Түркийә ташқи ишлар министири б д т да уйғур райониға тәкшүрүш һәйити әвәтидиғанлиқини оттуриға қойди

Ихтиярий мухбиримиз әркин тарим
2021-02-23
Share
Түркийә ташқи ишлар министири б д т да уйғур райониға тәкшүрүш һәйити әвәтидиғанлиқини оттуриға қойди Түркийә ташқи ишлар министири мәвлут чавушоғлу бирләшкән тәшкилатида йиғинда. 2018-Йили 18-декабир, җәнвә.
REUTERS

Түркийә ташқи ишлар министири мәвлут чавушоғлу б д т ниң кишилик һоқуқ кеңишиниң 46-нөвәтлик йиғинида нутуқ сөзләп, хитай һөкүмитиниң тәклипигә бинаән уйғур райониға тәкшүрүш һәйити әвәтидиғанлиқини җакарлиди. Шундақла хитайниң уйғур аптоном районидики уйғур вә башқа мусулман аз санлиқ милләтлириниң кишилик һоқуқлириға хилаплиқ қиливатқанлиқиға даир доклатларниң әндишә қозғаватқанлиқини тәкитлигән.

Мәвлут чавушоғлу сөзидә түркийәниң, шинҗаң уйғур аптоном районидики кишилик һоқуқ вәзийитини йеқиндин көзитиватқанлиқини тәкитлигәндин кейин сөзини мундақ давамлаштурди: "бирләшкән дөләтләр тәшкилати билән башқа қурулушларниң уйғурлар тоғрисида тәйярлиған доклатларда баян қилинғанлар биздә әндишә пәйда қилмақта. Бу һәқтики әндишилиримизни вә күткәнлиримизни хитай рәһбәрлири билән ортақлишиватимиз. Бу тоғрилиқ хитайниң очуқ-ашкара болушини үмид қилимиз. Биз хитайниң земин пүтүнлүкигә һөрмәт қилиш билән бирликтә уйғурларниң вә башқа мусулман хәлқләрниң һәқ вә һоқуқиға һөрмәт қилишини тәләп қилимиз".

У, сөзидә түркийәниң уйғур райониға һәйәт әвәтишни ойлаватқанлиқини баян қилип мундақ деди: "бирләшкән дөләтләр тәшкилатиниң уйғур райониға һәйәт әвәтиш үчүн қиливатқан тиришчанлиқини йеқиндин көзитиватимиз. Хитайниң тәклипигә бинаән бизму районға һәйәт әвәтимиз".

Түркийә һөкүмити узундин буян сүкүттә туруватқан болсиму, бүгүнгә кәлгәндә түркийә ташқи ишлар министириниң бундақ бир баянат беришини қандақ чүшинишимиз керәк? түркийәниң уйғур райониға һәйәт әвәтиш пиланини қандақ чүшинишимиз керәк? буниңға уйғурлар бу һәқтә қандақ қарайду? бу һәқтә көз қаришини игиләш үчүн әнқәрәдики уйғур тәтқиқат институти мүдири доктор әркин әкрәм әпәнди вә түркийәдики шәрқий түркистан тәшкилатлар бирлики рәиси һидайәтулла оғузхан әпәндиләр билән сөһбәт елип бардуқ.

Доктор әркин әкрәм әпәнди түркийә ташқи ишлар министири мәвлут чавушоғлуниң уйғур мәсилиси тоғрисида тохтилиши түркийәниң уйғур мәсилисигә көңүл бөлүватқанлиқиниң испати икәнликини баян қилди.

Һидайәтулла оғузхан әпәнди гәрчә түркийә ташқи ишлар министири мәвлут чавушоғлуниң б д т ниң кишилик һоқуқ кеңишиниң 46-нөвәтлик йиғинида уйғурларниң һазирқи еғир вәзийити тоғрисида бәргән баянати гәрчә юмшақ болған болсиму әһмийәтлик болғанлиқини баян қилди.

Доктор әркин әкрәм әпәнди түркийәниң һәйәт әвәтишиниң уйғурлар үчүн көп пайдиси болмайдиғанлиқини баян қилди.

Һидайәтулла оғузхан әпәнди түркийәниң һәйити хитайға қаттиқ шәртләрни қоюп барса болидиғанлиқини оттуриға қойди.

Мәвлут чавушоғлу 2019-йили 25‏-феврал күни б д т кишилик һоқуқ кеңишиниң 40‏-нөвәтлик йиғинида сөзлигән нутқида хитайни җаза лагерлирини тақашқа чақирғаниди. Түркийә ташқи ишлар министирлиқи 2019‏-йили 9-феврал күни елан қилған баянатидиму хитайниң уйғурларға елип бериватқан бесим сияситини қаттиқ әйиблигәниди. Түркийә ташқи ишлар министирлиқи 4 йил ичидә 5 қетим бу һәқтә баянат елан қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт