Түркийәниң шәһәрлик вә районлуқ парламентлиридики партийә вәкиллири баянат елан қилип, хитайни қаттиқ әйиблиди

Ихтиярий мухбиримиз әркин тарим
2021-06-09
Share
Түркийәниң шәһәрлик вә районлуқ парламентлиридики партийә вәкиллири баянат елан қилип, хитайни қаттиқ әйиблиди Түркийә қаш шәһәрлик парламенттики 3 сиясий партийә ортақ елан қилған баянат. 2021-Йили 8-июн.
RFA/Erkin Tarim

Америка қатарлиқ ғәрбтики бәзи демократик дөләтләр хитайниң уйғурларға елип бериватқан зулумини "ирқий қирғинчилиқ" дәп елан қилған, "уйғур сот коллегийәси" ниң биринчи қетимлиқ гуваһлиқ бериш йиғини ахирлашқан пәйттә, түркийәдики бәзи шәһәрлик вә районлуқ парламентлар арқа-арқидин баянат елан қилип, хитайниң уйғурларға елип бериватқан бастуруш сияситини қаттиқ әйиблигән. Улар баянатлирида түркийә һөкүмитини уйғурларға игә чиқишқа чақирған. Түркийәниң әң чоң саяһәт шәһәрлиридин бири болған анталя шәһриниң қаш районлуқ парламентидики милләт иттипақиға мәнсуп җумһурийәт хәлқ партийәси билән "ийи" партийәсиниң парламент әзалири, измир шәһириниң борнова районлуқ парламенттики һөкүмәткә мәнсуп парламент әзалири билән милләт иттипақи, йәни җумһурийәт хәлқ партийәси билән "йийи" партийәсигә мәнсуп өктичи парламент әзалири ортақ тәйярлиған баянатни шәһәрлик парламентта оқуған. Булардин сирт қара деңиз районидики ризә вилайити финдиқли шәһәрлик парламентидики йиғинда шәһәр башлиқи чавушоғлу әпәнди сөз қилип, парламент намидин хитайниң уйғурларға елип бериватқан зулум сияситини әйибләйдиғанлиқини билдүргән. 8-Июн күни қаш шәһәрлик парламентидики 12 нәпәр парламент әзаси қол қоюп ортақ елан қилған мәзкур баянатта мундақ дейилгән: "хитай хәлқ җумһурийәти 2014-йилидин тартип, уйғур түрклирини асас қилған барлиқ түркий қериндашлиримизға елип бериватқан еғир зулум сиясити инсанийәткә қарши җинайәттур. Әпсуски, хитай садир қиливатқан мәзкур җинайәт күнимиздиму давам қилмақта. Хитай террорлуққа қарши күрәшни баһанә қилип туруп, милйонлиған қериндишимизни лагерларға ташлиған болуп, ‹қайта тәрбийәләш' баһаниси билән уларға инсан қелипидин чиққан бесим сиясити йүргүзмәктә. Уларниң диний етиқади чәкләнмәктә. Шәрқий түркистанлиқ қериндашлиримиз лагерларда искәнҗә вә басқунчилиққа учримақта."

Қаш шәһәрлик парламенттики 3 сиясий партийә ортақ елан қилған баянат мундақ ахирлашқан: "биз милләт иттипақи партийәләргә мәнсуп парламент әзалири болуш сүпитимиз билән хитайниң шәрқий түркистандики уйғурларни асас қилған йәрлик түркий хәлқләргә елип бериватқан бесим сияситигә қарши турушни давам қилимиз. Шуниң билән бир вақитта хитайниң уларға елип бериватқан зулумлири түгигүчә, қериндашлиримизниң авази болушни давам қилимиз."

Буниңдин башқа "гәрчәк хәбәр" намлиқ тор гезитиниң 5-июндики хәвиригә асасланғанда, измир борнова шәһәрлик парламенттики җумһурийәт хәлқ партийәси парламент әзаси баһар гүрсул ханим сөз қилип, хитайниң уйғурларға елип бериватқан ирқий қирғинчилиқ сияситини қаттиқ әйибләйдиғанлиқини, уйғурларниң һәққаний дәвасида һәр даим уларниң йенида болидиғанлиқини баян қилған. Арқидинла һакимийәт бешидики адаләт вә тәрәққият партийәсигә мәнсуп парламент әзалири сөз қилип, пәләстинликләр билән уйғурларни қоллайдиғанлиқини, қәйәрдә езилгән мусулман болса, уларни қоллайдиғанлиқини баян қилған.

Булардин сирт малатя вилайитиниң батталгази шәһәрлик парламенттики парламент әзаси мәмәт али гөргәч әпәнди "ийи" партийәси намидин тәйярлиған ортақ баянатини оқуп өткән. "малатя хәвәрлири" намлиқ тор гезитидә елан қилинған хәвәрдә йезилишичә, парламент әзалири дуняниң һәрқайси дөләтлирини, түркийә һөкүмитини уйғурлар үчүн һәрикәткә өтүшкә чақирған. Мәзкур баянатта уйғур мәсилисидә түркийәниң сүкүттә туривәрмәй һәрикәткә өтүши керәклики тәкитләнгән.

Бу һәқтә зияритимизни қобул қилған қаш шәһәрлик парламент әзаси мустафа басқақ әпәнди қаш шәһридики аһалиләрниң уйғурларни яхши билидиғанлиқини, уйғурларни һәр даим қоллап қувәтләйдиғанлиқини баян қилип, мундақ деди: "биз шәрқий түркистан мәсилиси билән чоң болған милләтчиләрмиз. Биз әсир түркий хәлқләр үчүн күрәш қилип чоң болдуқ. Қашта милләтчи җамаәт шәрқий түркистанлиқларға бәкла көңүл бөлиду. Биз шәһәрлик парламентта қолимиздин келишичә уйғурларниң авази болушқа тиришиватимиз."

Бу һәқтә зияритимизни қобул қилған шәрқий түркистан вәхписиниң сабиқ рәиси "уйғур хәвәр мәркизи" ниң мәсули һамутхан гөктүрк әпәнди түркийәдә һазирғичә җәмий 10 әтрапида шәһәрлик парламентниң бу хил ортақ баянатларни елан қилғанлиқини, буниң уйғурларни қоллайдиған киши вә гуруһларниң тез сүрәттә көпийиватқанлиқиниң бишарити икәнликини илгири сүрди.

Истандулда паалийәт елип бериватқан дуня уйғур қурултийи вәхписиниң рәиси абдулрәшит абдулхәмит түркийәдә уйғурларниң қоллиғучилириниң тез көпийиватқанлиқини, буниңдин кейин техиму көп шәһәрлик парламент вә сиясий партийәләрниң бундақ ортақ баянатларни көпләп елан қилидиғанлиқини оттуриға қойди.

Буниңдин башқа өткән айда вә бу айниң бешида адана чуқурува шәһәрлик парламент дәсләп болуп 3 парламент билән түркийәдики 73 адвокатлар идариси уйғурларни қоллап ортақ баянат елан қилғаниди. Түркийәдә 78 миң әтрапида адвокат бар болуп, бу адвокатлар 81 адвокатлар идарисиға әза болуп вәзипә өтәйдикән. Буниң ичидин 73 адвокатлиқ идарисиниң уйғурларни қоллап, хитайни әйибләп баянат елан қилиши, түркийәдики уйғур дәваси үчүн зор илгириләш һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт