"13-Nöwetlik dunya sherqiy türkistanliqlar qérindashliq uchrishishi" bosniyede ötküzülidiken

Ixtiyariy muxbirimiz erkin tarim
2021-10-07
Share
D u q re'isi dolqun eysa sherqiy türkistan teshkilatlar birlikining re'isi hidayettullah oghuzxan qatarliq rehberler bosniyening sarayéwa shehiride. 2021-Yili 7-öktebir.
RFA/Erkin Tarim

Merkizi istanbuldiki sherqiy türkistan ma'arip we hemkarliq jem'iyitining uyushturushi bilen her yili bir qétim ötküzülüp kéliwatqan "Dunya sherqiy türkistanliqlar qérindashliq uchrishishi" ning 13-nöwetliki 10-ayning 8-künidin 10-künigiche bosniyening sarayéwa shehiride ötküzülüsh aldida turmaqta.

Yighin'gha amérika, kanada, gérmaniye, fransiye, shiwétsiye, norwégiye, finlandiye, gollandiye, rusiye, awstraliye, qazaqistan, se'udi erebistan we türkiye qatarliq döletlerdin teklip qilin'ghan Uyghur teshkilatlirining mes'ulliri, tetqiqatchilar, dini ölimalar we ziyaliylar bolup, jem'iy 120 kishi qatnishidiken. Mezkur yighinni uyushturghan sherqiy türkistan teshkilatlar birlikining re'isi hidayettullah oghuzxan ependining bildürüshiche, bu qétimqi yighinning burunqi 12 qétimliq yighin'gha oxshimaydighan teripi, bu qétimqi yighinda Uyghurlarning erkinliki üchün élip bérilidighan ishlarning konkirét pilani tüzüp chiqilidiken.

Mezkur uchrishishqa yene "4-Nöwetlik sherqiy türkistan milliy birlik shurasi" dep isim bérilgenliki melum. Mezkur yighinda nuqtiliq halda xitay sherqiy türkistanda irqiy qirghinchiliq élip bériwatqan, sherqiy türkistan mesilisi xelq'aralashqan bügünki künde, Uyghurlarning erkinlikke érishishi üchün élip bérilidighan ishlar toghrisidamuhakime we muzakiriler élip bérilidiken.

Biz "4-Nöwetlik sherqiy türkistan milliy birlik shurasi" namidiki yighin toghrisida téximu tepsili ymelumat igilesh üchün, yighinni uyushturghan sherqiy türkistan teshkilatlar birlikining re'isi hidayettullah oghuzxan ependi bilen mezkur yighin'gha alahide teklip qilin'ghan dunya Uyghur qurultiyining re'isi dolqun eysa ependiler bilen téléfon söhbiti élip barduq.

Hidayettullah oghuzxan ependi 8-öktebir künidin 11-öktebir künigiche bosniyening sarayéwo shehiride ötküzülidighan bu qétimliq qérindashliq uchrishishi toghrisida melumat berdi.

3 Kün dawam qilidighan bu yighinning birinchi küni, yeni 8-öktebir küni sarayéwo shehrining merkizide Uyghurlarning hazirqi éghir weziyiti ekis ettürülgen resim körgezmisi bilen muxbirlarni kütiwélish yighini chaqirilidiken. -9Öktebir küni xelq'ara siyasiy weziyetning telep we teqezzasigha mas halda, istratégiyelik pilan tüzüsh üchün tepsiliy muzakire élip bérilidiken. Mezkur yighinda yene Uyghur mesilisige alaqidar bezi muhim qararlar maqullinidiken. Hidayetullah oghuzxan ependi bu heqte melumat berdi.

Her yili bir qétim ötküzüliwatqan "Dunya sherqiy türkistanliqlar qérindashliq uchrishishi" ning 1-nöwetliki 2009-yili istanbulda échilghan idi. Bu qétim mezkur uchrishish tunji nöwet türkiye sirtidiki bashqa bir dölette ötküzülgen. Hidayetullah oghuzxan ependi bu qétimqi yighinni bosniyede échishtiki meqset we uning burunqi yillardiki qérindashliq uchrishishigha oxshimaydighan terepliri toghrisida toxtaldi.

Bu qétimqi qérindashliq uchrishishigha dunya Uyghur qurultiyining re'isi dolqun eysamu alahide teklip qilin'ghan. Dolqun eysa ependi d u q ning bezi rehberliri bilen birlikte bu yighin'gha qatnishidighanliqini, yighinda hemkarliqni kücheylish toghrisida muzakire élip baridighanliqini bildürdi.

Igilinishiche, mezkur yighinning échilish murasimigha bosniye prézidénti bilen yawropadiki musulman ammiwiy teshkilatlirining mes'ullirimu teklip qilin'ghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet