10 Миң 420 кишилик имза түркийә парламентиға тапшурулған

Ихтиярий мухбиримиз әркин тарим
2021-02-18
Share
10 Миң 420 кишилик имза түркийә парламентиға тапшурулған "келәчәк" партийәси коня шәһәрлик яшлар ячейкисиниң рәиси осман башаран әпәнди вә лагер қурбанлириниң аилә әзалири бирликтә топланған имзаларни түркийә парламентиниң рәисигә һәмдә парламенттики һәр қайси сиясий партийәләрниң вәкилләригә тапшуруп бәргән. 2021-Йили феврал, түркийә.
RFA/Erkin Tarim

Түркийә билән хитай арисида түзүлгән "җинайәтчиләрни өзара өткүзүп бериш келишими" ниң түркийә парламентида мақуллуқтин өтүшини тосуш үчүн топланған 10 миң 420 кишилик имза "келәчәк" партийәси тәрипидин түркийә парламентиға тапшуруп берилгән.

Түркийә ахбаратлирида түркийә билән хитай арисида түзүлгән "җинайәтчиләрни өзара өткүзүп бериш келишими" ниң 2017-йили икки дөләт министирлири арисида имзаланғанлиқи, 2019-йили түркийә президенти рәҗәп таййип әрдоған буниңға имза қойған болсиму, әмма түркийә парламентиниң мақуллуқидин өтмигәнлики хәвәр қилинған иди. Бу хәвәр тарқалғандин кейин, 13-январ күни "келәчәк" партийәсиниң яшлар ячейкиси түркийәниң коня вилайитидә имза йиғиш паалийити уюштуруп, "җинайәтчиләрни өз ара өткүзүп бериш келишими" ниң түркийә парламентида мақуллуқтин өтүшини тосушқа киришкән иди. Қисқиғина вақит ичидә 10 миң 420 кишилик имза йиғилған болуп, бу имзаларни 17-феврал күни "келәчәк" партийәсиниң муавин рәиси сәлчуқ өздағ, "келәчәк" партийәси коня шәһәрлик яшлар ячейкисиниң рәиси осман башаран әпәнди вә лагер қурбанлириниң аилә әзалири билән бирликтә түркийә парламентиниң рәисигә һәмдә парламенттики һәр қайси сиясий партийәләрниң вәкилләригә тапшуруп бәргән.

Сәлчуқ өздағ әпәнди имзаларни тапшуруп бериштин бурун түркийә парламент бинасиниң алдида мухбирларға баянат берип мундақ деди: "партийәмиз коня вилайитидин 10 миң 420 әтрапида имза йиғип, түркийә парламентиниң рәисигә, түркийә президентиға, түркийә парламентидики сиясий партийәләргә вә сайламға қатнишиш салаһитигә игә болған барлиқ сиясий партийәләргә әвәтип бәрди. Биз түркийә билән хитай оттурисида түзүлгән ‹җинайәтчиләрни өз ара өткүзүп бериш келишими' ниң бикар қилишини, шундақла түркийә парламентниң бу келишимни мақуллимаслиқини чақиримиз."

"келәчәк" партийәсиниң муавин рәиси сәлчуқ өздағ әпәнди, хитай һөкүмити уйғурларға елип бериватқан зулумлирини тохтатмичә, бу күрәшни давамлаштуридиғанлиқини баян қилип, мундақ деди: "хитай әркин дуняға бу зулумларниң тохтиғанлиқини испатлиғучә, биз бу муҗадиләмизни давамлаштуримиз. Бу имзалардин кейин худайим буйриса түркийә парламентиниң рәиси, президент рәҗәп таййип әрдоған вә башқа барлиқ парламент әзалири бу мәсилигә көңүл бөләр дегән үмидтимиз. Биз виҗданлиқ вәтәндаш вә ‹келәчәк' партийәси болуш сүпитимиз билән түркийәдики барлиқ сиясәтчиләрни, аммивий тәшкилатларни, ахбарат органлирини вә кәң хәлқ аммисини шәрқий түркистан мәсилисигә көңүл бөлүшкә чақиримиз."

Имза топлаш паалийити 1-айниң 13-күни түркийәниң коня шәһридә башланған болуп, бир ай ичидә он миңдин артуқ имза йиғилған. Имза йиғиш паалийитигә мәсул болған яш сиясәтчи осман башаран әпәнди бу тоғрилиқ мәлумат берип, мундақ деди: "бир ай ичидә 10 миң 420 имза йиғдуқ. Мәқситимиз ‹җинайәтчиләрни өз ара өткүзүп бериш келишими' ни парламентта мақуллуқтин өткүзмәсликтур. Шәрқий түркистан бизниң ата юртимиз, шәрқий түркистанлиқлар бизниң қериндашлиримиз. Партийәмизниң рәиси әхмәт давутоғлу ‹уйғур қериндашлиримизниң немә дәрди болса уларға ярдәм қилиңлар' дәп бизгә йолйоруқ бәрди. Әгәр ‹җинайәтчиләрни өз ара өткүзүп бериш келишими' парламентта музакиригә қоюлуп қалса, уни тосуш үчүн парламент бинасиниң алдида кечә-күндүз намайиш қилимиз."

Зияритимизни қобул қилған султан сатуқ буғрахан вәқпи коня шөбисиниң рәиси абләт удун әпәнди қисқа вақит ичидә 10 миң 420 имза йиғилғанлиқини, бу паалийәт арқилиқ уйғур мәсилисиниң кәң хәлқ аммисиға аңлитилғанлиқини баян қилди.

Биз мәзкур келишимниң түркийә парламенти омумий йиғинида музакири қилинған яки қилинмиғанлиқи тоғрисида мәлумат игиләш үчүн "ийи" партийәсиниң муавин рәиси, ташқи ишлар комитетиниң әзаси әхмәт кәмал әрозан әпәндидин мәлумат соридуқ. У телефон арқилиқ мундақ учур йоллиди. "техи ташқий ишлар комитетиниң күнтәртипигиму кәлмиди."

"келәчәк" партийәси билән султан сатуқ буғрахан вәқпиниң коня шөбиси 13-январ күни бирликтә башлиған бу паалийәтниң тунҗи имзасини сабиқ баш министир, "келәчәк" партийәсиниң рәиси әхмәт давутоғлу қойған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт