Украина хитайниң ваксина тәһдити сәвәблик уйғур районини тәкшүрүш тәшәббусидин йенивалған

Мухбиримиз мәмәтҗан җүмә
2021-06-27
Share
Қазақистан пуқралирида хитай ишләпчиқарған корона вируси ваксинасиға қарита сәлбий инкаслар көпәймәктикән Хитай ишләпчиқарған "sinopharm" корона вируси ваксиниси.
Photo: RFA

Икки нәпәр ғәрб дипломатиниң бирләшмә агентлиқиға җүмә күни билдүрүшичә, бейҗиң даирилири украинаға беришни вәдә қилған 500 миң тал корона ваксинисини тутуп қалимиз, дәп тәһдит салғандин кейин, украина б д т кишилик һоқуқ алий комиссариниң уйғур райониға дәрһал киришигә рухсәт қилиш тәшәббусидин йенивалған.

Украина б д т кишилик һоқуқ алий комиссариниң уйғур вә башқа түркий хәлқләргә қарши елип бериливатқан зиянкәшликләрни чәклимисиз тәкшүрүшигә йол қоюш чақириқиға имза қойған 40 нәччә дөләтниң қатаридин орун алғандин иди.

Мәзкур чақириқни сәйшәнбә күни канада җәнвәдики кишилик һоқуқ кеңишидә оттуриға қойған. Чақириққа дәсләптә 41 дөләт аваз қошуп, хитайни мустәқил тәкшүргүчиләрниң уйғур райониға дәрһал киришигә вә чәклимисиз тәкшүрүш елип беришқа йол қоюшқа чақирған иди.

Канаданиң б д т дики баш әлчиси леслей нортон сәйшәнбә күнидики баянатида "ишәнчлик доклатлар шинҗаңда бир милйондин артуқ кишиниң халиғанчә қолға елинғанлиқини көрситип бериду" дегән. У йәнә, уйғур районида, "қийин-қистақ, рәһимсиз вә инсан қелипидин чиққан җазалашлар һәмдә мәҗбурий туғмас қилиш, җинсий зораванлиқларниң мәвҗутлуқи һәққидә доклатлар" барлиқини тәкитлигән.

Нортонниң чақириқини дәсләптә 41 дөләт қоллиған болсиму, бу сан кейин 45 кә йәткән. Һалбуки, украинаниң чекинип чиқиши билән чақириққа имза қойған дөләтләр сани һазир 44 кә чүшүп қалған.

Дипломатларниң бирләшмә агентлиқиға билдүрүшичә, буниңдин бейҗиңниң өзиниң кишилик һоқуқ хатирисигә қаритилған дуняви диққәтни пәсәйтиш үчүн һәтта инсанниң һаятиға хәвп йәткүзүштинму янмайдиғанлиқини көрүвелишқа болидикән.

Мәлум болушичә, украина хитайниң синовак биотехникиси ширкити ишләп чиқарған 1 милйон 900 миң тал корона ваксинисини сетивелиш келишими имзалиған. Украина сәһийә министири макисим степанофниң сөзигә қариғанда, украина бу йил майғичә хитайдин 1 милйон 200 миң тал ваксина тапшурулған икән.

Украина даирилири бирләшмә агентлиқиниң бу һәқтики со‍алини җавабсиз қалдурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт