Твиттер хитай әлчиханисиниң уйғур аяллири һәққидики бир учурини өчүрүвәтти

Мухбиримиз җүмә
2021-01-10
Share
Твиттер хитай әлчиханисиниң уйғур аяллири һәққидики бир учурини өчүрүвәтти Твиттер ширкити өчүрүп ташлиған хитай әлчиханисиниң өзиниң лагер сияситини ақлап "уйғур аяллири әмди бала туғуш машиниси әмәс" дегән мәзмунда елан қилған учури. 2020-Йили январ.
Social Media

Твиттер ширкити шәнбә күни хитай әлчиханисиниң "уйғур аяллири әмди бала туғуш машиниси әмәс" дегән мәзмундики бир учурини өчүрүвәткәнликини елан қилди.

Хитайниң америкида турушлуқ баш әлчиханиси җүмә күни өзиниң лагер сияситини ақлап: "тәтқиқатлар шуни испатлидики, ашқунлуқни йоқитиш җәрянида, шинҗаңдики уйғур аяллириниң идийәси азад қилинди, җинсий баравәрлик вә көпийиш сағламлиқ еңи илгири сүрүлди. Улар әмди бала туғуш машиниси болуш қисмитигә хатимә бәрди. Уларниң һазир өзигә ишиниш вә мустәқиллиқ туйғуси ашти." дегән мәзмунларни өз ичигә алға бир парчә твиттер учури тарқатқан.

Иҗтимаий таратқу вә башқа ахбарат васитилиридә хитай әлчиханисиниң мәзкур учуриниң һақарәт характеригә игә икәнлики көрситилгән вә кәң көләмдә әйибләшкә учриған һәмдә бу учурниң твиттер ширкитиниң "инсансизлаштуруш" принсипиға мухалип келидиғанлиқини көрситилип, уни тосуветиш тәләп қилинған.

Дәсләптә твиттер ширкити бу учурда бир хаталиқ йоқлуқини билдүрүп, уни еливетишни рәт қилған болсиму шәнбә күни қарарини өзгәрткәнликини җакарлиди.

Твиттер баянатчиси арс техника хәвәр тор бекитигә мундақ деди: "йәниму илгирилигән һалда тәкшүргәндин кейин, биз бу учурниң ширкитимизниң инсансизлаштуруш қаидисигә хилаплиқ қилғанлиқини бекитип, шуниңға мунасип һәрикәт қолландуқ. Биз топлуқ яки адәмләрниң уларниң дини, ирқи, миллити вә яки башқа категорийәгә асасән инсансизлаштурушиға йол қоймаймиз."

Твиттер ширкитиниң бу қарари уйғур мәсилисигә көңүл бөлгүчиләрниң алқишиға еришти.

Бир қисим кишиләр бу һәқтә қайтурған инкаслирида бу учур еливетилгән болсиму, хитай компартийәсиниң башқа һесабатлириниң йәнила очуқ турғанлиқидин әпсусланғанлиқни билдүрүшти.

Твиттер өткән йили июнда хитай компартийәсигә мунасивәтлик 23 миң тәшвиқат һесабатини тохтитип қойғанлиқни билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт