Һидайәтулла оғузхан: "биз һөкүмәт тәркибидики иттипақдаш партийәләрниң сүкүтини бозушқа тиришиватимиз"

Ихтиярий мухбиримиз әркин тарим
2021-08-25
Share
Һидайәтулла оғузхан: Истанбулда паалийәт елип бериватқан уйғур вәкиллири профессор доктор муса қазим ариҗан әпәнди билән учрашти. 2021-Йили 25-авғуст, әнқәрә.
RFA/Erkin Tarim

Истанбулда паалийәт елип бериватқан шәрқий түркистан тәшкилатлар бирлики һәйәтлиридин тәркиб тапқан бир һәйәт әнқәрәдә муһим учришишларни елип барди. Мәзкур һәйәт 25-авғуст күни түркийә язғучилар җәмийитиниң рәиси, иҗтимаий пәнләр университетиниң мудири профессор доктор муса қазим ариҗан әпәнди, түркийәдики әң чоң аммиви тәшкилатлардин бири болған "үлкү оҗақлири" тәшкилатиниң муавин рәиси дениз гүзәлай әпәндиләр билән учришип, түркийә һөкүмити тәркибидики иттипақдаш партийәләрдин бири болған милләтчи һәрикәт партийәсиниң хитайға қарши инкас қайтурушини тәләп қилған.

Биз бу зиярәт тоғрисида техиму тәпсилий мәлумат игиләш үчүн шәрқий түркистан тәшкилатлар бирликиниң рәиси һидайәтулла оғузхан әпәнди вә қаһраманмараштики сүтчү имам университети диний илимләр кәспиниң оқутқучиси доктор алимҗан боғда әпәндиләр билән сөһбәт елип бардуқ.

Һидайәтулла оғузхан әпәнди бу қетимқи зиярәттә "үлкү оҗақлири" тәшкилатиниң муавин рәиси дениз гүзәлай әпәнди билән көрүшүп, мәзкур тәшкилат билән милләтчи һәрикәт партийәсиниң уйғурларниң һазирқи еғир вәзийитигә қарита һәрикәткә өтүшини тәләп қилғанлиқини баян қилди.

У мундақ деди: "түркийәни идарә қиливатқан һөкүмәт билән иттипақдаш болған милләтчи һәрикәт партийәсиниң тармиқидики ‹үлкү оҗақлири' тәшкилатиниң муавин рәиси дениз гүзәлай әпәнди билән көрүштуқ. Милләтчи һәрикәт партийәси түркийәдә йилтизи наһайити чоңқур, түркий милләтләрниң ортақ қиммәт қаришини яқлайдиған бир сиясий партийә. Униң үстигә милләтчи һәрикәт партийәси һазир һөкүмәт билән иттипақдаш бир партийә болуш сүпити билән сүкүттә туруватиду. Шуңа биз уйғурлар мушундақ еғир бир вәзийәттә туруватқан бир пәйттә, бу партийәниң чоқум хитайға қарши инкас қайтуруши керәкликини тәләп қилдуқ. Түркийә һөкүмитиниң сүкүттә турувелиши тоғрисида тәпсилий тохталдуқ. Дениз гүзәлай әпәндиму бу мәсилигә көңүл бөлидиғанлиқини ейтти."

Истанбулда паалийәт елип бериватқан уйғур вәкиллири дениз гүзәлай әпәнди билән учрашти. 2021-Йили 25-авғуст, әнқәрә.
Истанбулда паалийәт елип бериватқан уйғур вәкиллири дениз гүзәлай әпәнди билән учрашти. 2021-Йили 25-авғуст, әнқәрә.

Һидайәтулла оғузхан әнқәрәдики "түрк оҗақлири" тәшкилатиниң муавин рәиси дениз гүзәлай әпәндиниң йеқинда уйғур мәсилиси бойичә бәзи йеңи қәдәмләрни басидиғанлиқини билдүргәнликини ейтти.

Түркийә язғучилар җәмийитиниң рәиси, профессор муса қазим ариҗан әпәнди 10-авғуст күни хитай дөләт рәиси ши җинпиңға хәт йезип, шәрқий түркистандики кишилик һоқуқ дәпсәндичиликиниң интайин еғир икәнликини, хитай дөлитиниң буни дәрһал тохтитиши керәкликини тәкитлигән иди. Булардин сирт түркийә язғучилар җәмийити2021-йили 7-айда "шәрқий түркистандики кишилик һоқуқ дәпсәндичилики" темисида доклат тәйярлап, явропа кишилик һоқуқ сотиға, бирләшкән дөләтләр тәшкилатиниң баш катипиға вә шималий атлантик әһди тәшкилатиниң баш катипиға әвәткән, уйғур мәсилиси тоғрисида уларни хитайни агаһландурушқа чақирған иди. Бу түркийәдики уйғурларни қаттиқ сөйүндүргән иди. Шәрқий түркистан тәшкилатлар бирликиниң рәиси һидайәтулла оғузхан әпәнди бу қетим әнқәрәгә елип берилған зиярәтниң әң муһим мәқсәтлиридин бириниң язғучилар җәмийитигә рәһмәт ейтиш вә уйғурларниң һазирқи еғир вәзийити тоғрисида йеңи тәләпләрни оттуриға қоюш болғанлиқини билдүрди.

Шәрқий түркистан тәшкилатлар бирликиниң башқуруш һәйәт әзаси доктор алимҗан боғда әпәнди 2017-йили хитай уйғурларни лагерға қамиғили башлиғандин буян түркийәдики уйғур оқуғучиларниң нурғун қийинчилиқларға дуч кәлгәнликини, түркийәдики шәрқий түркистан тәшкилатлириниң түрлүк амаллар уйғур оқуғучиларниң бәзи қейинчилиқлирини һәл қилишқа тиришип кәлгәнликини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт