Хитай ташқи ишлар министириниң түркийә зиярити уйғурларниң қаттиқ қаршилиқиға учриди

Ихтиярий мухбиримиз азиғ
2021-03-25
Share
Хитай ташқи ишлар министириниң түркийә зиярити уйғурларниң қаттиқ қаршилиқиға учриди Хитай ташқи ишлар министири ваң йиниң түркийә зияритигә наразилиқ билдүрүп қилинған намайиштин көрүнүш. 2021-Йили 25-март, истанбул.
RFA/Azigh

25-Март хитай ташқи ишлар министири ваң йи әнқәрәгә йетип кәлгән болуп, түркийәдики уйғурлар истанбул вә әнқәрәдә һәр хил паалийәтләр арқилиқ хитай һөкүмитигә қаттиқ наразилиқини билдүргән.

2020-Йили 18-декабирдин етибарән хитай истанбул консулханисиниң алдида “милләт нөвәттә” паалийитини елип бериватқан лагер қурбанлири йеқинлири паалийитиниң 98-күнидә хитай ташқи ишлар министириниң түркийә зияритини әйибләп ахбарат елан қилиш йиғини өткүзди.

Йиғинға түркийәдики уйғур җамаити, кишилик һоқуқ паалийәтчилири вә ахбарат васитилири иштирак қилди. “милләт нөвәттә” паалийитидә актип рол ойнаватқан лагер қурбанлири йеқинлиридин җәвлан ширмәмәт әпәндим вә мәдинә назими ханим зияритимизни қобул қилип паалийәт һәққидә тәпсилий тохталди.

Хитай ташқи ишлар министири ваң йиниң түркийә зияритигә наразилиқ билдүрүп қилинған намайиштин көрүнүш. 2021-Йили 25-март, истанбул.

Охшаш вақитта шәрқи түркистан тәшкилатлар бирлики, дуня уйғур қурултийи, уйғур академийәси қатарлиқ 29 нопузлуқ уйғур тәшкилатиниң аваз қошуши билән истанбул баязит мәйданида ахбарат елан қилиш йиғини өткүзүлди. Йиғинға түркийәдики уйғур сиясий вә кишилик һоқуқ тәшкилатлириниң мәсуллири, җамаәт әрбаблири вә нопузлуқ ахбарат васитилири қатнашти.

Мәзкур паалийәткә қатнашқан уйғур академийәсиниң һәйәт әзалиридин муһәммәт ели әпәндим зияритимизни қобул қилип паалийәт һәққидә тәпсилий мәлумат бәрди.

Хитайниң уйғур елидики кишилик һоқуқ дәпсәндичилики вә етник қирғинчилиқ сиясити ғәрб демократик дөләтлири тәрипидин ортақ етирап қелинип кәлмәктә. Американиң австралийә, йеңи зеландийә, канада вә явропа иттипақи билән мас қәдәмдә уйғур қирғинчилиқи сәвәблик хитайға ембарго йүргүзүши вә уйғур мәсилисидә иттипақ орнитиши хитайға қарши кәскин сигнал дәп қариливатқан бүгүнкидәк күндә, хитай ташқи ишлар министириниң түркийәни зиярәт қилиши муһим сиясий мәқсәткә игә икән.

Мутәхәссисләр түркийә уйғур сияситидә, мәзкур зиярәт җәрянида һалқилиқ таллашқа дуч келиду дәп қаримақта.

Түркийә ташқи ишлар министири мәвлут чавушоғли тивиттир һесабида уйғур мәсилисидики чүшәнчә вә тәләплирини хитайниң мунасивәтлик хадимлириға йәткүзгәнликини ейтқан, бирақ уйғур мәсилиси үстидә қайси җәһәтләрдин сөһбәтләшкәнликини вә сөһбәтниң җәрянини тилға алмиған.

Хитай ишлири мутәхәссис мәмәттохти атавулла ваң йиниң түркийә зияритигә қарши орунлаштурулған наразилиқ паалийәтлириниң әһмийити вә түркийәниң уйғур сияситигә болған тәсири һәққидә көз қарашлирини баян қилди.

Хитай-түркийә мунасивәтлириниң көләңгиси астида қеливатқан уйғур мәсилиси ғәрбиниң кәскин позитсийәси түпәйли түркийә җәмийитидә қайтидин җанлинишқа башлиған болуп, көзәткүчиләр түркийәниң алдимиздики күнләрдә кәскин бир таллашқа дуч келидиғанлиқини ейтип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт