Yawuz aghirali'oghlu: "Hakimiyetni qolimizgha alsaq tunji ishimiz sherqiy türkistan toghriliq qarar maqullash bolidu"

Ixtiyariy muxbirimiz erkin tarim
2021-09-08
Share
Yawuz aghirali'oghlu: Türkiye "Iyi" partiyesining mu'awin re'isi yawuz aghirali'oghlu teywen parlaménti insan heqliri komitétining mu'awin bash katipi örkesh döletni enqerediki partiye merkizide qobul qildi. 2021-Yili 6-séntebir, türkiye.
RFA/Erkin Tarim

Türkiye parlaméntidiki öktichi partiyelerdin biri bolghan, qurulghan kündin tartip Uyghur mesilisige alahide köngül bölüp kéliwatqan "Iyi" partiyesining mu'awin re'isi yawuz aghirali'oghlu ependi 6-séntebir küni teywen parlaménti insan heqliri komitétining mu'awin bash katipi örkesh döletni enqerediki partiye merkizide qobul qildi. U, özining türklerning qedimiy yurti sherqiy türkistanning hazirqi éghir weziyitidin qattiq ensirewatqanliqini, xitayning adem qélipidin chiqqan irqiy qirghinchiliq siyasitini toxtitish üchün qolliridin kelgenni qiliwatqanliqini tekitlidi.

5-Séntebir küni örkesh dölet ependi yawuz aghirali'oghlu ependige Uyghurlarning hazirqi éghir weziyiti, Uyghur dewasining xelq'aradiki ehwali we türkiyening ottura asiya türkiy jumhuriyetliri bilen birlikte xitaygha qarshi turushning yollirini anglatti. Örkesh dölet ependi türkiyening bolupmu türkiyediki öktichi partiyelerning teywen bilen hemkarlishishi toghrisidiki telep-pikirlirinimu otturigha qoydi.

Uchrishish axirlashqandin kéyin ziyaritimizni qobul qilghan örkesh dölet ependi teywen parlaménti insan heqliri komitétining mu'awin bash katipi bolush süpiti bilen enqerege ziyaretke kélishidiki meqsiti heqqide toxtilip mundaq dédi: "Méning enqerege kélishimdiki meqset bu yerdiki siyasiy partiyeler, parlamént ezaliri we ammiwi teshkilatlar bilen körüshüp, Uyghur mesiliside démokratiye, insan heqliri we erkinlikke ehmiyet béridighan kishiler bilen hemkarliship aldimizdiki künlerde némilerni qilalaymiz? qandaq hemkarlishalaymiz? bu heqte muzakire élip bérishtin ibaret".

Örkesh dölet ependi "Iyi" partiyesi mu'awin re'isi aghirali'oghlu ependi bilen muzakire qilghan mesililer toghrisida melumat bérip mundaq dédi: "Uyghur mesilisi xelq'aralashqan bügünki künde Uyghur mesilisini hel qilishta türkiyening qandaq qilip ottura asiya türkiy jumhuriyetlirige tesir körsitip, xitaygha bésim peyda qilalaydighanliqi, bu jehette hemkarliship némilerni qilalaymiz bu heqte muzakire élip barduq".

Örkesh dölet ependi yawuz aghirali'oghlu bilen élip barghan uchrishishta muzakire qilin'ghan yene bir muhim mesilining islam döletliri bilen munasiwetlik ikenlikini bayan qilip mundaq dédi: "Hemmimizge melum bolghinidek jaza lagérliri mesiliside musulman döletlirining hemmisi dégüdek xitayning siyasitini qollidi. Shunga türkiyening hem türk hemde bir musulman döliti bolush süpiti bilen musulman döletlirini Uyghurlargha ige chiqirishqa chaqirishini telep qildim".

"Iyi" partiyesi mu'awin re'isi yawuz aghirali'oghlu ependi uchrishish axirlashqandin kéyin ziyaritimizni qobul qilip, bu uchrishishning yaxshi ötkenlikini bayan qilip mundaq dédi: "Biz saylamda utup chiqip hakimiyetni qolimizgha alsaq tunji ishimiz türkiye parlaméntida sherqiy türkistandiki insan heqliri depsendichiliki toghrisidiki qararni maqulluqtin ötküzüsh bolidu. Biz sherqiy türkistan mesilisini türkiyening kün tertipidin chüshürmey dawamliq kün tertipke élip kélimiz. Örkesh dölet ependining qimmetlik telep-pikirliri heqqide téximu ilgiriligen halda muzakire élip bérip, hemkarlishishning yollirini békitip chiqimiz".

Hazir türkiye parlaméntida 4 partiye wezipe ötewatqan bolup, Uyghur mesilisi parlaménttiki "Iyi" partiyesi teripidin dawamliq otturigha qoyulup kelmekte. "Iyi" partiyesi hetta 2 qétim Uyghurlar toghrisida qanun layihesi sun'ghan bolsimu, hakimiyet béshidiki adalet we tereqqiyat partiyesi parlamént ezaliri bilen ularni qollawatqan milletchi heriket partiyesi parlamént ezalirining qarshi chiqishi bilen ret qilin'ghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet