Sherqiy türkistan teshkilatlar munbiri hey'iti enqere bilen bursa shehiride muhim uchrishishlar élip bardi

Sherqiy türkistan teshkilatlar munbiri hey'iti türkiye prézidént mehkimisi tarmiqidiki chet'eldiki türkler we qérindash milletler idarisining bashliqi abdulla eren ependi(otturida) bilen. 2019-Yili 21-öktebir.

Türkiyediki Uyghurlarning nopusining köpiyishige egiship ularning qiyinchiliqlirimu köpeymekte. Bularning mesilisini hel qilish üchün istanbulda pa'aliyet élip bériwatqan sherqiy türkistan teshkilatlar munbiri re'isi hidayetulla oghuzxan bashchiliqidiki 6 kishilik hey'et enqerede muhim uchrishishlar élip bardi. Ular 21-öktebir küni aldi bilen türkiye parlaméntida hökümetni qollap kéliwatqan öktichi partiyelerdin biri bolghan milletchi heriket partiyesining türkiy milletlerge mes'ul mu'awin re'isi proféssor kamil aydin ependi bilen partiye merkizidiki ishxanisida körüshüp, Uyghurlarning qiyinchiliqliri bayan qilin'ghan yazma doklat sundi we Uyghurlarning hazirqi éghir weziyiti toghrisida melumat berdi. Sherqiy türkistan ammiwi teshkilatlar munbiri re'isi hidayet oghuzxan ependi, kamil aydin ependining hey'etni qizghin kütüwalghanliqini, qolidin kélishiche yardem qilidighanliqini dégenlikini éytti.

Arqidin sherqiy türkistan teshkilatlar munbirige eza teshkilatlarning mes'ulliridin terkib tapqan hey'et türkiye prézidént mehkimisi tarmiqidiki chet'eldiki türkler we qérindash milletler idarisining bashliqi abdulla eren ependi bilen körüshti. Abdulla eren ependining ishxanisida élip bérilghan uchrishishta uninggha Uyghur oqughuchilar duchar boluwatqan qiyinchiliqlarni hel qilip bérishi, Uyghurlarning telim-terbiye, ana til öginishi, Uyghurlarning örp-adetlirini qoghdap qélish üchün Uyghur teshkilatlirigha yardem bérishi toghrisida teleplerni otturigha qoyghan. Sherqiy türkistan ma'arip we hemkarliq teshkilati bashqurush hey'iti ezasi abdulwaris xoten ependi uchrishishning muweppeqiyetlik ötkenlikini bayan qildi.

Türkiye chet'eldiki türkler we qérindash milletler idarisi chet'eldiki türkler we türkiy milletlerdin türkiyege oqughuchi ekélip oqutuwatqan idare bolup, dunyaning her qaysi döletliride turuwatqan türkiy milletlerning ammiwi teshkilatlirigha iqtisadiy jehettin yardem bermekte. Mezkur idare hazir 350 Uyghur oqughuchisigha oqush mukapati bérip oqutmaqta. Abdulwaris xoten ependi dawamliq enqerege kélip türkiye jumhuriyitining munasiwetlik idare jem'iyetlerni ziyaret qilip Uyghurlarning hazirqi éghir weziyitini anglitish we Uyghurlarning telep-pikirlirini anglitip turushning zor ehmiyetke ige ikenlikini otturigha qoydi.

Sherqiy türkistan sultan satuq bughraxan ilim-meripet wexpe hazir 150 etrapida Uyghur oqughuchigha oqush mukapat puli bermekte. Ular her ay oxshimaydighan sheher wilayetlerge bérip Uyghur oqughuchilar bilen söhbet yighinliri ötküzüp ularning qiyinchiliqliri we telep-pikirlirini anglap ulargha maddiy we meniwi jehettin yardem bérishke tirishmaqta. Hidayet oghuzxan ependi bashchiliqidiki hey'et 20-öktebir küni Uyghur oqughuchilar eng köp uniwérsitétlardin bursadiki uludagh uniwérsitétigha bérip, Uyghur oqughuchilar bilen söhbet élip barghandin sirt, mezkur uniwérsitétning munasiwetlik rehberliri bilen uchrashqan. Hidayet oghuzxan ependi bu heqte melumat berdi.

Bursa uludagh uniwérsitétidiki Uyghur oqughuchilarning wekili abduqadir abdukérim bu ziyaretning bursadiki Uyghur oqughuchilarning maddiy we meniwi qiyinchiliqlirini hel qilish üchün paydiliq bolghanliqini tekitlidi.

Sherqiy türkistan teshkilatlar munbirige eza teshkilatlarning mes'ulliridin terkib tapqan 10 kishilik hey'et bu ayning béshida qahramanmarashtiki sütchi imam uniwérsitéti, konyadiki selchuq uniwérsitéti we kastomunidiki kastomonu uniwérsitétidiki Uyghur oqughuchilar bilen söhbet élip bérip, mektep rehberliri bilenmu uchrashqanidi.