 6 chong ot apiti hazirghiche dawamlashmaqtiken.
Mezkur ot apiti türkiyede yüz bergen eng chong ot apetliridin béri bolup, türkiyening herqaysi jayliridin kelgen pida'iylar ot öchürüsh we arqa sep teminat xizmitige yardemleshken. Közetküchiler, muhajirettiki Uyghurlarning yerlik xelq bilen bolghan munasiwitini eng yaxshi sewiyede tutup turushining, yerlik jem'iyetke maslishishi we yerlik xelqlerning aldida yaxshi obraz tiklishining Uyghur dawasining küchiyishige köp paydiliq ikenlikini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet