Lagér qurbanliri yéqinlirining ziyaret telipi türkiye milletchi heriket partiyesi teripidin ret qilindi

Ixtiyariy muxbirimiz éhsan
2021-02-17
Share
Lagér qurbanliri yéqinlirining ziyaret telipi türkiye milletchi heriket partiyesi teripidin ret qilindi 15-Féwral lagér qurbanliri yéqinlirining ziyaret telipini ret qilghan türkiye milletchi heriket partiyesining rehbiri dewlet baghcheli.
Social Media

Enqerede saqchilarning mudaxilisige uchrighan we türk xewpsizlik xadimliri teripidin méhmanxanigha nezerbend qilin'ghan lagér qurbanliri yéqinliri bir qanche kündin buyan saqchilarning nazariti astida bir qisim ziyaretlerde boldi.

Enqerege toplan'ghan lagér qurbanliri yéqinliri 15-féwral türk xewpsizlik xadimlirining nazariti astida türkiye jumhuriyitining qurghuchisi mustapa kamal atatürkning meqberisi anitkabirni ziyaret qildi.

Türk xewpsizlik xadimliri mustapa kamal atatürkning qebrisige qoyush üchün hazirlan'ghan gülning üstidiki "Sherqi türkistan lagér qurbanliri" dégen xetni éliwétishni, mezkur xet bilen süretke chüshüshning belgilimilerge xilap ikenlikini bildürüshti.

Lagér qurbanliri yéqinliridin jewlan shirmemet ziyaritimizni qobul qilip, eng yéngi ehwallar heqqide melumat berdi.

Lagér qurbanliri yéqinliri antkabir ziyaritidin kiyin, munasiwetlik teleplirini yetküzüsh üchün aq partiye merkizige ziyaretke bardi. Aq partiyening tashqiy ishlar mudir yardemchisi ehmet jeylan lagér qurbanliri yéqinlirini qobul qildi. Mehmet jeylan lagér qurbanliri yéqinlirining derdlirini anglidi we xatire qaldurdi.

Lagér qurbanliri yéqinliri élip bérilghan bu ziyaretlerning emeliy ilgirileshlerge yol échishini ümid qilidighanliqini bildürüshti. Lagér qurbanliri yéqinliridin medine nazimi özlirining aq partiye ziyariti heqqide toxtaldi.

Lagér qurbanliri yéqinliri aq partiye merkizidin qaytip, milletchi heriket partiyesining merkizi binasigha bérip munasiwetlik xadimlar bilen körüshüshni telep qildi. Epsuski, lagér qurbanliri yéqinliri milletchi heriket partiyesining merkizi binasigha kirgüzülmidi. Shundaqla munasiwetlik xadimlar teripidin qobul qilinmidi hemde ularning körüshüsh telipining ret qilin'ghanliqi bildürüldi.

Lagér qurbanliri yéqinliridin mirzexmet ilyas oghli ziyaritimizni qobul qilip, lagér qurbanliri yéqinlirining milletchi heriket partiyesi teripidin qobul qilinmighanliqini éytti.

Türk milliyetchilikining simuwlli dep qaralghan milletchi herket partiyesining Uyghur wekillirini qubul qilmasliqi türk xelqining qattiq ghezipini qozghighan. Milletchi heriket partiyesining uruq-tughqanliri xitayning yighiwélish lagérlirigha solan'ghan Uyghurlarni qobul qilmasliqi we körüshüsh telipini ret qilishi, axbarat wasitiliri we ijtima'iy taratqularda qattiq eyiblen'gen.

Mezkur weqe milletchi heriket partiyesining ichidiki bezi siyasiy küchlerning qattiq naraziliqini qozghighan. "Xewer erk" ning xewirige qarighanda, milletchi heriket partiyesining büyük millet mejlisidiki guruppa bashliqi jelal adnanning kontrolluqidiki bezi millet wekilliri ehwaldin qattiq narazi iken. Xewerde weziyetning jelal adnan teripidin milletchi heriket partiyesining rehbiri dewlet bahchelige doklat qilinidighanliqi éytilghan.

Lagér qurbanliri yéqinliri 18-dékabir istanbuldiki xitay konsulxanisining aldida "A'ile nöwette" turush pa'aliyitini bashlighan idi. Pa'aliyet 3-féwral enqerediki xitay elchixanisining aldigha yötkelgen bolup, "A'ile nöwette" pa'aliyiti "Millet nöwette" pa'aliyitige özgertilgen. Pa'aliyetke yawropa, qazaqistan, yaponiye we amérika qatarliq dölet we rayonlardin köplep lagér qurban yéqinliri awaz qoshqan bolup, "Millet nöwette" pa'aliyiti hazir dunya miqyasida élip bérilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet