“Sherqiy türkistan yéngi nesil herikiti” qurulghanliqining 4 yilliqini tebriklesh pa'aliyiti ötküzüldi

Ixtiyariy muxbirimiz arslan
2022-03-16
Share
“Sherqiy türkistan yéngi nesil herikiti” qurulghanliqining 4 yilliqini tebriklesh pa'aliyiti ötküzüldi “Sherqiy türkistan yéngi nesil herikiti” qurulghanliqining 4 yilliqini tebriklesh pa'aliyitidin körünüsh. 2022-Yili 15-mart, türkiye.
RFA/Arslan

15-Mart seyshenbe küni merkizi istanbuldiki “Sherqiy türkistan yéngi nesil herikiti” teshkilati qurulghanliqining 4 yilliqini tebriklesh munasiwiti bilen “Dewr yolidiki yashlar” namliq mexsus pa'aliyet ötküzüldi.

Mezkur pa'aliyetke “Sherqiy türkistan yéngi nesil herikiti” teshkilatining mes'ulliri we ezaliri, xelq'ara sherqiy türkistan teshkilatlar birlikining mes'ulliri we ezaliri, shundaqla istanbulda yashawatqan Uyghur jama'itidin köp sanda kishi qatnashti.

Pa'aliyette yashlarni köplep yétishturushning muhimliqi, yashlarning sherqiy türkistan dewasigha ige chiqish kérekliki tekitlendi.

Mezkur pa'aliyetning échilish murasimi qur'an kerim tilawitidin kéyin, türkiye we sherqiy türkistanning istiqlal marshlirini oqush bilen bashlandi.

“Sherqiy türkistan yéngi nesil herikiti” qurulghanliqining 4 yilliqini tebriklesh pa'aliyitide xelq'ara sherqiy türkistan teshkilatlar birlikining re'isi hidayetulla oghuzxan sözde. 2022-Yili 15-mart, türkiye.
“Sherqiy türkistan yéngi nesil herikiti” qurulghanliqining 4 yilliqini tebriklesh pa'aliyitide xelq'ara sherqiy türkistan teshkilatlar birlikining re'isi hidayetulla oghuzxan sözde. 2022-Yili 15-mart, türkiye.
RFA/Arslan

Murasimda “Sherqiy türkistan yéngi nesil herikiti” ning re'isi dokturant abdusalam teklimakan échilish sözi sözlidi. U sözide, “Sherqiy türksitan yéngi nesil herikiti” teshkilatining töt yil ilgiri yette kishi bilen qurulghanliqini, hazir ezasining 200 ge yetkenlikini bildürdi. U teshkilat ezalirining bir tereptin uniwéristétlarda oqup özini yétishtüriwatqan bolsa, yene bir tereptin sherqiy türksitan dewasi üchün aktip xizmet qiliwatqanliqini, yeni özliri oquwatqan mekteplerde yaki ishlewatqan xizmet orunlirida Uyghurlar we sherqiy türksitan mesilisini tonushturup kéliwatqanliqini bildürdi.

Arqidin “Sherqiy türksitan yéngi nesil herikiti” teshkilatining töt yildin buyan élip barghan xizmet-pa'aliyetliri we qolgha keltürülgen netijiliri toghrisida teyyarlan'ghan mexsus höjjetlik filim körsitildi.

Murasimda yene sherqiy türksitan ma'arip we hemkarliq jem'iyti, shundaqla xelq'ara sherqiy türksitan teshkilatlar birlikining re'isi hidayetullah oghuzxan söz qildi. U sözide “Sherqiy türkistan yéngi nesil herikiti” ni pa'aliyetlirini izchil halda qollap kéliwatqanliqini, sherqiy türksitan dewasigha layiq xizmet qilalaydighan yéngi ewlad yash izbasarlarni terbiyelep yétishtürüshning intayin muhimliqini tekitlep ötti.

Arqidin sherqiy türkistan ölimalar birlikining re'isi doktur atawullah shahyar söz qildi. U, sherqiy türkistan dewasi sépide yashlarning yenila yéterlik emeslikini, shunglashqa dewa sépidiki yashlarni köplep yétishtürüshning zörürlükini, yashlarning zéhnini we waqtini özini yétishtürüshke, tereqqiy qildurushqa qaritishi kéreklikini tekitlidi.

Bu pa'aliyetke qatnashqan türkiyening sabiq parlamént ezasi doktor jelal erbaymu söz qildi. U, kelgüsining yashlargha mensup ikenlikini, dewa sépidiki ot yürek yashlarning tirishchanliqi bilen sherqiy türkistan bayriqining haman bir küni sherqiy türkistan asminida lepildeydighanliqigha ishinidighanliqini bildürdi.

Murasimda söz qilghan sherqiy türkistan yashlar we medeniyet jem'iyitining qurghuchisi tibet yüje türk söz qilip, yashlarning sherqiy türkistan dewasigha warisliq qilishi üchün choqum özini bu sahede yétildürüshi kéreklikini tekitlidi.

Teshkilat wekillirining sözliri axirlashqandin kéyin, “Sherqiy türkistan yéngi nesil herikiti” teshkilatining bash katipi abdullah abdurahman, teshkilatining xizmet-pa'aliyetliridin doklat berdi we kelgüsi xizmet pilanini tonushturup ötti.

Murasimda yash qiz-oghullar arqa-arqidin sehnige chiqip, her xil témilarda shé'ir déklamatsiye qildi, yashlargha munasiwetlik tesirlik maqalilerni oqudi.

Murasim axirida “Sherqiy türkistan yéngi nesil herikiti” teshkilatining aktip ezaliridin abdusemi xoten, merdan Uyghur qatarliq 20 nechche yashqa mukapat bérildi, ulargha xatire buyum teqdim qilindi.

Igilinishiche, “Sherqiy türkistan yéngi nesil herikiti” eslide istanbuldiki sherqiy türksitan ma'arip we hemkarliq jem'iyitining yashlar bölümi süpitide pa'aliyet élip bériwatqan bolup, 2018-yili istanbul waliyliqi ijtima'iy teshkilatlar idarisi teripidin resmi royxetke élinip, qanunluq musteqil teshkilatqa aylan'ghan. Bu teshkilat hazir bir tereptin türkiyediki Uyghur yashlarni oqu-oqutush, yétishturush ishiliri bilen shughullansa, yene bir tereptin Uyghurlar mesilisini tonushturup her xil-pa'aliyet uyushturup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet