Парламент әзаси үмит өздағ: "бейҗиңниң бу рәһимсиз қилмишини тохтитишниң пәйти кәлди"

Ихтиярий мухбиримиз арслан
2021-02-25
Share
Парламент әзаси үмит өздағ: Түркийә "ий" партийәсиниң парламент әзаси үмит өздағ истанбулдики хитай консулханиси алдида намайиш қиливатқан уйғурларни зиярәт қилип, уларни қоллап-қуввәтләйдиғанлиқини ипадилиди.
Social Media

Түркийә "ий" партийәсиниң парламент әзаси үмит өздағ бир қанчә күндин буян хитайниң истанбулдики хитай консулханиси алдида намайиш қиливатқан уйғурларни зиярәт қилип, уларни қоллап-қуввәтләйдиғанлиқини ипадилиди.

Өткән йили 12-айниң 18-күнидин буян хитайниң истанбулдики консулханиси алдиға җәм болуп," аиләм қәйәрдә "дегән шуар билән наразилиқ намайиш елип бериватқан уйғурларниң наразилиқ һәрикәтлири изчил давам қилмақта.

Бир қанчә йилдин буян шәрқий түркистандики уруқ-туғқанлиридин хәвәр алалмиған намайишчилар уруқ-туғқанлириниң ақивәтлиридин әндишә қилип, хитайниң истанбулдики консулханисни бу һәқтә җавап беришкә қистимақта. Гәрчә түрк сақчилар уйғур намайишчиларни хитай консулханисиға йеқинлап беришиға тосқунлуқ қиливатқан болсиму, әмма намайишчилар хитай консулханисиға йеқин җайдики деңиз бойида наразилиқ намайишини давам қилмақта.

Намайишчлар қоллирида хитайниң җаза лагерлириға қамалғанлиқи илгири сүрүлгән уруқ-туғқанлириниң сүрәтлирини көтүргән һалда "залим хитай, аиләм қәйәрдә" дегәнгә охшаш һәр хил шуарлар товлимақта.

2‏-Айниң25 ‏-күни түркийә "ий" партийәсиниң парламент әзаси үмит өздағ, журналист мәрвә шәбнәм орч, "акт" телевизийәсиниң риясәтчиси халис өздемир қатарлиқлар хитайниң истанбулдики консулханиси алдида намайиш қиливатқан уйғурларни зиярәт қилди. Парламент әзаси үмит өздағ уйғурларни қоллап-қуввәтләйдиғанлиқини ипадилиди.

У мундақ деди: "бейҗиңниң бу рәһимсиз қилмишлирини дәрһал тохтитишниң пәйти кәлди."

Үмит өздағ әпәнди мухбирларға баянат берип, мундақ деди: "хитай 21‏-әсирниң башлиридики шәрқий түркистанда 20‏-әсирниң қараңғу зулимәтлиридә қалған насиситларниң қилмишлирини қайтидин сәһнигә елип чиқиватиду. Қәдимий түрк юрти болған шәрқий түркистан хитайниң күндин күнгә ешиватқан бесим сиясити астида һәқсизлиқ, адаләтсизлик вә зулумға учримақта. Шәрқий түркистанлиқ қериндашлиримиз нәччә миң йилдин буян шәрқий түркистанниң түрклүк характерини, мәдәнийитини вә мәвҗутлуқини қоғдап кәлди. Улар 21-әсирдә, 22-әсирдә һәттатаки қиямәт қайим болғичә өз вәтәнлирини қоғдашқа тиришиду, хитайгәрчә уларни йоқ қилиш үчүн шунчә еғир бесим қиливатқан болсиму, лекин улар пүткүл бесимларға қарши тик турмақта. Әгәр бейҗиң әқил-параситини ишқа селип, бүйүк түрк дунясиниң дүшминигә айлинишни халимиса, у чағда шәрқий түркистандики бу рәһимсиз қилмишлирини дәрһал ахирлаштуруши керәк."

Дадиси билән 7 йилдин буян көрүшәлмигән вә әһвалидин хәвәр алалмиған 10 яшлиқ патимә имин, аниси илминур имин билән бу намайишқа қатнишиватиқан болуп, у: "маңа охшаш дадисидин айрилип қалған балилар үмид күтиватиду," деди.

Патимә йәнә мундақ деди: "түркийәгә 3 яш вақтимда кәлдим, әмма хитайларниң сәвәбидин 7 йилдин буян дадамни көрәлмидим, дадамдин һеч қандақ хәвәр йоқ."

Патимәниң аниси илминур имин 2014‏-йилидин кейин йолдиши, дадиси вә һәдиси билән һеч көрүшәлмигәнликини билдүрди.

Төт йилдин буян анисидин хәвәр алалмиған йәнә бир паалийәтчи ахбаратларға сөз қилип:" мән бу йәрдин пүткүл инсанларға нида қилимән. Сәмимий инсанлар маңа қулақ салсун, чүнки бу кичик бир мәсилә әмәс, бәлки йоқ болуш алдидики бир милләтниң мәсилисидур," деди.

Истанбулдики хитай консулханиси алдида елип бериливатқан намайишниң қандақ тәсир вә өнүми боливатиду? бу һәқтә биз намайишқа актип қатнишиватқан иқтисад шунас доктур бурһан улуғйол әпәнди билән сөһбәт елип бардуқ.

Доктур бурһан улуғйол әпәнди бу намайиш арқилиқ уйғурларниң авазини дуняға аңлитишни мәқсәт қилғанлиқини вә уйғурларниң зулумға учраватқанлиқидәк чинишлиқ реаллиққа хәлқара мәтбуатларниң вә дуня җамаитиниң диққитини тартиватқанлиқини билдүрди.

Доктур бурһан мундақ деди: "америка, канада қатарлиқ дөләтләр хитайниң зулумини ‹ирқий қирғичилиқ' дәп тонуп йәтти. Шуниң үчүн биз техиму көп дөләтләрниң буни ‹ирқий қирғинчилиқ' дәп тунуши үчүн чоқум күч чиқиришимиз керәк. Биз мәйданларға төкүлүп хитайниң залимлиқини дуняға ашкарилишимиз керәк. Шундақла демократик дөләтләрниң ярдимигә еришип, вәтинимизниң азадлиқини қолға кәлтүрүш үчүн тиришишимиз керәк, дәп қараймән. Шуниң үчүн барлиқ уйғурларниң бу паалийәтләргә актип қатнишишини, хитай зулумини дуняға паш қилиш арқилиқ вәтинимиздики хәлқниң зулумдин қутулуш үчүн бир кишилик һәссә қошушини үмид қилимән."

Бүгүнки паалийәткә түркийәниң демурирән хәвәр агентлиқи, TRT ‏(түркийә дөләтлик радио-телевизийә қанили) вә бир қанчә чәт әл ахбаратлириниң мухбирлириму кәлгән болуп, намайиш тоғрисидики хәвәрләр таратқуларда кәң тарқалди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт