Türkiyediki herqaysi partiyeler istanbuldiki xitay konsulxanisi aldigha toplan'ghan Uyghur yashlirini qollaydighanliqini bildürüshti

Ixtiyariy muxbirimiz erkin tarim
2021-01-08
Share
Türkiyediki herqaysi partiyeler istanbuldiki xitay konsulxanisi aldigha toplan'ghan Uyghur yashlirini qollaydighanliqini bildürüshti Türkiye "Iyi" partiyesining istanbuldiki mes'uli satuq bughra qawunju ependi istanbuldiki xitay konsulxanisi aldida naraziliq pa'aliyiti qiliwatqan Uyghurlarning pa'aliyitige qatnashti. 2021-Yili yanwar.
RFA/Erkin Tarim

Lagér qurbanliri a'ile tawabi'atlirining iz-dérikini élish üchün istanbuldiki xitay konsulxanisi aldida naraziliq pa'aliyiti qiliwatqan Uyghurlarni qollash üchün türkiyediki her qaysiy partiye rehberliri, ammiwiy teshkilat mes'ulliri, jama'et erbapliri arqa-arqidin ularning yénigha kélip hal sorimaqta. Bu Uyghur yashlarning naraziliq pa'aliyitige diqqet qiliwatqan axbarat wasitilirimu künsayin köpeymekte.

A'ile ezaliri xitay türmilirige yaki yighiwélish lagérlirigha solan'ghan türkiyediki Uyghurlar 15 kündin buyan izchil halda istanbul tarabyadiki xitay konsulxanisidin a'ililiri heqqide éniq izahat bérishni telep qilmaqta.

Türkiye kélechek partiyesining mu'awini selchuq özdagh ependi istanbuldiki xitay konsulxanisi aldida naraziliq pa'aliyiti qiliwatqan Uyghurlar bilen. 2021-Yili yanwar.

Qollirida ata-ana, uruq-tughqanlirining foto-süretlirini kötürgen halda istanbuldiki xitay konsulxanisi aldida turuwatqan Uyghur yashlirining pa'aliyiti türkiyediki her qaysi partiyelerning we axbarat wasitilirining diqqitini qozghighimaqta. "Kélechek" partiyesining mu'awin re'isi seljuq özdagh ependi, "Iyi" partiyesining istanbuldiki mes'uli satuq bughra qawunju ependi, "Sa'adet" partiyesining istanbuldiki mes'uli ömer faruq yaziji ependi hemde tonulghan zhurnalistlar, diniy jama'etlerning erbapliri we ammiwiy teshkilatlarning mes'ulliri xitay konsulxanisining aldidiki pa'aliyetke qatniship, özlirining lagér qurbanlirining pa'aliyetini qollaydighanliqini bildürüshmekte.

Türkiye

Lagér qurbanliri yéqinliridin jewlan shirmemet epeni ziyaritimizni qobul qilip, pa'aliyetning 8-künidin tartip türkiyediki siyasiy partiyeler we axbarat wasitilirining zor diqqitini tartishqa bashlighanliqini bayan qildi.

Jewlan shirmemet ependi "Iyi" partiyesining istanbuldiki mes'uli satuq bughraxan qawunju, "Aqit" téléwizyesining riyasetchisi xalis özdemir ependi, "Kélechek" partiyesi mu'awin re'isi seljuq özdagh ependi we "Sa'adet" partiyesining rehberliridin ömer faruq yaziji ependi shundaqla köp sanda xewer agéntliqi we téléwizye qanallirining kélip özlirini qollaydighanliqini bildürgenlikini, özlirini ziyaret qilip neq meydandin tarqatqanliqini bayan qildi.

Türkiye

5-Yanwar küni "Kélechek" partiyesining mu'awin re'isi seljuq özdagh bashchiliqidiki hey'et istanbuldiki xitay elchixanisi aldida pa'aliyet élip bériwatqan oqughuchilarning yénigha bérip, ularning derdini anglighandin kéyin muxbirlargha bayanat bérip, mundaq dégen: "Biz silerning yéninglarda bolimiz, bundaq pa'aliyetler arqiliq silerning awazinglar bolimiz. Silerning bu peryadinglarni allah anglitidu. Xudayim buyrisa, bu peryadinglarni jama'etke anglitimiz. Siyasetchilerge anglitimiz."

Biz xitayning istanbuldiki konsulxanisi aldida pa'aliyet qiliwatqan Uyghurlargha téléfon qilip, neq meydandin melumat igiliduq. Shemsiye tursun xanim 15 kündin buyan ata-anisi we kichik apisining iz-dirékini qilish üchün xitay konsulxanisi aldidiki pa'aliyetke ishtirak qiliwatqanliqini bayan qildi.

"Bu 15 kün jeryanida sizge eng köp néme tesir qildi?" dégen so'alimizgha u türkiyediki her qaysi partiyeler we axbarat organlirining her küni kélip özlirini qollawatqanliqini, buningdin bekla tesirlen'genlikini bayan qildi.

Istanbuldiki méditsina uniwérsitétining oqughuchisi shemsiye éli ata-ana we chong taghisining iz-dirékini qilish üchün bu pa'aliyetke qatnishiwatqanliqini bildürdi. U 2 neper yerlik türkning özlirini qollash üchün 15-kündin buyan izchil halda etigen kélip axsham kétiwatqanliqini bayan qildi.

A'ile ezaliri xitay teripidin tutqun qilin'ghan türkiyediki Uyghur oqughuchilar we yashlar 18-dékabirdin étibaren xitay konsulxanisi iltimaslirini resmiy yosunda tapshuruwalghan'gha we a'ililiri heqqide izahat bergen'ge qeder her küni konsulxana aldida yighilip, xitay hökümitidin jawab kütidighanliqini élan qilghan idi. 15 Kündin buyan istanbuldiki xitay konsulxanisi aldidiki bu pa'aliyet téximu küchlinip dawam qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet