Istanbulda “Sherqiy türkistan milliy kürishide qilishqa tégishlik jiddiy xizmetler heqqide yumilaq üstel yighini” échildi

Ixtiyariy muxbirimiz azigh
2022.03.22
Share on WhatsApp
Share on WhatsApp
Istanbulda “Sherqiy türkistan milliy kürishide qilishqa tégishlik jiddiy xizmetler heqqide yumilaq üstel yighini” échildi 2022-Yili 20-mart yekshenbe küni istanbul sefaköyda 3-qétimliq “Sherqiy türkistan milliy kürishide qilishqa tégishlik jiddiy xizmetler heqqide yumilaq üstel yighini” ötküzüldi.
Photo: RFA

20-Mart yekshenbe küni istanbul sefaköyda 3-qétimliq “Sherqiy türkistan milliy kürishide qilishqa tégishlik jiddiy xizmetler heqqide yumilaq üstel yighini” ötküzüldi.

Uyghur akadémiyesining teshkillishi we sherqiy türkistanliqlar fédératsiyesining sahibxaniliqida ötküzülgen mezkur yighinda, Uyghur teshkilat mes'ulliri, pa'aliyetchiler we tetqiqatchilar otturisida lobichiliq we teshkilatchiliq üstide öz ara tejribe we pikir almashturulghan.

Yighin'gha türkiyediki Uyghur siyasiy we puqrawi teshkilatlarning mes'ulliri, Uyghur dawasigha pa'al awaz qoshup kéliwatqan jama'et erbabliri, Uyghur siyasiy weziyiti heqqide izdinip kéliwatqan Uyghur mutexessis we tetqiqatchilar bolup 40 qa yéqin kishi qatnashqan.

Uyghur akadimiyisining mu'awin re'isi abdulhemid qaraxan ependim ziyaritimizni qobul qilip, pa'aliyet heqqide tepsiliy melumat berdi we pa'aliyetning meqsiti toghrisida toxtaldi.

Yépiq shekildiki mezkur yighinning chüshtin burunqi qismida teshkilatchiliq we lobichiliq heqqide tetqiqat élip barghan we tejribe qazan'ghan doktor su'at kir we rejep seyyar qatarliq türk mutexessisler türkiyediki Uyghur teshkilat mes'ulliri we Uyghur siyasiy pa'aliyetchilirige teshkilatchiliq we lobiychiliq heqqide mexsus léksiye bergen.

Chüshtin kéyinki yighinda Uyghur mesilisi we Uyghur siyasiy weziyiti üstide izdinip kéliwatqan Uyghur tetqiqatchi we mutexessisler bilen teshkilat mes'ulliri otturisida teshkilatchiliq we lobiychiliq heqqide yumilaq üstel muzakirisi élip bérilghan.

Mezkur pa'aliyetke qatnashqan yawropa Uyghur akadimiyesining re'isi doktor abdüshükür abdurishit ependim ziyaritimizni qobul qilip, Uyghur dawasida teshkilatchiliq we lobichiliqning roli we ehmiyiti heqqide toxtaldi. Abdüshükür ependim yene, Uyghur ziyaliyliri, dini zatlar we Uyghur teshkilat mes'ulliri otturisidiki chüshinishni ilgiri sürüsh jehettin bu xil pa'aliyetlerning intayin muhimliqini tekitlidi.

Sherqiy türkistanliqlar fédératsiyesining mes'ulliridin “Oqu Uyghur bilik” mektipining mudiri hebibulla kösen ependi ziyaritimizni qobul qilip, bu xil yighinlarning Uyghur dawasigha kéreklik tayanch küchlerni yitishtürüshtiki roli we paydisi heqqide toxtaldi.

Xitay hökümitining Uyghur élidiki qirghinchiliq siyasetlirining künséri éghirlishishigha egiship, muhajirettiki Uyghurlarning siyasiy pa'aliyetlirimu künséri kücheymekte. Mutexessisler Uyghur siyasiy heriket we teshkilatchiliq pa'aliyetlirining süpiti we tesirining éshishi üchün mutexessis we tetqiqatchilarning tejribe we ilmiy jughlanmisidin paydilinishining intayin muhimliqini tekitlimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet