Türkiyediki Uyghurlar: “Rozi héyitni weten séghinishi ichide yéngi ümidler bilen ötküzüwatimiz”

Ixtiyariy muxbirimiz erkin tarim
2022.05.03
Share on WhatsApp
Share on WhatsApp
Türkiyediki Uyghurlar: “Rozi héyitni weten séghinishi ichide yéngi ümidler bilen ötküzüwatimiz” Konya shehridiki héyt namizidin chiqqan Uyghur jama'iti. 2022-Yili 2-may, konya.
RFA/Erkin Tarim

2-May küni islam dunyasining eng chong bayramliridin biri bolghan rozi héytning birinchi küni. Muhajirettiki bezi Uyghurlarning éytishiche, bu kün chet ellerde yashawatqan Uyghurlargha nisbeten mung, qayghu, séghinish gireliship kélidighan, hijran otliri yenimu küchiyidighan, shundaqla weten séghinishi ichide yéngi ümidler bilen köngüllerge teselliy béridighan kün iken.

Bu yil rozi héytta türkiyede 3 kün dem élishqa qoyup bérildi. 2020-Yilidin buyan dunyagha téz sür'ette yamrighan korona wirusi wabasi türkiyediki Uyghur jama'etchilikining normal hayatighimu zor dawalghushlarni élip kelgen idi. 5 Yildin buyan wetendiki uruq-tughqanliridin xewer alalmighan türkiyediki Uyghurlar korona wabasidin kéyin bu yil rozi héytini tunji qétim cheklimisiz ötküzmekte. Türkiyediki Uyghurlar 2-may küni, yeni düshenbe küni héyt namizini maska taqimay cheklimisiz oqughandin kéyin, öz'ara héytni tebrikliship, zeretkarliqqa bérip alemdin ötken yéqinlirining qebrisini yoqlap du'a qilishqan. Biz türkiyediki Uyghurlar köprek olturaqlashqan konya, qeyseri we enqere qatarliq jaylardiki Uyghurlarning rozi héytni ötküzüsh ehwali toghrisida melumat igiliduq. 

Enqerediki Uyghurlar rozi héyit namizini oqughandin kéyin, Uyghurlarning merhum lidiri muhemmed emin bughraning qebrisige bérip du'a qilghan. Bu heqte ziyaritimizni qobul qilghan sherqiy türkistan tetqiqat wexpining re'isi doxtur abdulkérim bughra ependi rozi héytta Uyghur jama'itining didar körüshüp öz ara héyitlashqanliqini bayan qildi.

Qeyseridiki sherqiy türkistan medeniyet we hemkarliq teshkilati bashqurush hey'itining ezasi xeyrullah efendigil ependi qeyseridiki Uyghurlarning héyt namizini türkistan meschitide oqup, milliy kéyimlirini kéyip, qérindashlirining öyliride héyit petisi qilip ötküzüwatqanliqini bayan qildi.

Türkiyening ottura rayonigha jaylashqan konya shehride 110 a'ile Uyghur barliqi melum. Undaqta, ular rozi héyitini qandaq ötküzdi? sultan satuq bughraxan wexpining konya shöbisi re'isi abdul'ehet udun ependi korona wabasidin tüpeylidin türkiyede 2 yildin buyan héyit namizi oqush bezi cheklimige uchrighan bolsimu, lékin bu yil özlirining tunji qétim cheklimisiz héyt namizi oqup, öz'ara héyit petisi qilip ötküzüwatqanliqini bayan qildi.

Türkiyening qarabük shehiridiki qarabük uniwérsitétide magistérliq oquwatqan mexmutjan erkin ependi 6 yildin buyan a'ililiri bilen alaqisining üzülüp qalghanliqini, ularning nede ikenlikidin bixewer köngli yérim halda héyt ötküzüwatqanliqini, özining birdin-bir arzusining ata-aniliri bilen jem bolup erkinlik ichide héyit ötküzüsh ikenlikini bayan qildi.

2020-Yili 3-ayning 11-küni türkiyede korona wirusi sewebidin tunji qétim bir bimar qaza qilghandin kéyin, awamning omumiyyüzlük maska taqishi shert qilin'ghan idi. Shundin bashlap, meschitlerde héyit namizi oqush cheklimige uchrighan idi. Hazir barliq cheklimiler bikar qilindi. Biz igiligen melumatlargha asaslan'ghanda, türkiyening bashqa sheherliridimu Uyghurlar opche héyt ötküzmekte iken. 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet