Türkiyede 2 Uyghur korona wirusini yengdi

Ixtiyariy muxbirimiz erkin tarim
2020-04-24
Share
hebibulla-uyghur-korona-virus.jpg Korona wirusi bilen yuqumlinip dawalinip saqayghan shirket xojayini hebibulla Uyghur ependining doxturxanidiki mezgili. 2020-Yili aprél.
RFA/Erkin Tarim

Buningdin 5 ay burun xitayning wuxen shehiride otturigha chiqqandin kéyinki 5 ay ichide pütün dunyagha tézla yamrighan korona wirusi türkiyede ghoja abdulla isimlik bir Uyghurning jénigha zamin bolghandin sirt, köp sanda Uyghurning yuqumlinishini keltürüp chiqarghan. Bularning ichidin ikki Uyghur éghir yuqumlinip, ölüm girdabidin qaytqan.

Biz korona wirusi bilen yuqumlinip dawalinip saqayghan shirket xojayini hebibulla Uyghur we istanbul küchükchekmeche rayonluq hökümette ishleydighan abduraxman qari qatarliq kishiler bilen söhbet élip barduq

Hebibulla Uyghur ependi 3-ayning 14-küni xizmet bilen türkiyening tokat wilayitige, u yerdin oghlini yoqlash üchün kastamonu wilayitige, 16-küni baliqkesir wilayitige bérip u yerde 4 kün turup, 20-mart küni saq-salamet istanbulgha qaytip kelgen. Biraq, 21-chésla etigen uning salametlikide tuyuqsiz özgirish bolushqa bashlighan. Hebibulla Uyghur ependi bu jeryan toghrisida bizge melumat berdi.

Hebibulla Uyghur ependining éytishiche 21-mart küni tuyuqsiz qizitmisi örlep, köngli éliship, belghem tükürüp, béshi qéyip qattiq yötilip bolalmay, doxturxanigha bérip tekshürtse korona wirusidin yuqumlan'ghini melum bolghan.

Melum bolghinidek korona wirusi yéngi peyda bolghan bolghachqa téxi dorisi ishlep chiqirilmighan. Hebibulla Uyghur ependi 4-ayning 3-küni doxturxanida yatqan bolup, 5-6 kün qattiq qiynalghan. Doxturlarmu ümidini üzgen bolsimu 7-künidin tartip yaxshilinishqa bashlighan.

Hebibulla Uyghur ependi yene ayali we balisiningmu yuqumlinip saqayghanliqini, singlisining doxturxanigha tamaq apirip bérimen dep korona wirusi bilen yuqumlan'ghanliqini, singlisining téxigiche doxturxanida dawaliniwatqanliqini bayan qildi.

Undaqta yuqumlan'ghanliqini bayqighan kishiler qandaq qilishi kérek? hebibulla Uyghur ependi yuqumlan'ghanliqini bilgen haman soghuq qanliq bilen derhal doxturxanigha bérishi, yaxshi tamaq yep rohi-keypiyatini yuqiri tutushi kéreklikini, shundaq qilghandila korona wirusini yenggili bolidighanliqini bayan qildi.

Hebibulla Uyghur ependi yuqumlinishtin saqlinish üchün hazirche öydin talagha chiqmay olturush, bashqilar bilen bolghan ariliqni uzaq qoyush kéreklikini bayan qildi.

Korona wirusini yenggen Uyghurlardin yene biri bolsa abduraxman qarimdur. Istanbul küchükchekmeche rayonluq hökümetke qarashliq ijtima'iy hemkarliq fondida erebche terjiman bolup ishlewatqan abduraxman qarim chet'ellik musapirlargha yardem buyumliri tarqitish jeryanida maska taqap ishligen bolsimu tuyuqsiz zukam bolghanliqini, deslepte sel qarap doxturxanigha barmay öyide dem alghanliqini, doxturxanigha barghinida korona wirustin yuqumlan'ghanliqini éytqanliqini bayan qildi.

Abduraxman qarim istanbuldiki baqirköy dölet doxturxanisida 8 kün dawalinip saqayghanliqini, her küni 15 taldin dora ichkenlikini bayan qildi.

U, deslepte korona wirusidin gumanlinip bala-chaqiliridin yiraq turghan bolghachqa, a'ilisidin héchkim yuqumlanmighan.

Türkiye-11, marttin bashlap chégralarni taqap, bu döletke kirip-chiqquchilarni tekshürüshni omumyüzlük kücheytishke bashlighanidi. Türkiye mekteplerni, türlük ijtima'iy, medeniy, tenterbiye kulublirini, ashxana, magizin we tijaret merkezlirini birdek taqidi. Arqidinla 65 yashtin yuqirilar bilen 20 yashtin kichik bolghanlarning kochigha chiqishinimu cheklidi. Hazir bolsa her hepte axirida barliq ademlerning sirtqa chiqishini cheklimekte. Türkiyede korona wirusidin ölgenlerning sani2376ge, korona wirusidin yuqumlan'ghanlarning sani 92 minggha yetken. Biz igiligen melumatlargha asaslan'ghanda 1 Uyghur ölgen, 18 Uyghur yuqumlan'ghan bolup, 8 Uyghur doxturxanilarda yétip saqayghan, 10 Uyghur öz öyliride karantin astida iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet