Түркийәдики һәрқайси партийәләр истанбулдики хитай консулханиси алдиға топланған уйғур яшлирини қоллайдиғанлиқини билдүрүшти

Ихтиярий мухбиримиз әркин тарим
2021-01-08
Share
Түркийәдики һәрқайси партийәләр истанбулдики хитай консулханиси алдиға топланған уйғур яшлирини қоллайдиғанлиқини билдүрүшти Түркийә "ийи" партийәсиниң истанбулдики мәсули сатуқ буғра қавунҗу әпәнди истанбулдики хитай консулханиси алдида наразилиқ паалийити қиливатқан уйғурларниң паалийитигә қатнашти. 2021-Йили январ.
RFA/Erkin Tarim

Лагер қурбанлири аилә тавабиатлириниң из-дерикини елиш үчүн истанбулдики хитай консулханиси алдида наразилиқ паалийити қиливатқан уйғурларни қоллаш үчүн түркийәдики һәр қайсий партийә рәһбәрлири, аммивий тәшкилат мәсуллири, җамаәт әрбаплири арқа-арқидин уларниң йениға келип һал соримақта. Бу уйғур яшларниң наразилиқ паалийитигә диққәт қиливатқан ахбарат васитилириму күнсайин көпәймәктә.

Аилә әзалири хитай түрмилиригә яки йиғивелиш лагерлириға соланған түркийәдики уйғурлар 15 күндин буян изчил һалда истанбул тарабядики хитай консулханисидин аилилири һәққидә ениқ изаһат беришни тәләп қилмақта.

Түркийә келәчәк партийәсиниң муавини сәлчуқ өздағ әпәнди истанбулдики хитай консулханиси алдида наразилиқ паалийити қиливатқан уйғурлар билән. 2021-Йили январ.

Қоллирида ата-ана, уруқ-туғқанлириниң фото-сүрәтлирини көтүргән һалда истанбулдики хитай консулханиси алдида туруватқан уйғур яшлириниң паалийити түркийәдики һәр қайси партийәләрниң вә ахбарат васитилириниң диққитини қозғиғимақта. "келәчәк" партийәсиниң муавин рәиси сәлҗуқ өздағ әпәнди, "ийи" партийәсиниң истанбулдики мәсули сатуқ буғра қавунҗу әпәнди, "саадәт" партийәсиниң истанбулдики мәсули өмәр фаруқ язиҗи әпәнди һәмдә тонулған журналистлар, диний җамаәтләрниң әрбаплири вә аммивий тәшкилатларниң мәсуллири хитай консулханисиниң алдидики паалийәткә қатнишип, өзлириниң лагер қурбанлириниң паалийәтини қоллайдиғанлиқини билдүрүшмәктә.

Түркийә

Лагер қурбанлири йеқинлиридин җәвлан ширмәмәт әпәни зияритимизни қобул қилип, паалийәтниң 8-күнидин тартип түркийәдики сиясий партийәләр вә ахбарат васитилириниң зор диққитини тартишқа башлиғанлиқини баян қилди.

Җәвлан ширмәмәт әпәнди "ийи" партийәсиниң истанбулдики мәсули сатуқ буғрахан қавунҗу, "ақит" телевизйәсиниң риясәтчиси халис өздәмир әпәнди, "келәчәк" партийәси муавин рәиси сәлҗуқ өздағ әпәнди вә "саадәт" партийәсиниң рәһбәрлиридин өмәр фаруқ язиҗи әпәнди шундақла көп санда хәвәр агентлиқи вә телевизйә қаналлириниң келип өзлирини қоллайдиғанлиқини билдүргәнликини, өзлирини зиярәт қилип нәқ мәйдандин тарқатқанлиқини баян қилди.

Түркийә

5-январ күни "келәчәк" партийәсиниң муавин рәиси сәлҗуқ өздағ башчилиқидики һәйәт истанбулдики хитай әлчиханиси алдида паалийәт елип бериватқан оқуғучиларниң йениға берип, уларниң дәрдини аңлиғандин кейин мухбирларға баянат берип, мундақ дегән: "биз силәрниң йениңларда болимиз, бундақ паалийәтләр арқилиқ силәрниң авазиңлар болимиз. Силәрниң бу пәрядиңларни аллаһ аңлитиду. Худайим буйриса, бу пәрядиңларни җамаәткә аңлитимиз. Сиясәтчиләргә аңлитимиз."

Биз хитайниң истанбулдики консулханиси алдида паалийәт қиливатқан уйғурларға телефон қилип, нәқ мәйдандин мәлумат игилидуқ. Шәмсийә турсун ханим 15 күндин буян ата-аниси вә кичик аписиниң из-дирекини қилиш үчүн хитай консулханиси алдидики паалийәткә иштирак қиливатқанлиқини баян қилди.

"бу 15 күн җәрянида сизгә әң көп немә тәсир қилди?" дегән соалимизға у түркийәдики һәр қайси партийәләр вә ахбарат органлириниң һәр күни келип өзлирини қоллаватқанлиқини, буниңдин бәкла тәсирләнгәнликини баян қилди.

Истанбулдики медитсина университетиниң оқуғучиси шәмсийә ели ата-ана вә чоң тағисиниң из-дирекини қилиш үчүн бу паалийәткә қатнишиватқанлиқини билдүрди. У 2 нәпәр йәрлик түркниң өзлирини қоллаш үчүн 15-күндин буян изчил һалда әтигән келип ахшам кетиватқанлиқини баян қилди.

Аилә әзалири хитай тәрипидин тутқун қилинған түркийәдики уйғур оқуғучилар вә яшлар 18-декабирдин етибарән хитай консулханиси илтимаслирини рәсмий йосунда тапшурувалғанға вә аилилири һәққидә изаһат бәргәнгә қәдәр һәр күни консулхана алдида йиғилип, хитай һөкүмитидин җаваб күтидиғанлиқини елан қилған иди. 15 Күндин буян истанбулдики хитай консулханиси алдидики бу паалийәт техиму күчлинип давам қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт