Түркийәниң 3 вилайитидә уйғурлар тоғрисида 3 паалийәт өткүзүлди

Ихтиярий мухбиримиз әркин тарим
2019-12-06
Елхәт
Пикир
Share
Принт
Түркийә парламент әзаси олҗай килавуз әпәнди 5-декабир күни түркийә парламентидики омумий йиғинда хитайни әйиблиди. 2019-Йили 5-декабир. Әнқәрә, түркийә.
Түркийә парламент әзаси олҗай килавуз әпәнди 5-декабир күни түркийә парламентидики омумий йиғинда хитайни әйиблиди. 2019-Йили 5-декабир. Әнқәрә, түркийә.
RFA/Erkin Tarim

Уйғурларниң һазирқи еғир вәзийити дуняда күн тәртипигә келишигә әгишип, түркийәдиму күн тәртипкә кәлмәктә.

Түркийә парламент әзаси олҗай килавуз әпәнди 5-декабир күни түркийә парламентидики омумий йиғинда сөзләп, хитайни әйиблиди түркийә һөкүмитини уйғурларға игә чиқишқа чақирди. 

«Уйғур 2019» намлиқ қанун лайиһәси 3-декабир күни америка дөләт мәҗлисидә мутләқ үстүн аваз билән мақулланғандин кейин биринчи болуп түркийәдики «ийи», йәни «яхши» партийәсиниң парламент әзаси фаһрәттин йоқуш әпәнди мухбирларни күтүвелиш йиғини чақирғаниди. Мәзкур қанунниң мақулланғанлиқи тоғрисидики хәвәргә түркийәдики ахбарат васитилириму кәң-көләмдә орун бәрди. Арқидинла 5-декабир күни милләтчи һәрикәт партийәси парламент әзаси олҗай килавуз әпәнди түркийә парламентидики омумий йиғинда сөзләп, 600 парламент әзасиға уйғурларниң һазирқи еғир вәзийитини аңлатти. 5-Декабир күни түркийәниң явропа райониға җайлашқан қириқларәли вилайитиниң қириқларәли шәһиридики «түрк оҗақлири тәшкилати» мәтбуат баянати елан қилиш паалийити өткүзди. Арқидин бүгүн йәни 6-декабир күни мәзкур тәшкилат «шәрқий түркистанда немиләр боливатиду?» темисида доклат бериш паалийити өткүзди. 6-Декабир күни ахшам әнқәрәниң полатли районида уйғурлар тоғрисида доклат бериш йиғини өткүзүлди. Йиғинда әнқәрәдики уйғур тәтқиқат институти мудири доктор әркин әкрәм әпәнди доклат бәрди. 

Парламент әзаси олҗай килавуз әпәнди парламенттики омумий йиғинда қилған сөзидә дунядики дөләтләрни хитайниң уйғурларға елип бериватқан инсанлиқ қелипидин чиққан бесим сияситини тохтитишқа чақирип мундақ деди: «һөрмәтлик рәис, қиммәтлик парламент әзалири, ана юртимиз болған шәрқий түркистандики зулум барғансери күчәймәктә. Нурғун хәлқаралиқ тәшкилат вә бирләшкән дөләтләр тәшкилатиниң доклатлириға асасланғанда хитайниң шәрқий түркистандики бесими чидиғусиз дәриҗигә йәткән. Үсти оқуқ түрмигә айланған шәрқий түркистанда, қериндашлиримиз өз мәвҗудийитини қоғдап қелишқа тиришмақта. Уйғурларни ассимилятсийә қилиш үчүн җаза лагерлирини қурған хитай һөкүмити бу йәрдә инсанлиқ қелипидин чиққан уссуллар билән уйғурларни йоқ қилишқа тиришмақта. 21-Әсирдә һәр қайси дөләтләр хитайниң бу сияситини тохтитиши керәк».

У, сөзидә хитай һөкүмитини уйғурларға елип бериватқан бесим сияситини тохтитишқа чақириш билән бирликтә түркийә һөкүмитини уйғурларға игә чиқишқа чақирди. 

6-Декабир күни «түрк оҗақлири» тәшкилатиниң алаһидә тәклипигә бинаән түркийәниң қириқларәли вилайитигә берип икки паалийәткә қатнашқан шәрқий түркистан вәқпиниң сабиқ рәиси һамут гөктүрк әпәнди қириқларәлидә өткүзүлгән икки паалийәт һәққидә мәлумат бәрди. 

Һамут гөктүрк әпәнди мәтбуат баянат бериш йиғинида қириқларәли вилайити «түрк оҗақлири» тәшкилати рәисиниң мәтбуат баянатида хитайни әйибләп, түрк һөкүмитини уйғурларға игә чиқишқа чақирғанлиқини баян қилди. 

6-Декабир күни ахшам қириқларәли вилайитидә өткүзгән доклат бериш йиғинида нурәла гөктүрк ханим уйғурлар тоғрисида язған шеирлирини декламатсийә қилип бәргән. Һамут гөктүрк әпәнди болса уйғурларниң һазирқи еғир вәзийити тоғрисида доклат бәргән. Һамут гөктүрк әпәнди бу һәқтә мәлумат бәрди. 

Қиммәтлик радйо аңлиғучилар, 6-декабир күни ахшам әнқәрәниң полатли районидики «түрк оҗақлири» тәшкилатиниң шөбисидә уйғурлар тоғрисида доклат бериш йиғини өткүзүлди. Йиғинда доктор әркин әкрәм әпәнди уйғурларниң тарихи тоғрисида қисқичә мәлумат бәргәндин кейин, уйғурларниң һазирқи вәзийити вә уйғур мәсилисиниң хәлқарадики вәзийити тоғрисида мәлумат бәрди. У, бу һәқтә мәлумат бәрди. 

Уйғур мәсилисигә болған қизиқиш түркийәдә күнсайин күчийиватқан болсиму җаза лагерлири мәсилисидә түркийә һөкүмитиниң сүкүттә турувелиши кишиләрни ойға салмақта.

Пикирләр (0)
Share
Толуқ бәт