Лагер қурбанлири йиқинлири хитай консулханисидин мәҗбури әмгәк тоғрисида изаһат тәләп қилди

2020-12-21
Share
Лагер қурбанлири йиқинлири хитай консулханисидин мәҗбури әмгәк тоғрисида изаһат тәләп қилди Түркийә пуқраси болған сиңлиси мәвлүдә һилалниң әркинлики үчүн күрәш қилип келиватқан мәдинә назими ханим истанбулдики хитай консулханиси алдидики йиғилишта. 2020-Йили 18-декабир. Истанбул, түркийә.
Photo: RFA

18-Декабир күни, истанбулдики лагер қурбанлириниң йеқинлири сарийәрдики хитай консулханисиниң алдида паалийәт өткүзүп, хитайдин йиғивелиш лагерлириға соланған аилә әзалириниң һазирқи әһвали тоғрисида изаһат беришни тәләп қилди.

Бир қанчә һәптидин буян хәлқара ахбарат васитилиридә чоң ғулғула қозғиған хитайниң уйғурларға йүргүзгән мәҗбури әмгәк сиясити һәққидики хәвәрләр лагер қурбанлири йеқинлирини қаттиқ әндишигә салған болуп, улар хитай һөкүмитидин аилилири һәққидә толуқ мәлумат беришни, мунасивәтлик илтимасни қануний җәрян бойичә қобул қилишни тәләп қилишти.

Түркийә пуқраси болған сиңлиси мәвлудә һилалниң әркинлики үчүн күрәш қилип келиватқан мәдинә назими ханим зияритимизни қобул қилип мундақ деди: “хитай консулханиси йәнә тәлипимизгә җаваб бәрмиди, илтимасимизни тапшурувалмиди. Мән бүгүн хитайдин мениң сиңлимниму пахта етизлирида яки завутта қул қилип ишлитиватамсиләр? мениң сиңлим һаятму? мениң сиңлим зади нәдә? дәп сориғили кәлдим.”

Хитай консулханиси һәр қетимқиға охшаш, йиғивелиш лагери қурбанлири йеқинлириниң консулханидики мунасивәтлик хадимлар билән көрүшүш тәлипини рәт қилди. Сақчилар мунасивәтлик илтимасни мунасивәтлик хадимларниң тапшурувалидиғанлиқини ейтқан болсиму, әлчихана хадиминиң кимликини ашкарилимайдиғанлиқини, лагер қурбанлири йеқинлириниң материялини тапшурувалғанлиқиға аит һөҗҗәт чиқирип берәлмәйдиғанлиқини ейтти.

Лагер қурбанлири йеқинлири әлчиханиниң мунасивәтлик материялларни тапшурувалғанлиқиға аит һөҗҗәт чиқирип бериши керәкликидә чиң турди.

Лагер қурбанлири йиқинлири хитай консулханисиниң алдида паалийәтлирини әтигән саәт 10:00 дин, чүштин кийин саәт 4:00 кечә давамлаштурди.

Түркийә пуқралиқидики лагер қурбанлири йеқинлири, бейҗиңдики түркийә әлчиханисиниң түркийәдики хитай әлчиханилири билән көрүшүшни тәвсийә қилған мәктупини сақчиларға вә консул хадимлириға көрсәткән болсиму, һәммиси бирдәк әлчиханиниң илтимасни қобул қилмайдиғанлиқини ейтишти.

Бу һәқтә зияритимизни қобул қилған лагер қурбанлири йиқинлиридин абдурахман тохти вә мирзәхмәт илясоғли әпәндиләр нәқ мәйданда әһвалдин мәлумат бәрди.

Буниңдин бурун, 14-авғуст вә 2-декабир күни лагер шаһитлири вә җаза лагери қурбанлириниң йеқинлири хитайниң истанбулдики консулханисиға мунасивәтлик илтимасни сунуш үчүн тәләплирини йәткүзгән болсиму, бирақ хитай консулханиси лагер қурбанлири йеқинлириниң тутулған уруқ-туғқанлири тоғрисида мәлумат беришини тәләп қилип язған илтимасини қобул қилмиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт