Üch teshkilatning wekilliri enqerede muhim uchrishishlar élip bardi

Ixtiyariy muxbirimiz erkin tarim
2020-01-17
Élxet
Pikir
Share
Print
Dunya Uyghur qurultiyi, Uyghur akadémiyesi we enqerediki Uyghur instituti mes'ulliridin terkib tapqan hey'etning enqerediki muhim uchrishishliridin körünüsh. 2020-Yili 14-yanwar. Enqere, türkiye.
Dunya Uyghur qurultiyi, Uyghur akadémiyesi we enqerediki Uyghur instituti mes'ulliridin terkib tapqan hey'etning enqerediki muhim uchrishishliridin körünüsh. 2020-Yili 14-yanwar. Enqere, türkiye.
RFA/Erkin Tarim

Dunya Uyghur qurultiyi, Uyghur akadémiyesi we enqerediki Uyghur inistituti mes'ulliridin terkip tapqan hey'et türkiyede hakimiyet béshidiki adalet we tereqqiyat partiyesi mu'awin bashliqi jewdet yilmaz, öktichi partiyelerdin biri bolghan sa'adet partiyesi re'isi temel qaramolla'oghlu ependiler bilen uchriship, Uyghurlarning éghir weziyiti bayan qilin'ghan "Sherqiy türkistanda irqiy qirghinchiliq", "Sherqiy türkistanda insan heqliri depsendichiliki" namliq doklatlirini we türkiyediki Uyghurlarning qiyinchiliqi bayan qilin'ghan telep xétini sundi. Bir sa'et dawamlashqan uchrishishtin kéyin mikrofonimizni sa'adet partiyesi bashliqi temel qaramolla'oghligha uzattuq. U, mundaq dédi: "Silerning bizge melumat bergenlikinglargha söyündüm. Allah silerge yar bolsun. Heqiqeten xitay élip bériwatqan zulumni eyiblimey turalmaymiz. Bularni nezerde tutup turup hazir türkiyede iqamet bilen turuwatqan 20 ming Uyghurgha türkiye wetendashliq bérishi kéreklikini tekitleymiz. Ikkinchi bir mesile musulman döletlerning we gherip ellirining sherqiy türkistan mesiliside xitaygha bésim ishlitishi kérek."

U, xitayning sherqiy türkistandiki musulmanlargha qarita eqilgha sighmaydighan bésim siyasiti élip bériliwatqanliqigha ishinidighanliqini bayan qilip mundaq dédi: "Xitayning sherqiy türkistandiki musulmanlargha qarita éqilgha sighmaydighan bésim siyasiti élip bériliwatqanliqigha ishinimiz. Biz xitayning bu zulumini toxtitish üchün türkiyede we pütün islam dunyasida xitay mallirini bayqut qilish kérek dep oylaymiz. Gep anglimaywatqan xitaygha bu yol arqiliq gep anglatqili bolushi mumkin. Men pütün dunyadiki Uyghurlarning baldurraq bu derttin qutulushini ümid qilimen." 

Arqidin hey'et türkiye parlaméntigha bérip milletchi heriket partiyesi parlamént ezasi oljay kilawuz bilen körüshti. U, Uyghur mesilisini izchil halda parlaméntte otturigha qoyghanliqi üchün, uninggha dunya Uyghur qurultiyi bilen Uyghur akadémiyesi namidin xatire plakati teqdim qilindi. Uyghur akadémiyesi xitay tetqiqat inistituti mudiri doktor perhat qurban bu heqte melumat berdi. 

Qimmetlik radyo anglighuchilar 14-yanwar küni élip bérilghan bu uchrishishlarning hemmiside weten ichi we sirtidiki Uyghurlar toghrisida doklat sunulghan. Uyghur akadémiyesi ijra'iye re'isi abdulxemit qaraxan ependi uchrishishlarda her qaysi siyasiy partiyelerdin we parlamént ezaliridin yardem telep qilghanliqini bayan qildi.

Uyghur hey'et uchrishish élip barghan partiyelerning rehberlirining éytishiche xitay elchisi her yili 2-3 qétim bularni ziyaret qilip, Uyghur diyarini qattiq tereqqiy qilduriwatqanliqi toghrisida melumat béridiken. Undaqta bu xil ziyaretlerning ehmiyiti néme? abdulxemit qaraxan ependi bu xil uchrishishlarning ehmiyitining zor ikenlikini bayan qildi. 

Bir qanche yildin buyan dunya Uyghur qurultiyi qatarliq Uyghur teshkilatliri her qaysi döletlerdiki partiye rehberliri, hökümetliri we ammiwiy teshkilatl mesu’lliri bilen uchrishish élip bérishqa alahide ehmiyet bermekte.

Toluq bet