Türkiyening her qaysiy jaylirida Uyghurlarni qollap pa'aliyetler dawam qilmaqta

Ixtiyari muxbirimiz arslan
2019.12.26
37-vilayet-mufti Türkiyede échilghan 37-nöwetlik wilayet muftiliri kéngesh yighinidin körünüshler. 2019-Yili 21-dékabir, antalye, türkiye
RFA/Arslan

Diyanet ishliri bashqarmisining uyushturushi bilen türkiyening antaliye shehirining alaniye rayonida 21- 24 - künliri arisida échilghan, 37-nöwetlik wilayetler muftiliri kéngesh yighinida élan qilin'ghan xulase doklatida Uyghurlarning kishilik hoquq depsendichiliklirimu tilgha élindi.

Türkiye dini ishlar bashqarmisining re'isi proféssor doktur eli erbash xulase dokilatida yemen, sherqiy türkistan, keshmir we pelestinde insanlarning her xil paji'eler bilen yashawatqanliqini bildürdi. U mundaq dédi: “Kishilik hoquq prinsiplirini depsende qilish, qiyin- qistaq, bésim, mejburlash, assimilatisiye qilish qatarliq zalimlarche pozitisiyesige qarshi wijdanliq her qandaq bir kishining  süküt qilishini tesewwur qilghili bolmaydu.”

“Altun qanat mukapati” ning sahibi mukapatni Uyghur xanim-qizliri we Uyghur balilirigha béghishlaydighanliqini bildürdi

Istanbulning béshiktash nahiyesining hakimi ünder bakan ependi alghan “Altun qanat mukapati” ni xitay zulumi astida éziliwatqan Uyghur xanim - qizlar we balilargha béghishlaydighanliqini élan qildi.

23 - Dékabér küni istanbulda “Ayallargha zorawanliq insaniyetke xiyanettur” dégen shu'ar astida uyushturulghan “Altun qanat mukapati” ni tarqitish murasimi ötküzüldi. Bu murasimgha köp sandiki meshhur kishiler qatnashqan bolup, istanbul béshiktash rayonining nahiye hakimi ünder bakan ependi  “Altun qanat mukapati” ni élish jeryanida qisqiche söz qilip, peyghember eleyhissalamning wida xutbesida sözligen “Ayallar allahning silerge qilghan amanitidur” dégen sözini neqil keltürgen. U mundaq dégen: “Ayallargha zorawanliq qilish insaniyetke xiyanettur, men bu mukapatni sherqiy türkistandiki zorawanliq we zulum astida éziliwatqan ayallar shundaqla balilargha wakaleten qobul qilimen.”

Türkiyening edirne shehride xitaygha qarshi namayish ötküzüldi

Türkiyening edirne shehride xitayning Uyghurlar üstidin yürgüziwatqan basturush siyasetlirige qarshi namayish we axbarat élan qilish pa'aliyiti élip bérildi.

24 - Dékabir küni xitayning Uyghurlar üstidin yürgüziwatqan basturush siyasetlirige qarshi edirne shehride namayish we axbarat élan qilish pa'aliyiti ötküzüldi.

Edirne shehridiki atatürk heykilining aldigha toplan'ghan ammiwiy teshkilatlarning ezaliri qollirida sherqiy türkistan we türkiye bayraqlirini kötürgen halda sarachlar yolidiki pochtixana aldighiche yürüsh qildi. Namayishqa milletchi heriker partiyisi edirne shöbisining re'isi zakir terjan, iyi (yaxshi) partiyesi edirne shöbisining re'isi ekrem demir, édirne shéhit a'ililer hemkarliq jem'iyitining re'isi faruq chéftchi, edirne muharib ghaziylar jem'iyitining re'isi exmet isma'il oghli we köp sandiki xelq ammisi qatnashti.

Namayish jeriyanida axbarat élan qilish yighini échildi. Yighinda türk ojaqliri teshkilati edirne shöbisining re'isi yaqup öz bayanatni oqup ötti. U bu namayishning meqsiti toghrisida toxtilip mundaq dédi: “Sherqiy türkistanda sistémiliq bir shekilde yürgüziliwatqan kishilik hoquq depsendichiliklerge, qirghinchliqlargha diqqet tartish üchün bu namayish orunlashturuldi.”

Yaqup öz yene mundaq dédi: “Közimizge yiraq, emma könglimizge yéqin sherqiy türkistandin yükselgen peryadlargha yüreklirimiz köyiwatidu. Xitay döliti ishghal qiliwalghan sherqiy türksitanda nechche yildin buyan sistémiliq bir shekilde qetli'am yürgüziliwatidu. Biraq bu peryadlargha insanlar qulaq salmaywatidu.”

Yaqup öz ependi sözining axirida b d t ni, sherqiy türkistanda yüz bériwatqan qetli'amlarni toxtitish üchün munasiwetlik organlarni heriketke ötküzüshke we tedbir élishqa chaqiriq qildi.

Afyonqarahisar shehiride ötküzülgen namayishta xitay zulumi toxtighiche xitay mallirini bayqut qilish chaqiriq qilindi.

Afyonqarahisarda Xitay Mallirini Bayqut Qilish Toghriliq Namayish Ötküzüldi

Afyonqarahisar ammiwiy teshkilatlar munbirining ezaliri, sherqiy türkistanda xitay iskenjilirige uchrawatqan Uyghurlarning ünsiz peryadlirini dunyagha anglitish üchün jame aldigha toplandi.

Afyonqarahisar ammiwiy teshkilatlar munbirige wakaleten bayanatni oqup ötken muhemmed özqul ependi pütkül dunyadiki wijdan igilirige xitayning sherqiy türkistanda Uyghurlar üstidin yürgüziwatqan qanunsiz basturushlirini toxtatqiche xitay mallirini bayqut qilishqa chaqiriq qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.