Явуз ағиралиоғлу: "һакимийәтни қолимизға алсақ тунҗи ишимиз шәрқий түркистан тоғрилиқ қарар мақуллаш болиду"

Ихтиярий мухбиримиз әркин тарим
2021-09-08
Share
явуз ағиралиоғлу: Түркийә "ийи" партийәсиниң муавин рәиси явуз ағиралиоғлу тәйвән парламенти инсан һәқлири комитетиниң муавин баш катипи өркәш дөләтни әнқәрәдики партийә мәркизидә қобул қилди. 2021-Йили 6-сентәбир, түркийә.
RFA/Erkin Tarim

Түркийә парламентидики өктичи партийәләрдин бири болған, қурулған күндин тартип уйғур мәсилисигә алаһидә көңүл бөлүп келиватқан "ийи" партийәсиниң муавин рәиси явуз ағиралиоғлу әпәнди 6-сентәбир күни тәйвән парламенти инсан һәқлири комитетиниң муавин баш катипи өркәш дөләтни әнқәрәдики партийә мәркизидә қобул қилди. У, өзиниң түркләрниң қәдимий юрти шәрқий түркистанниң һазирқи еғир вәзийитидин қаттиқ әнсирәватқанлиқини, хитайниң адәм қелипидин чиққан ирқий қирғинчилиқ сияситини тохтитиш үчүн қоллиридин кәлгәнни қиливатқанлиқини тәкитлиди.

5-Сентәбир күни өркәш дөләт әпәнди явуз ағиралиоғлу әпәндигә уйғурларниң һазирқи еғир вәзийити, уйғур дәвасиниң хәлқарадики әһвали вә түркийәниң оттура асия түркий җумһурийәтлири билән бирликтә хитайға қарши турушниң йоллирини аңлатти. Өркәш дөләт әпәнди түркийәниң болупму түркийәдики өктичи партийәләрниң тәйвән билән һәмкарлишиши тоғрисидики тәләп-пикирлириниму оттуриға қойди.

Учришиш ахирлашқандин кейин зияритимизни қобул қилған өркәш дөләт әпәнди тәйвән парламенти инсан һәқлири комитетиниң муавин баш катипи болуш сүпити билән әнқәрәгә зиярәткә келишидики мәқсити һәққидә тохтилип мундақ деди: "мениң әнқәрәгә келишимдики мәқсәт бу йәрдики сиясий партийәләр, парламент әзалири вә аммиви тәшкилатлар билән көрүшүп, уйғур мәсилисидә демократийә, инсан һәқлири вә әркинликкә әһмийәт беридиған кишиләр билән һәмкарлишип алдимиздики күнләрдә немиләрни қилалаймиз? қандақ һәмкарлишалаймиз? бу һәқтә музакирә елип бериштин ибарәт".

Өркәш дөләт әпәнди "ийи" партийәси муавин рәиси ағиралиоғлу әпәнди билән музакирә қилған мәсилиләр тоғрисида мәлумат берип мундақ деди: "уйғур мәсилиси хәлқаралашқан бүгүнки күндә уйғур мәсилисини һәл қилишта түркийәниң қандақ қилип оттура асия түркий җумһурийәтлиригә тәсир көрситип, хитайға бесим пәйда қилалайдиғанлиқи, бу җәһәттә һәмкарлишип немиләрни қилалаймиз бу һәқтә музакирә елип бардуқ".

Өркәш дөләт әпәнди явуз ағиралиоғлу билән елип барған учришишта музакирә қилинған йәнә бир муһим мәсилиниң ислам дөләтлири билән мунасивәтлик икәнликини баян қилип мундақ деди: "һәммимизгә мәлум болғинидәк җаза лагерлири мәсилисидә мусулман дөләтлириниң һәммиси дегүдәк хитайниң сияситини қоллиди. Шуңа түркийәниң һәм түрк һәмдә бир мусулман дөлити болуш сүпити билән мусулман дөләтлирини уйғурларға игә чиқиришқа чақиришини тәләп қилдим".

"ийи" партийәси муавин рәиси явуз ағиралиоғлу әпәнди учришиш ахирлашқандин кейин зияритимизни қобул қилип, бу учришишниң яхши өткәнликини баян қилип мундақ деди: "биз сайламда утуп чиқип һакимийәтни қолимизға алсақ тунҗи ишимиз түркийә парламентида шәрқий түркистандики инсан һәқлири дәпсәндичилики тоғрисидики қарарни мақуллуқтин өткүзүш болиду. Биз шәрқий түркистан мәсилисини түркийәниң күн тәртипидин чүшүрмәй давамлиқ күн тәртипкә елип келимиз. Өркәш дөләт әпәндиниң қиммәтлик тәләп-пикирлири һәққидә техиму илгирилигән һалда музакирә елип берип, һәмкарлишишниң йоллирини бекитип чиқимиз".

Һазир түркийә парламентида 4 партийә вәзипә өтәватқан болуп, уйғур мәсилиси парламенттики "ийи" партийәси тәрипидин давамлиқ оттуриға қоюлуп кәлмәктә. "ийи" партийәси һәтта 2 қетим уйғурлар тоғрисида қанун лайиһәси сунған болсиму, һакимийәт бешидики адаләт вә тәрәққият партийәси парламент әзалири билән уларни қоллаватқан милләтчи һәрикәт партийәси парламент әзалириниң қарши чиқиши билән рәт қилинғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт