Лагер қурбанлири йеқинлириниң зиярәт тәлипи түркийә милләтчи һәрикәт партийәси тәрипидин рәт қилинди

Ихтиярий мухбиримиз еһсан
2021-02-17
Share
Лагер қурбанлири йеқинлириниң зиярәт тәлипи түркийә милләтчи һәрикәт партийәси тәрипидин рәт қилинди 15-Феврал лагер қурбанлири йеқинлириниң зиярәт тәлипини рәт қилған түркийә милләтчи һәрикәт партийәсиниң рәһбири дәвләт бағчәли.
Social Media

Әнқәрәдә сақчиларниң мудахилисигә учриған вә түрк хәвпсизлик хадимлири тәрипидин меһманханиға нәзәрбәнд қилинған лагер қурбанлири йеқинлири бир қанчә күндин буян сақчиларниң назарити астида бир қисим зиярәтләрдә болди.

Әнқәрәгә топланған лагер қурбанлири йеқинлири 15-феврал түрк хәвпсизлик хадимлириниң назарити астида түркийә җумһурийитиниң қурғучиси мустапа камал ататүркниң мәқбәриси аниткабирни зиярәт қилди.

Түрк хәвпсизлик хадимлири мустапа камал ататүркниң қәбрисигә қоюш үчүн һазирланған гүлниң үстидики "шәрқи түркистан лагер қурбанлири" дегән хәтни еливетишни, мәзкур хәт билән сүрәткә чүшүшниң бәлгилимиләргә хилап икәнликини билдүрүшти.

Лагер қурбанлири йеқинлиридин җәвлан ширмәмәт зияритимизни қобул қилип, әң йеңи әһваллар һәққидә мәлумат бәрди.

Лагер қурбанлири йеқинлири анткабир зияритидин кийин, мунасивәтлик тәләплирини йәткүзүш үчүн ақ партийә мәркизигә зиярәткә барди. Ақ партийәниң ташқий ишлар мудир ярдәмчиси әһмәт җәйлан лагер қурбанлири йеқинлирини қобул қилди. Мәһмәт җәйлан лагер қурбанлири йеқинлириниң дәрдлирини аңлиди вә хатирә қалдурди.

Лагер қурбанлири йеқинлири елип берилған бу зиярәтләрниң әмәлий илгириләшләргә йол ечишини үмид қилидиғанлиқини билдүрүшти. Лагер қурбанлири йеқинлиридин мәдинә назими өзлириниң ақ партийә зиярити һәққидә тохталди.

Лагер қурбанлири йеқинлири ақ партийә мәркизидин қайтип, милләтчи һәрикәт партийәсиниң мәркизи бинасиға берип мунасивәтлик хадимлар билән көрүшүшни тәләп қилди. Әпсуски, лагер қурбанлири йеқинлири милләтчи һәрикәт партийәсиниң мәркизи бинасиға киргүзүлмиди. Шундақла мунасивәтлик хадимлар тәрипидин қобул қилинмиди һәмдә уларниң көрүшүш тәлипиниң рәт қилинғанлиқи билдүрүлди.

Лагер қурбанлири йеқинлиридин мирзәхмәт иляс оғли зияритимизни қобул қилип, лагер қурбанлири йеқинлириниң милләтчи һәрикәт партийәси тәрипидин қобул қилинмиғанлиқини ейтти.

Түрк миллийәтчиликиниң симувлли дәп қаралған милләтчи һәркәт партийәсиниң уйғур вәкиллирини қубул қилмаслиқи түрк хәлқиниң қаттиқ ғәзипини қозғиған. Милләтчи һәрикәт партийәсиниң уруқ-туғқанлири хитайниң йиғивелиш лагерлириға соланған уйғурларни қобул қилмаслиқи вә көрүшүш тәлипини рәт қилиши, ахбарат васитилири вә иҗтимаий таратқуларда қаттиқ әйибләнгән.

Мәзкур вәқә милләтчи һәрикәт партийәсиниң ичидики бәзи сиясий күчләрниң қаттиқ наразилиқини қозғиған. "хәвәр әрк" ниң хәвиригә қариғанда, милләтчи һәрикәт партийәсиниң бүйүк милләт мәҗлисидики гуруппа башлиқи җәлал аднанниң контроллуқидики бәзи милләт вәкиллири әһвалдин қаттиқ нарази икән. Хәвәрдә вәзийәтниң җәлал аднан тәрипидин милләтчи һәрикәт партийәсиниң рәһбири дәвләт баһчәлигә доклат қилинидиғанлиқи ейтилған.

Лагер қурбанлири йеқинлири 18-декабир истанбулдики хитай консулханисиниң алдида "аилә нөвәттә" туруш паалийитини башлиған иди. Паалийәт 3-феврал әнқәрәдики хитай әлчиханисиниң алдиға йөткәлгән болуп, "аилә нөвәттә" паалийити "милләт нөвәттә" паалийитигә өзгәртилгән. Паалийәткә явропа, қазақистан, японийә вә америка қатарлиқ дөләт вә районлардин көпләп лагер қурбан йеқинлири аваз қошқан болуп, "милләт нөвәттә" паалийити һазир дуня миқясида елип берилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт