Түркийәдики уйғурлар шәрқий түркистан җумһурийәт байримини тәбриклиди

Ихтиярий мухбиримиз азиғ
2021-11-12
Share
Түркийәдики уйғурлар шәрқий түркистан җумһурийәт байримини тәбриклиди Икки қетимлиқ шәрқий түркистан җумһурийитини хатириләш мунасивити билән истанбул силивридики “оқу уйғур билик” мәктипидә өткүзүлгән җумһурийәт байримини тәбрикләш паалийити. 2021-Йили 12-ноябир, түркийә.
RFA/Azigh

12-Ноябир күни 1933-йили вә 1944-йили қурулған икки қетимлиқ шәрқий түркистан җумһурийитини хатириләш мунасивити билән истанбул силивридики “оқу уйғур билиг” мәктипидә җумһурийәт байримини тәбрикләш паалийити өткүзүлди.

Паалийәткә уйғур оқуғучилар вә уйғур җамаити болуп, 500 гә йеқин киши қатнашти. Һәрбийчә вә канвай көйнәк кийгән 75 оқуғучи параттин өтти.

Паалийәткә йәнә түркийәдики уйғур җамаәт әрбаблири, уйғур пуқрави тәшкилатларниң мәсуллири вә зиялийлар қатнашти. Оқуғучилар шәрқий түркистан җумһурийәт байримини хатириләш паалийитидә ай-юлтузлуқ көк байрақ чиқарди. Зиялийлар вә җамаәт әрбаблири шәрқий түркистан җумһурийәт байриминиң әһмийити тоғрисида оқуғучиларға мәлумат бәрди.

Икки қетимлиқ шәрқий түркистан җумһурийитини хатириләш мунасивити билән истанбул силивридики “оқу уйғур билик” мәктипидә  өткүзүлгән җумһурийәт байримини тәбрикләш паалийити. 2021-Йили 12-ноябир, түркийә.

“оқу уйғур билиг” мәктипиниң мудири һәбибулла көсән әпәнди зияритимизни қубул қилип, мәзкур паалийәт һәққидә тәпсилий мәлумат бәрди.

“оқу уйғур билиг” мәктипиниң 7-синип оқуғучиси мухтида тохти зияритимизни қубул қилип, паалийәт һәққидики өз тәсиратини биз билән ортақлашти.

Униңдин башқа бүгүн йәнә лагер тутқунлириниң уруқ-туғқанлири хитайниң истанбулдики консулханисиниң алдида икки җумһурийәтни хатириләш мунасивити билән намайиш паалийити өткүзди. Паалийәткә хитайниң йиғивелиш лагерлириға вә түрмилиригә соланған уйғурларниң уруқ-туғқанлири қатнашқан болуп, бу паалийәттә символлуқ шәкилдә ай-юлтузлуқ көк байрақ чиқирилған вә шәрқий түркистан миллий марши оқулған. Паалийәтчиләр паалийәт давамида хитай һөкүмитидин йиғивелиш лагериға вә түрмиләргә қамалған қериндашлири һәққидә мәлумат беришни вә уйғурларға йүргүзүватқан қирғинчилиқ сияситини тохтитишни тәләп қилған.

Паалийәткә қатнашқучилардин абдуқадир осман зәрәпшан әпәнди зияритимизни қубул қилип, хитай дипломатик органлири алдида давамлашқан мәзкур паалийәтниң “милләт нөвәттә” һәрикитини тәшкиллигән җәвлан ширмәмәт, мирзәхмәт илясоғли, бурһан сейит қатарлиқ авангартларниң тиришчанлиқи сайисидә башланғанлиқини, мәзкур паалийәтниң пүтүнләй хәлқ тәрипидин тәшкилләнгән бир хәлқ һәрикити икәнликини, лагер тутқунлириниң туғқанлири хитай һөкүмитидин қирғинчилиқ сияситини дәрһал тохтитип, лагер вә түрмиләргә соланған уруқ-туғқанлирини шәртсиз қоюп беришини тәләп қилидиғанлиқини ейтти.

“милләт нөвәттә” һәрикити тәшкиллигән уйғур кишилик һоқуқ паалийәтчиллиридин мәдинә назими ханим зияритимизни қубул қилип, “милләт нөвәттә” һәрикити һәққидә тәпсилий мәлумат бәрди вә шәрқий түркистан җумһурийәт байримини қизғин тәбрикләйдиғанлиқини ейтти.

Уйғур диярида өткән әсирниң биринчи йеримида хитайниң қанлиқ қирғинчилиқиға қарши миллий инқилаб йүз берип, икки қетим шәрқий түркистан җумһурийити қурулған иди. Бүгүн муһаҗирәттики уйғурлар, икки җумһурийәтни шәрқий түркистанниң азадлиқ вә әркинликиниң тарихий символи дәп қарап, һәр йили дағдуғилиқ шәкилдә хатириләп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт