Түркийәдики аммиви тәшкилатлар түркийә һөкүмитини уйғурлар үчүн аваз чиқиришқа чақирди

Ихтиярий мухбиримиз арслан
2019-12-16
Share

14-Декабир күни түркийә мәмурий кадирлар уюшмисиниң истанбул шөбиси бәязит мәйданида намайиш вә ахбарат елан қилиш йиғини өткүзүп, түркийәни уйғурлар үчүн аваз чиқиришқа шундақла уйғур мәсилисини б д т да оттуриға қоюшқа чақирди.

Бу паалийәткә истанбулдики шәрқий түркистан тәшкилатлар бирлики, түрк тәшкилатлириниң мәсуллири вә истанбулда яшаватқан уйғурлар болуп, көп санда киши қатнашти.

Намайишчилар қоллирида ай-юлтузлуқ түркийә байриқи билән шәрқий түркистан байрақлирини тәң көтүргән һалда, хитайға қарши шоарлар товлиди.

Ахбарат елан қилиш йиғинида түркийә мәмурий кадирлар уюшмисиниң истанбул шөбиси рәиси рәмзи өзмән әпәнди баянат елан қилди.

Рәмзи өзмән әпәнди баянатида, мундақ деди: "хитай ишғали астида қалған шәрқий түркистан йүрикимизни ечиштуруватқан бир яридур. Бир йерим әсирдин буян зулумға учрап кәлгән, қирғинчилиққа дуч кәлгән, өйлири вә юртлиридин сүргүн қилинған қандашлиримизниң қийин әһвали түркийә вә дуняниң нәзиригә елинмиған тәқдирдә, уларниң инсаний һәқ-һоқуқлиридин сөз ечиш әсла мумкин әмәс. Хитай зулумидин қачқан муһаҗир қериндашлиримиз өз юртлиридин хәвәр елишқиму мувәппәқ болалмайватиду. Бүгүнки күндә зулумниң һәқиқий бир қирғинчилиққа айлиниватқанлиқини көрүватимиз. Шәрқий түркистанлиқларниң нәччә миң йилдин буян яшап кәлгән земини ишғал астида қалғандин сирт, йәнә уларниң әркин саяһәт қилишиму чәкләнмәктә. Туғут чәкләш сиясити билән нопус сани азайтилмақта."

Рәмзи өзмән әпәнди баянатида йәнә түркийәниң уйғур мәсилисини б д т ға көтүрүп чиқип, дәрһал һәрикәткә өтүшини тәләп қилди.

Намайиш җәрянида зияритимизни қобул қилған шәрқий түркистан маарип вә һәмкарлиқ җәмийитиниң баш катипи абдуләһәд абдурахман бу намайишниң өткүзүлүшидики сәвәбләр вә намайишта оттуриға қоюлған тәләпләр һәққидә учур бәрди.

Шуниңдин бир күн өткәндә, йәни 15-декабир йәкшәнбә күни түркийәдики әң чоң аммиви тәшкилатлардин бири болған алпәрән оҗақлири тәшкилати хитайниң истанбулдики консолханиси алдида наразилиқ намайиши елип барди

Намайишқа алпәрән тәшкилатиниң әзалири, истанбулдики уйғур тәшкилатларниң мәсуллири вә истанбулда яшаватқан уйғурлар болуп көп санда киши қатнашти. Намайишчилар қоллирида ай-юлтузлуқ көк байрақ билән түркийә байрақлирини егиз көтүргән һалда деңиз бойидин хитай консолханиси алдиғичә йүрүш қилди. Йолбойи һәйвәт билән хитайға қарши шоар товлап маңди.

Намайиш җәрянида баянат елан қилинди. Мәзкур баянатни алпәрән оҗақлири тәшкилатиниң истанбул шөбиси рәиси наил гүн әпәнди оқуди.

Наил гүн әпәнди баянатида мунуларни билдүрди: "бүгүнки күндә шәрқий түркистан хәлқи тарихта көрүлүп бақмиған еғир зулумларға шаһит болуватиду. Коммунист хитай һазир шәрқий түркистанда тарихта мисли көрүлмигән бастуруш вә зулумларни елип бармақта. Шәрқий түркистанда әзан оқуш чәкләнди, мәсчитләр чеқилди, мусулманларниң рози тутуши чәкләнди. Һазир шәрқий түркистанда рәсмий рәқәмләргә көрә бир милйон, ғәйри-рәсмий мәнбәләргә көрә үч милйондин көп мусулман түрк қериндашлиримиз хитайниң йиғивелиш лагерлирида тутуп турулмақта. Уларниң инсанлиқ иззәт-абруйи, иппәт номуслири аяғ асти қилинмақта. Әгәр ислам дуняси мусулман издәйдиған болса шәрқий түркистанлиқлар мусулмандур. Әгәр түрк дуняси түрк издәйдиған болса шәрқий түркистан хәлқи түрктур. Әгәр инсанлар инсан издәйдиған болса шәрқий түркистанлиқлар инсандур."

Наил гүн әпәнди баянатида йәнә түркийә хәлқи вә һөкүмитини уйғурларни қоллашқа чақириқ қилди. У "биз алпәрән түрк яшлири болуш сүпитимиз билән тарихтин буян зулумға сүкүт қилмидуқ, буниңдин кейинму һәргиз сүкүт қилмаймиз," деди.

Намайиш җәрянида яшлар тәрипидин мәшәл йеқилди, хитай байриқи көйдүрүлүп, хитайға қарши шоарлар товланди. Намайишчилар хитай консулханиси алдида сақчилар қурған тосуқни бөсүп өтүшкә урунди. Әмма бир қанчә минутлуқ тиркишишләрдин кейин пәскойға чүшти.

Зияритимизни қобул қилған адил ишан бу қетимлиқ намайишниң аҗайип һәйвәтлик түстә елип берилғанлиқини, йеқиндин буян мушу хилдики намайиш вә паалийәтләрниң көпләп уюштурулуватқанлиқини, буниң түркийә хәлқигә вә һөкүмитигә чоқум тәсир көрситидиғанлиқини тәкитләп өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт