Türkiyediki ammiwi teshkilatlar türkiye hökümitini Uyghurlar üchün awaz chiqirishqa chaqirdi

Ixtiyariy muxbirimiz arslan
2019-12-16
Share

14-Dékabir küni türkiye memuriy kadirlar uyushmisining istanbul shöbisi beyazit meydanida namayish we axbarat élan qilish yighini ötküzüp, türkiyeni Uyghurlar üchün awaz chiqirishqa shundaqla Uyghur mesilisini b d t da otturigha qoyushqa chaqirdi.

Bu pa'aliyetke istanbuldiki sherqiy türkistan teshkilatlar birliki, türk teshkilatlirining mes'ulliri we istanbulda yashawatqan Uyghurlar bolup, köp sanda kishi qatnashti.

Namayishchilar qollirida ay-yultuzluq türkiye bayriqi bilen sherqiy türkistan bayraqlirini teng kötürgen halda, xitaygha qarshi sho'arlar towlidi.

Axbarat élan qilish yighinida türkiye memuriy kadirlar uyushmisining istanbul shöbisi re'isi remzi özmen ependi bayanat élan qildi.

Remzi özmen ependi bayanatida, mundaq dédi: "Xitay ishghali astida qalghan sherqiy türkistan yürikimizni échishturuwatqan bir yaridur. Bir yérim esirdin buyan zulumgha uchrap kelgen, qirghinchiliqqa duch kelgen, öyliri we yurtliridin sürgün qilin'ghan qandashlirimizning qiyin ehwali türkiye we dunyaning nezirige élinmighan teqdirde, ularning insaniy heq-hoquqliridin söz échish esla mumkin emes. Xitay zulumidin qachqan muhajir qérindashlirimiz öz yurtliridin xewer élishqimu muweppeq bolalmaywatidu. Bügünki künde zulumning heqiqiy bir qirghinchiliqqa ayliniwatqanliqini körüwatimiz. Sherqiy türkistanliqlarning nechche ming yildin buyan yashap kelgen zémini ishghal astida qalghandin sirt, yene ularning erkin sayahet qilishimu cheklenmekte. Tughut cheklesh siyasiti bilen nopus sani azaytilmaqta."

Remzi özmen ependi bayanatida yene türkiyening Uyghur mesilisini b d t gha kötürüp chiqip, derhal heriketke ötüshini telep qildi.

Namayish jeryanida ziyaritimizni qobul qilghan sherqiy türkistan ma'arip we hemkarliq jem'iyitining bash katipi abdul'ehed abduraxman bu namayishning ötküzülüshidiki sewebler we namayishta otturigha qoyulghan telepler heqqide uchur berdi.

Shuningdin bir kün ötkende, yeni 15-dékabir yekshenbe küni türkiyediki eng chong ammiwi teshkilatlardin biri bolghan alp'eren ojaqliri teshkilati xitayning istanbuldiki konsolxanisi aldida naraziliq namayishi élip bardi

Namayishqa alp'eren teshkilatining ezaliri, istanbuldiki Uyghur teshkilatlarning mes'ulliri we istanbulda yashawatqan Uyghurlar bolup köp sanda kishi qatnashti. Namayishchilar qollirida ay-yultuzluq kök bayraq bilen türkiye bayraqlirini égiz kötürgen halda déngiz boyidin xitay konsolxanisi aldighiche yürüsh qildi. Yolboyi heywet bilen xitaygha qarshi sho'ar towlap mangdi.

Namayish jeryanida bayanat élan qilindi. Mezkur bayanatni alp'eren ojaqliri teshkilatining istanbul shöbisi re'isi na'il gün ependi oqudi.

Na'il gün ependi bayanatida munularni bildürdi: "Bügünki künde sherqiy türkistan xelqi tarixta körülüp baqmighan éghir zulumlargha shahit boluwatidu. Kommunist xitay hazir sherqiy türkistanda tarixta misli körülmigen basturush we zulumlarni élip barmaqta. Sherqiy türkistanda ezan oqush cheklendi, meschitler chéqildi, musulmanlarning rozi tutushi cheklendi. Hazir sherqiy türkistanda resmiy reqemlerge köre bir milyon, gheyri-resmiy menbelerge köre üch milyondin köp musulman türk qérindashlirimiz xitayning yighiwélish lagérlirida tutup turulmaqta. Ularning insanliq izzet-abruyi, ippet nomusliri ayagh asti qilinmaqta. Eger islam dunyasi musulman izdeydighan bolsa sherqiy türkistanliqlar musulmandur. Eger türk dunyasi türk izdeydighan bolsa sherqiy türkistan xelqi türktur. Eger insanlar insan izdeydighan bolsa sherqiy türkistanliqlar insandur."

Na'il gün ependi bayanatida yene türkiye xelqi we hökümitini Uyghurlarni qollashqa chaqiriq qildi. U "Biz alp'eren türk yashliri bolush süpitimiz bilen tarixtin buyan zulumgha süküt qilmiduq, buningdin kéyinmu hergiz süküt qilmaymiz," dédi.

Namayish jeryanida yashlar teripidin mesh'el yéqildi, xitay bayriqi köydürülüp, xitaygha qarshi sho'arlar towlandi. Namayishchilar xitay konsulxanisi aldida saqchilar qurghan tosuqni bösüp ötüshke urundi. Emma bir qanche minutluq tirkishishlerdin kéyin peskoygha chüshti.

Ziyaritimizni qobul qilghan adil ishan bu qétimliq namayishning ajayip heywetlik tüste élip bérilghanliqini, yéqindin buyan mushu xildiki namayish we pa'aliyetlerning köplep uyushturuluwatqanliqini, buning türkiye xelqige we hökümitige choqum tesir körsitidighanliqini tekitlep ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet