Hidayetulla oghuzxan: "Biz hökümet terkibidiki ittipaqdash partiyelerning sükütini bozushqa tirishiwatimiz"

Ixtiyariy muxbirimiz erkin tarim
2021-08-25
Share
Hidayetulla oghuzxan: Istanbulda pa'aliyet élip bériwatqan Uyghur wekilliri proféssor doktor musa qazim arijan ependi bilen uchrashti. 2021-Yili 25-awghust, enqere.
RFA/Erkin Tarim

Istanbulda pa'aliyet élip bériwatqan sherqiy türkistan teshkilatlar birliki hey'etliridin terkib tapqan bir hey'et enqerede muhim uchrishishlarni élip bardi. Mezkur hey'et 25-awghust küni türkiye yazghuchilar jem'iyitining re'isi, ijtima'iy penler uniwérsitétining mudiri proféssor doktor musa qazim arijan ependi, türkiyediki eng chong ammiwi teshkilatlardin biri bolghan "Ülkü ojaqliri" teshkilatining mu'awin re'isi déniz güzelay ependiler bilen uchriship, türkiye hökümiti terkibidiki ittipaqdash partiyelerdin biri bolghan milletchi heriket partiyesining xitaygha qarshi inkas qayturushini telep qilghan.

Biz bu ziyaret toghrisida téximu tepsiliy melumat igilesh üchün sherqiy türkistan teshkilatlar birlikining re'isi hidayetulla oghuzxan ependi we qahramanmarashtiki sütchü imam uniwérsitéti diniy ilimler kespining oqutquchisi doktor alimjan boghda ependiler bilen söhbet élip barduq.

Hidayetulla oghuzxan ependi bu qétimqi ziyarette "Ülkü ojaqliri" teshkilatining mu'awin re'isi déniz güzelay ependi bilen körüshüp, mezkur teshkilat bilen milletchi heriket partiyesining Uyghurlarning hazirqi éghir weziyitige qarita heriketke ötüshini telep qilghanliqini bayan qildi.

U mundaq dédi: "Türkiyeni idare qiliwatqan hökümet bilen ittipaqdash bolghan milletchi heriket partiyesining tarmiqidiki 'ülkü ojaqliri' teshkilatining mu'awin re'isi déniz güzelay ependi bilen körüshtuq. Milletchi heriket partiyesi türkiyede yiltizi nahayiti chongqur, türkiy milletlerning ortaq qimmet qarishini yaqlaydighan bir siyasiy partiye. Uning üstige milletchi heriket partiyesi hazir hökümet bilen ittipaqdash bir partiye bolush süpiti bilen sükütte turuwatidu. Shunga biz Uyghurlar mushundaq éghir bir weziyette turuwatqan bir peytte, bu partiyening choqum xitaygha qarshi inkas qayturushi kéreklikini telep qilduq. Türkiye hökümitining sükütte turuwélishi toghrisida tepsiliy toxtalduq. Déniz güzelay ependimu bu mesilige köngül bölidighanliqini éytti."

Istanbulda pa'aliyet élip bériwatqan Uyghur wekilliri déniz güzelay ependi bilen uchrashti. 2021-Yili 25-awghust, enqere.
Istanbulda pa'aliyet élip bériwatqan Uyghur wekilliri déniz güzelay ependi bilen uchrashti. 2021-Yili 25-awghust, enqere.

Hidayetulla oghuzxan enqerediki "Türk ojaqliri" teshkilatining mu'awin re'isi déniz güzelay ependining yéqinda Uyghur mesilisi boyiche bezi yéngi qedemlerni basidighanliqini bildürgenlikini éytti.

Türkiye yazghuchilar jem'iyitining re'isi, proféssor musa qazim arijan ependi 10-awghust küni xitay dölet re'isi shi jinpinggha xet yézip, sherqiy türkistandiki kishilik hoquq depsendichilikining intayin éghir ikenlikini, xitay dölitining buni derhal toxtitishi kéreklikini tekitligen idi. Bulardin sirt türkiye yazghuchilar jem'iyiti2021-yili 7-ayda "Sherqiy türkistandiki kishilik hoquq depsendichiliki" témisida doklat teyyarlap, yawropa kishilik hoquq sotigha, birleshken döletler teshkilatining bash katipigha we shimaliy atlantik ehdi teshkilatining bash katipigha ewetken, Uyghur mesilisi toghrisida ularni xitayni agahlandurushqa chaqirghan idi. Bu türkiyediki Uyghurlarni qattiq söyündürgen idi. Sherqiy türkistan teshkilatlar birlikining re'isi hidayetulla oghuzxan ependi bu qétim enqerege élip bérilghan ziyaretning eng muhim meqsetliridin birining yazghuchilar jem'iyitige rehmet éytish we Uyghurlarning hazirqi éghir weziyiti toghrisida yéngi teleplerni otturigha qoyush bolghanliqini bildürdi.

Sherqiy türkistan teshkilatlar birlikining bashqurush hey'et ezasi doktor alimjan boghda ependi 2017-yili xitay Uyghurlarni lagérgha qamighili bashlighandin buyan türkiyediki Uyghur oqughuchilarning nurghun qiyinchiliqlargha duch kelgenlikini, türkiyediki sherqiy türkistan teshkilatlirining türlük amallar Uyghur oqughuchilarning bezi qéyinchiliqlirini hel qilishqa tiriship kelgenlikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet