Профессор әхмәт биҗанәрҗиласун: “көк байрақ астидики уйғурларға әркинлик тиләймән”

Ихтиярий мухбиримиз арслан
2022.07.25
Share on WhatsApp
Share on WhatsApp
Профессор әхмәт биҗанәрҗиласун: “көк байрақ астидики уйғурларға әркинлик тиләймән” Түркийәдики тонулған түрколог, түркийә тил тәтқиқат идарисиниң сабиқ мудири профессор әхмәт биҗан әрҗиласун әпәнди. 2022-Йили июл.
Photo: RFA

Түркийәдики тонулған түрколог, түркийә тил тәтқиқат идарисиниң сабиқ мудири профессор әхмәт биҗан әрҗиласун, уйғурларға әркинлик вә хушал күнләрниң келишигә тиләкдашлиқ билдүрүп мундақ деди: “көк байрақ астидики уйғурларға әркинлик вә хушаллиқ күнләр тиләймән”.

У бу сөзләрни, 19-июл түркийәниң байбурт шәһиридә, түрк дуняси язғучилар вә сәнәтчиләр вәхпи тәрипидин уюштурулған, 24-нөвәтлик хәлқаралиқ түрк дунясиға төһпә қошқанларни мукапатлаш мурасимида баян қилди.

У сәһнигә чиқип мукапатни тапшуруп алғандин кейин сөз қилип, “түрк дуняси язғучилар вә сәнәтчиләр вәхиписиниң түрк дунясини қучақлиған логусида шәрқий түркистанниң көк байриқи ләпилдәйду, бизниң у йәргә мунасивәтлик изчил вәзипилиримиз бар, у көк байрақниң астидики уйғурларға, қазақларға, қирғизларға әркинлик вә хушаллиқ күнләр тиләш билән һәммиңларға салам вә һөрмәт билдүримән”, деди.

Ихлас хәвәр агентлиқиниң 19-июлдики хәвиридә билдүрүшичә, 24-нөвәтлик хәлқаралиқ түрк дунясиға хизмәт көрсәткәнләр мукапатини тарқитиш мурасими, түркийәниң байбурт шәһиридә өткүзүлгән болуп, мурасимда түрк билим вә мәдәнийәт саһәсигә төһпә қошқан шәхсләр дәп баһаланған, профессор, доктур, феридун ағасиоғлу җелилоф, профессор, доктур, фатиһ киришчиоғлу, профессор әхмәт биҗан әрҗиласун, профессор, доктур, алпаслан җәйлан вә т р т авази телевизийә қанилиға мукапат берилди.

Мукапат тарқитиш мурасимиға, байбурт шәһәр башлиқи һөкмү пәкмәзҗи, парламент әзаси фәтани баттал, байбурт универистети мудири профессор, доктур мутлу түркмән қатарлиқ кишиләр қатнашти вә 4 профессорға мукапатни тәқдим қилди.

Түркләрниң уйғурларға мунасивәтлик қандақ бир вәзиписи болиду? биз бу соални чөридигән асаста профессор доктур әхмәт биҗан әрҗиласун билән сөһбәт елип бардуқ.

Узун йиллар уйғурларниң тили, тарихи вә мәдәнийити, җүмлидин түркий хәлқләр тили вә мәдәнийити һәққидә тәтқиқат қилип көплигән китаб вә мақалиларни язған, түркийә вә башқа әлләрдә тәсири бар түрколог әхмәт биҗан әрҗиласун мундақ деди: “шәрқий түркистан вә у йәрдә яшаватқан түркләр бәк қийин әһвалда қалди, шу сәвәбтин әркин дунядики түркләргә вә пүтүн дунядики инсанларниң қилишқа тегишлик вәзипилири болиду. Йәни түркийә түрклири, әзәрбәйҗан түрклири һәм түрк дунясидики пүтүн түркләрниң қилишқа тегишлик вәзиписи болиду. Чүнки биз улар билән һәм дин һәм қан һәм мәдәнийәт җәһәттә қериндаш болимиз. Биз у қериндашлиримизниң у йәрдә хитай тәрипидин бесим астида қийин-қистаққа учришиға, һәм һөкүмәтләр һәм хәлқ аммиси болуш сүпитимиз билән етираз билдүрүп юқири аваз билән варқиришимиз керәк. Һөкүмәтләрниң етираз билдүрүши үчүн алди билән биз хәлқ аммиси болуш сүпитимиз билән етираз билдүрүп вақиришимиз керәк. Бизниң қилишқа тегишлик йәнә бир вәзипимиз болса пүтүн дуняда бу мәсилигә қарита җамаәт пикири пәйда қилип күнтәртипкә кәлтүрүштин ибарәт. Бу хизмәт башқа инсанлардин илгири биз түркләр вә мусулманларниң вәзиписи”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.