“шәрқий түркистан йеңи нәсил һәрикити” қурулғанлиқиниң 4 йиллиқини тәбрикләш паалийити өткүзүлди

Ихтиярий мухбиримиз арслан
2022-03-16
Share
“шәрқий түркистан йеңи нәсил һәрикити” қурулғанлиқиниң 4 йиллиқини тәбрикләш паалийити өткүзүлди “шәрқий түркистан йеңи нәсил һәрикити” қурулғанлиқиниң 4 йиллиқини тәбрикләш паалийитидин көрүнүш. 2022-Йили 15-март, түркийә.
RFA/Arslan

15-Март сәйшәнбә күни мәркизи истанбулдики “шәрқий түркистан йеңи нәсил һәрикити” тәшкилати қурулғанлиқиниң 4 йиллиқини тәбрикләш мунасивити билән “дәвр йолидики яшлар” намлиқ мәхсус паалийәт өткүзүлди.

Мәзкур паалийәткә “шәрқий түркистан йеңи нәсил һәрикити” тәшкилатиниң мәсуллири вә әзалири, хәлқара шәрқий түркистан тәшкилатлар бирликиниң мәсуллири вә әзалири, шундақла истанбулда яшаватқан уйғур җамаитидин көп санда киши қатнашти.

Паалийәттә яшларни көпләп йетиштурушниң муһимлиқи, яшларниң шәрқий түркистан дәвасиға игә чиқиш керәклики тәкитләнди.

Мәзкур паалийәтниң ечилиш мурасими қуран кәрим тилавитидин кейин, түркийә вә шәрқий түркистанниң истиқлал маршлирини оқуш билән башланди.

“шәрқий түркистан йеңи нәсил һәрикити” қурулғанлиқиниң 4 йиллиқини тәбрикләш паалийитидә хәлқара шәрқий түркистан тәшкилатлар бирликиниң рәиси һидайәтулла оғузхан сөздә. 2022-Йили 15-март, түркийә.
“шәрқий түркистан йеңи нәсил һәрикити” қурулғанлиқиниң 4 йиллиқини тәбрикләш паалийитидә хәлқара шәрқий түркистан тәшкилатлар бирликиниң рәиси һидайәтулла оғузхан сөздә. 2022-Йили 15-март, түркийә.
RFA/Arslan

Мурасимда “шәрқий түркистан йеңи нәсил һәрикити” ниң рәиси доктурант абдусалам тәклимакан ечилиш сөзи сөзлиди. У сөзидә, “шәрқий түркситан йеңи нәсил һәрикити” тәшкилатиниң төт йил илгири йәттә киши билән қурулғанлиқини, һазир әзасиниң 200 гә йәткәнликини билдүрди. У тәшкилат әзалириниң бир тәрәптин универистетларда оқуп өзини йетиштүриватқан болса, йәнә бир тәрәптин шәрқий түркситан дәваси үчүн актип хизмәт қиливатқанлиқини, йәни өзлири оқуватқан мәктәпләрдә яки ишләватқан хизмәт орунлирида уйғурлар вә шәрқий түркситан мәсилисини тонуштуруп келиватқанлиқини билдүрди.

Арқидин “шәрқий түркситан йеңи нәсил һәрикити” тәшкилатиниң төт йилдин буян елип барған хизмәт-паалийәтлири вә қолға кәлтүрүлгән нәтиҗилири тоғрисида тәйярланған мәхсус һөҗҗәтлик филим көрситилди.

Мурасимда йәнә шәрқий түркситан маарип вә һәмкарлиқ җәмийти, шундақла хәлқара шәрқий түркситан тәшкилатлар бирликиниң рәиси һидайәтуллаһ оғузхан сөз қилди. У сөзидә “шәрқий түркистан йеңи нәсил һәрикити” ни паалийәтлирини изчил һалда қоллап келиватқанлиқини, шәрқий түркситан дәвасиға лайиқ хизмәт қилалайдиған йеңи әвлад яш избасарларни тәрбийәләп йетиштүрүшниң интайин муһимлиқини тәкитләп өтти.

Арқидин шәрқий түркистан өлималар бирликиниң рәиси доктур атавуллаһ шаһяр сөз қилди. У, шәрқий түркистан дәваси сепидә яшларниң йәнила йетәрлик әмәсликини, шуңлашқа дәва сепидики яшларни көпләп йетиштүрүшниң зөрүрлүкини, яшларниң зеһнини вә вақтини өзини йетиштүрүшкә, тәрәққий қилдурушқа қаритиши керәкликини тәкитлиди.

Бу паалийәткә қатнашқан түркийәниң сабиқ парламент әзаси доктор җәлал әрбайму сөз қилди. У, кәлгүсиниң яшларға мәнсуп икәнликини, дәва сепидики от йүрәк яшларниң тиришчанлиқи билән шәрқий түркистан байриқиниң һаман бир күни шәрқий түркистан асминида ләпилдәйдиғанлиқиға ишинидиғанлиқини билдүрди.

Мурасимда сөз қилған шәрқий түркистан яшлар вә мәдәнийәт җәмийитиниң қурғучиси тибәт йүҗә түрк сөз қилип, яшларниң шәрқий түркистан дәвасиға варислиқ қилиши үчүн чоқум өзини бу саһәдә йетилдүрүши керәкликини тәкитлиди.

Тәшкилат вәкиллириниң сөзлири ахирлашқандин кейин, “шәрқий түркистан йеңи нәсил һәрикити” тәшкилатиниң баш катипи абдуллаһ абдураһман, тәшкилатиниң хизмәт-паалийәтлиридин доклат бәрди вә кәлгүси хизмәт пиланини тонуштуруп өтти.

Мурасимда яш қиз-оғуллар арқа-арқидин сәһнигә чиқип, һәр хил темиларда шеир декламатсийә қилди, яшларға мунасивәтлик тәсирлик мақалиләрни оқуди.

Мурасим ахирида “шәрқий түркистан йеңи нәсил һәрикити” тәшкилатиниң актип әзалиридин абдусәми хотән, мәрдан уйғур қатарлиқ 20 нәччә яшқа мукапат берилди, уларға хатирә буюм тәқдим қилинди.

Игилинишичә, “шәрқий түркистан йеңи нәсил һәрикити” әслидә истанбулдики шәрқий түркситан маарип вә һәмкарлиқ җәмийитиниң яшлар бөлүми сүпитидә паалийәт елип бериватқан болуп, 2018-йили истанбул валийлиқи иҗтимаий тәшкилатлар идариси тәрипидин рәсми ройхәткә елинип, қанунлуқ мустәқил тәшкилатқа айланған. Бу тәшкилат һазир бир тәрәптин түркийәдики уйғур яшларни оқу-оқутуш, йетиштуруш ишилири билән шуғулланса, йәнә бир тәрәптин уйғурлар мәсилисини тонуштуруп һәр хил-паалийәт уюштуруп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт