Әнқәрәдә өткүзүлгән норуз байримида түрк дунясиниң уйғурларға игә чиқиши керәклики тәкитләнди

Ихтиярий мухбиримиз әркин тарим
2021-03-22
Share
Әнқәрәдә өткүзүлгән норуз байримида түрк дунясиниң уйғурларға игә чиқиши керәклики тәкитләнди Түркийәниң пайтәхти әнқәрәдә һәр йили болғинидәк бу йил 21-март күниму оттура асия түркий җумһурийәтлири, түркийә вә дуняниң һәрқайси җайлиридин кәлгән түркий хәлқләр бир йәргә җәм болуп, норуз байримини қутлиди.
Social Media

Түркийәниң пайтәхти әнқәрәдә һәр йили болғинидәк бу йил 21-март күниму оттура асия түркий җумһурийәтлири, түркийә вә дуняниң һәрқайси җайлиридин кәлгән түркий хәлқләр бир йәргә җәм болуп, норуз байримини қутлиди.

Мустәқил оттура асия түркий җумһурийәтлириниң әнқәрәдә турушлуқ баш әлчилири, бәзи сиясий партийәләрниң вәкиллири вә парламент әзалири иштирак қилған норуз мурасимида шәрқий түркистан тәшкилатлар бирлики мәхсус бөлмә ечип, уйғур мәдәнийитини тонуштурди. Уйғур өсмүрләрдин муҗаһит қәшқәрли "кишилик һоқуқи қәйәрдә?" дегән шеирни, сатуқ буғра қарахан болса шаирә нурәла гөктүрк ханим язған "түркистанға қайтимиз" мавзулуқ шеирини деклиматсийә қилип бәрди.

Норуз мурасимиға саһибханлиқ қилған әнқәрә кечиөрән районлуқ һөкүмәтниң рәиси турғут алтиноқ әпәнди нутуқ сөзләп, мустәқил түркий дөләтлири вә дунядики барлиқ түркий хәлқләрниң өз қериндашлири болған уйғурларға игә чиқишқа чақирди.

21-Март чүш саәт 12 дә әнқәрәдә өткүзүлгән норуз байрими паалийитигә кечиөрән районлуқ һөкүмәтниң башлиқи турғут алтиноқ әпәнди, оттура асия түркий җумһурийәтлириниң әнқәрәдә турушлуқ әлчилири вә көп санда парламент әзалири қатнашти вә сөз қилди.

Алди билән бу паалийәтни уюштурған кечиөрән районлуқ һөкүмәт башлиқи турғут алтиноқ әпәнди әпәнди ечилиш нутқи қилип, түркий хәлқләрниң 5 миң йиллиқ тарихқа игә қәдимий байрими болған норуз байримиға саһибханилиқ қилғанлиқидин өзини бәхтлик һес қиливатқанлиқини, бу паалийәтниң түркий хәлқләрниң бирлик вә иттипақлиқини күчәйтиш үчүн зор әһмийәткә игә икәнликини тәкитләп өтти. Андин кейин пүтүн түрк дунясини, мустәқил түркий җумһурийәтлирини, шундақла барлиқ түркий хәлқләрни бүгүнки еғир күнләрдә уйғурларға игә чиқишни тәвсийә қилди.

Паалийәт ахирлашқандин кейин бу паалийәтни уюштурған вә иштирак қилған уйғур паалийәтчиләргә микрофонимизни узаттуқ.

Уйғур академийиси иҗраийә комитетиниң рәиси аблимит қарахан әпәнди мәзкур паалийәтни уюштурған турғут алтиноқ әпәндиниң уйғурларниң норуз байримини алаһидә қутлап, уйғурларниң һазирқи еғир вәзийити һәққидиму тохталғанлиқини, барлиқ түркий хәлқләрни уйғурларға игә чиқишқа чақирғанлиқини баян қилди.

Шәрқий түркистан тәшкилатлар бирликиниң әнқәрәдики вәкили абдулхәмит әпәнди әнқәрәдә өткүзүлгән норуз паалийитидә тәшкилатиниң мәхсус бөлмә ечип, уйғурларниң мәдәнийәт боюмлирини тонуштуруш билән бирликтә йәнә уйғурларниң еғир вәзийитини тонуштурғанлиқини, паалийәтниң мувәппәқийәтлик өткәнликини билдүрди.

Аблимит қарахан әпәнди 21-март күни әнқәрәдә өткүзүлгән норуз паалийитидә уйғур өсмүрләрниң шеир диклиматсийә қилиш арқилиқ уйғурлар тартиватқан зулумлирини җанлиқ бир шәкилдә аңлатқанлиқини, кишиләрниң зор алқишиға еришкәнликини баян қилди.

Норуз паалийити һәрқайси җайларда шад-хурамлиқ асас қилинған һәр хил шәкилләрдә өткүзүлиду. Уйғур елиниң көпинчә җайлирида бир юрт яки бир мәһәллини асас қилған һалда һавалиқ җайларда өткүзүлиду. Гәрчә уйғур хәлқи һазир еғир күнләрни бешидин өткүзүватқан болсиму, әмма дуня уйғур қурултийиниң рәиси долқун әйса әпәнди мәхсус тәбрик баянати елан қилип, уйғурларниң норуз байримини қутлиди. Бу йиллиқ норуз байрими түркийәниң әнқәрә, истанбул, бурса вә қәйсәри қатарлиқ шәһәрлиридә уйғурларму иштирак қилған һалда түрлүк мурасимлар билән тәнтәнилик өткүзүлди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт