Мәрал ақшәнәр: “валибол мусабиқиси түгигичә шәрқий түркистанниң көк байриқи сәһнидә туриду”

Ихтиярий мухбиримиз әркин тарим
2022.06.07
Share on WhatsApp
Share on WhatsApp
Мәрал ақшәнәр: “валибол мусабиқиси түгигичә шәрқий түркистанниң көк байриқи сәһнидә туриду” “ийи” партийәсиниң рәиси мәрал ақшәнәр ханимниң йолйоруқи бойичә түркийә-хитай дөләт командилириниң аяллар валибол мусабиқисидә мәйданға ай юлтузлуқ көк байрақ есилған. 2022-Йили 3-июн, әнқәрә, түркийә.
RFA/Erkin Tarim

3-Июн күни түркийә пайтәхти әнқәрәдә өткүзүлгән түркийә-хитай дөләт командилириниң аяллар валибол мусабиқисидә, қурулған күндин тартип уйғурларни қоллап келиватқан өктичи партийәләрдин болған “ийи” йәни “яхши” партийәсиниң рәиси мәрал ақшәнәр ханимниң йолйоруқи бойичә мәзкур партийәниң яшлар тәшкилати әзалири, партийә рәиси мәрал ақшәнәр ханим билән бирликтә мусабиқә мәйданиға шәрқий түркистанниң ай юлтузлуқ көк байриқини есип, өзлириниң уйғурларға болған қоллишини ипадилигән.

Мәрал ақшәнәр ханим сақчиларниң байрақни еливетишиға йол қоймай, бу байрақниң мусабиқә ахирлашқичә туридиғанлиқини ейтқан.

“ийи” партийәсиниң рәиси мәрал ақшәнәр ханимниң йолйоруқи бойичә түркийә-хитай дөләт командилириниң аяллар валибол мусабиқисидә мәйданға ай юлтузлуқ көк байрақ есилған. 2022-Йили 3-июн, әнқәрә, түркийә.

Бу мусабиқини “ийи” партийәсиниң рәиси мәрал ақшәнәр ханимму нәқ мәйдандин 30 парламент әзаси олтурған җайда көргән болуп, шәрқий түркистанниң байриқи дәл у олтурған сәһнигә есилған. Мәзкур көк байрақ хитай дөләтлик аяллар командисини қоллаш үчүн кәлгән хитайлар асқан хитай байриқиниң удулида мусабиқә түгигичә турған. Биз бу һәқтә тәпсилий мәлумат игиләш үчүн көк байрақни сәһнигә асқан ийи партийәсиниң яшлар сияситигә мәсул хадими орхан әртүркмән әпәнди билән телефон сөһбити елип бардуқ. У, бу җәрян һәққидә мәлумат берип мундақ деди: “партийәмизниң рәиси валибол мәстанисидур. Әслидә бу мусабиқигә беришидики сәвәб бизниң аял валибол командисиниң хитай валибол командиси билән мусабиқигә чүшиши иди. Өткән йили рәисимиз мәрал ақшәнәр ханим ғулҗа вәқәсини хатириләп уйғурларниң мустәқиллиқ көрүшини қоллап баянат елан қилғаниди. Хитай әлчиханиси буниңға қарши твиттер арқилиқ партийәмизниң рәиси болған мәрал ақшәнәр ханимға тәһдит салғаниди. Арқидин биз ийи партийәси яшлар тәшкилати хитайниң әнқәрәдики әлчиханисиниң алдида намайиш қилип хитайға наразилиқ билдүргән идуқ. Бу мусабиқидиму уйғур қериндашлиримизниң авази болайли дедуқ”.

Орхан әртүркмән әпәнди шәрқий түркистанниң көк байриқини 30 парламент әзаси мусабиқә көрүватқан җайға асқанлиқини билдүрди. У, мундақ деди: “биз түркийә миллий валибол командиси билән хитай валибол командисиниң мусабиқә өткүзидиғанлиқини аңлап, һәм бизниң аял валибол командимизни қоллаш, һәм шәрқий түркстанлиқ қериндашлиримизниң авази болайли дәп хитай байриқиға қарши көк байрақни асайли дәп залға бардуқ. Партийәмиздин болған 30 әтрапида яш түрк байриқи чүшүрүлгән майкимизни кийип залға шәрқий түркистанниң ай юлтузлуқ көк байриқини астуқ. Рәисимиз мәрал ақшәнәр ханим 30 әтрапида парламент әзаси мусабиқә көрүватқан йәргә көк байрақни есишимизни тәләп қилди. Биз хитай байриқи есилған йәрниң дәл удулида шәрқий түркистан байриқини астуқ”.

“ийи” партийәсиниң рәиси мәрал ақшәнәр ханимниң йолйоруқи бойичә түркийә-хитай дөләт командилириниң аяллар валибол мусабиқисидә мәйданға ай юлтузлуқ көк байрақ есилған. 2022-Йили 3-июн, әнқәрә, түркийә.

Орхун әртүркмән әпәнди мәйданниң бихәтәрликини қоғдаватқан сақчилар шәрқий түркистанниң байриқини еливетишкә урунған болсиму, партийә рәиси болған мәрал ақшәнәр ханимниң мәзкур байрақниң мусабиқә давамлашқичә туридиғанлиқини дегәнликини билдүрүп мундақ деди: “биз байрақни ачқандин кейин сақчилар йенимизға келип байрақни чүшүришимизни тәләп қилди. Рәисимиз мәрал ақшәнәр ханим бизгә ‛мусабиқә түгигичә байрақ есиқлиқ туриду, бу байрақни чүшүрүшкә болмайду‚ деди. Бизму байрақни чүшүрмидуқ. Биз яшлар шәрқий түркистан байриқини есиш билән бир вақитта, ‛шәрқий түркистанлиқлар түрктур һәм мәңгү түрк пети қалиду‛, ‚биз һәр даим шәрқий түркистанлиқларниң йенида туримиз‛, ‚хитай шәрқий түркистандин чиқип кәт‛дегәндәк шоарларни товлидуқ. Буларни иҗтимаий таратқулар арқилиқ тарқаттуқ. Бу паалийәт партийәмизниң рәиси мәрал ақшәнәр ханимниң йолйоруқи билән елип берилди. Бу арқилиқ шәрқий түркистанлиқ қериндашлиримизниң авази болдуқ дәп ойлаймән”.

“ийи” партийәси рәиси болған мәрал ақшәнәр ханимниң түркийә пайтәхти әнқәрәдә өткүзүлгән түркийә-хитай дөләт командилириниң аяллар валибол мусабиқисидә көк байрақ есиши дуняниң һәр қайси җайлиридики уйғурларни қаттиқ сөйүндүрди. Д у қ рәиси долқун әйса әпәнди бу һәқтики зияритимизни қобул қилип, түркийә һөкүмити сүкүттә туривеливатқан бүгүнки күндә “яхши” партийәсиниң уйғурларниң авази болуватқанлиқини буниңға миннәтдарлиқ билдүридиғанлиқини баян қилди.

Д у қ вәхписиниң рәиси абдурешит абдулхәмит әпәнди буниң шәрқий түркистан дәвасини түрк хәлқиниң сәмигә селип туруш үчүн зор әһмийәткә игә икәнликини тәкитлиди.

3-Июн күнидики мусабиқини қоллаш үчүн хитайдин вә түркийәниң һәр қайси җайлиридин кәлгән хитайлар қоллирида хитай байриқи билән олтурған җайниң дәл удулида көк байрақ есилған болуп тамашибинлар ичидә түркийә ташқи ишлар министири мәвлут чавушоғлуму бар икән.

2002-Йили корейәдә өткүзүлгән дуня путбол мусабиқисидә түркийә миллий путбол командиси билән хитай командиси ойниған мусабиқидиму путбол мәйданиға шәрқий түркистанниң көк байриқи есилғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт