Türkiyediki Uyghurlar sherqiy türkistan jumhuriyet bayrimini tebriklidi

Ixtiyariy muxbirimiz azigh
2021.11.12
Share on WhatsApp
Share on WhatsApp
Türkiyediki Uyghurlar sherqiy türkistan jumhuriyet bayrimini tebriklidi Ikki qétimliq sherqiy türkistan jumhuriyitini xatirilesh munasiwiti bilen istanbul siliwridiki “Oqu Uyghur bilik” mektipide ötküzülgen jumhuriyet bayrimini tebriklesh pa'aliyiti. 2021-Yili 12-noyabir, türkiye.
RFA/Azigh

12-Noyabir küni 1933-yili we 1944-yili qurulghan ikki qétimliq sherqiy türkistan jumhuriyitini xatirilesh munasiwiti bilen istanbul siliwridiki “Oqu Uyghur bilig” mektipide jumhuriyet bayrimini tebriklesh pa'aliyiti ötküzüldi.

Pa'aliyetke Uyghur oqughuchilar we Uyghur jama'iti bolup, 500 ge yéqin kishi qatnashti. Herbiyche we kanway köynek kiygen 75 oqughuchi parattin ötti.

Pa'aliyetke yene türkiyediki Uyghur jama'et erbabliri, Uyghur puqrawi teshkilatlarning mes'ulliri we ziyaliylar qatnashti. Oqughuchilar sherqiy türkistan jumhuriyet bayrimini xatirilesh pa'aliyitide ay-yultuzluq kök bayraq chiqardi. Ziyaliylar we jama'et erbabliri sherqiy türkistan jumhuriyet bayrimining ehmiyiti toghrisida oqughuchilargha melumat berdi.

Ikki qétimliq sherqiy türkistan jumhuriyitini xatirilesh munasiwiti bilen istanbul siliwridiki “Oqu Uyghur bilik” mektipide  ötküzülgen jumhuriyet bayrimini tebriklesh pa'aliyiti. 2021-Yili 12-noyabir, türkiye.

“Oqu Uyghur bilig” mektipining mudiri hebibulla kösen ependi ziyaritimizni qubul qilip, mezkur pa'aliyet heqqide tepsiliy melumat berdi.

“Oqu Uyghur bilig” mektipining 7-sinip oqughuchisi muxtida toxti ziyaritimizni qubul qilip, pa'aliyet heqqidiki öz tesiratini biz bilen ortaqlashti.

Uningdin bashqa bügün yene lagér tutqunlirining uruq-tughqanliri xitayning istanbuldiki konsulxanisining aldida ikki jumhuriyetni xatirilesh munasiwiti bilen namayish pa'aliyiti ötküzdi. Pa'aliyetke xitayning yighiwélish lagérlirigha we türmilirige solan'ghan Uyghurlarning uruq-tughqanliri qatnashqan bolup, bu pa'aliyette simwolluq shekilde ay-yultuzluq kök bayraq chiqirilghan we sherqiy türkistan milliy marshi oqulghan. Pa'aliyetchiler pa'aliyet dawamida xitay hökümitidin yighiwélish lagérigha we türmilerge qamalghan qérindashliri heqqide melumat bérishni we Uyghurlargha yürgüzüwatqan qirghinchiliq siyasitini toxtitishni telep qilghan.

Pa'aliyetke qatnashquchilardin abduqadir osman zerepshan ependi ziyaritimizni qubul qilip, xitay diplomatik organliri aldida dawamlashqan mezkur pa'aliyetning “Millet nöwette” herikitini teshkilligen jewlan shirmemet, mirzexmet ilyasoghli, burhan séyit qatarliq awan'gartlarning tirishchanliqi sayiside bashlan'ghanliqini, mezkur pa'aliyetning pütünley xelq teripidin teshkillen'gen bir xelq herikiti ikenlikini, lagér tutqunlirining tughqanliri xitay hökümitidin qirghinchiliq siyasitini derhal toxtitip, lagér we türmilerge solan'ghan uruq-tughqanlirini shertsiz qoyup bérishini telep qilidighanliqini éytti.

“Millet nöwette” herikiti teshkilligen Uyghur kishilik hoquq pa'aliyetchilliridin medine nazimi xanim ziyaritimizni qubul qilip, “Millet nöwette” herikiti heqqide tepsiliy melumat berdi we sherqiy türkistan jumhuriyet bayrimini qizghin tebrikleydighanliqini éytti.

Uyghur diyarida ötken esirning birinchi yérimida xitayning qanliq qirghinchiliqigha qarshi milliy inqilab yüz bérip, ikki qétim sherqiy türkistan jumhuriyiti qurulghan idi. Bügün muhajirettiki Uyghurlar, ikki jumhuriyetni sherqiy türkistanning azadliq we erkinlikining tarixiy simwoli dep qarap, her yili daghdughiliq shekilde xatirilep kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.